韓國Daiso 7月暢銷商品
韓國Daiso 7月有咩暢銷商品？而家先mark底，之後再嚟韓國掃貨啦！
Hello，大家好，我哋係由韓國人每日提供最新韓國旅行資訊嘅Creatrip。
相信大家以前嚟韓國，都一定會行Daiso，不過而家因為疫情影響嚟唔到。不過唔緊要！小編由今個月開始會為大家介紹每月新商品同暢銷產品，如果有睇啱，等疫情好轉之後，就將呢啲商品一次過買返屋企啦！
韓國Daiso 7 月暢銷商品
1. 竉物糧食及飲水機（펫 급수식기） ₩3,000 （約HKD21）
最近喺韓國，會發現寵物用品店越嚟越多，可見韓國人為咗自己嘅寵物好捨得洗錢，今次Daiso唔例外，出咗呢一個寵物糧食及飲水機，相當有諗頭！
一邊可以放糧食，一邊可以放飲水機，而且水機仲會自動加水，超神奇，有粉紅同粉藍兩隻色，水壺仲可以放700ml水添！
2. 清潔魔術海綿刷（세제없이 청소하는 매직 스펀치솔） ₩1,000 （約HKD7）
呢個清潔魔術海綿刷一推出，小編已經忍唔住想快啲買！因為當時睇IG嘅介紹已經覺得佢好神奇，佢除咗可以用刷不綉鋼嘅面地方之外，下面嘅小勾，仲可以幫大家刷走陳年污跡，一支魔術棒可以兩用，重點係價錢一啲都唔貴！
一盒有附上一支棒同六個海綿，用法就先將棒分開，之後擺海綿喺中間，之後將佢哋合返埋，加水就可以用。
濕咗水之後嘅海綿，就可以刷喺不鏽鋼嘅地方，雖然佢細細支，但真係刷得好令，好乾淨。
3. 環保飲筒（실리콘 캡 포함 스테인레스 빨대） ₩2,000 （約HKD14）
雖然呢個唔算係咩新商品，但係隨住韓國人都越嚟越重視環保，Daiso都有推出呢一種環保飲筒，HKD14就有5支，相當之平！
4. 運動扭盤（트위스트 원판） ₩3,000 （約HKD21）
隨住疫情影響，唔少人為咗更加健康，喺屋企都會做運動，而喺Daiso都可以搵到好多同運動有關嘅商品，呢一款扭盤可以360度咁轉，唔單止可以瘦腰仲可以瘦腿，最多可以承受100kg。
不過提提大家：用呢個扭盤之前，最好先做少少熱身活動，如果直接用，怕會扭傷。
5. 瑜伽環（소프트 요가링） ₩3,000 （約HKD21）
呢兩年，瑜伽環真係好受歡迎，除咗可以幫大家訓練小腿肌之外，其實佢仲有好多用處，可以幫大家拉筋同按摩，有效利用佢嘅話，仲可以練出手臂肌肉、訓練美背肌等！
小編本身自己都有買另一款牌子用，一開始用可能會覺得有啲痛，但keep住佢就慢慢習慣，會覺得超舒服！
6. One Touch LED燈（LED 라이트） ₩3,000 （約HKD21）
有時夜晚想臨瞓之前睇吓書，覺得開大盞燈太光，可以試吓轉用呢啲LED燈。
佢除咗可以簡單咁用remote control操作之外，仲可以幫大家set 30分鐘，同時仲有兩種燈光可以調校，掛喺床邊，隨時用超方便！
7. 冷卻噴霧（쿨링스프레이） ₩2,000 （約HKD14）
炎炎夏日可以做啲咩降溫？可以試吓買呢一支冷卻噴霧，噴喺衫度，再着上身，即刻可以感受到涼浸浸。去行山、露營、返工放工多人嘅時候噴下，噴完可能會覺得舒服晒。
8. IRON MAN手動風扇（핸디선풍기） ₩5,000 （約HKD35）
除咗冷卻噴霧之外，夏天又點可以少咗把風扇呢？Daiso經常會同迪士尼或Marvel聯名，如果係Marvel迷就一定要買一把啦！呢個總共有3階段可以調較風嘅強度。
9. Toy Story室內毛毛拖鞋（캐릭터 신발 걸레） ₩5,000 （約HKD35）
小編今次去Daiso行一轉，發現Daiso有新出同Toy Story聯名嘅室內毛毛拖鞋，呢一種拖鞋除咗可以當拖鞋普通著，仲可以吸塵，一舉兩得！當時小編去只係見到有小叉、勞蘇、三眼仔款，唔知之後會唔會出更多其他人物呢？
10. 口罩套（마스크 보관 케이스） ₩1,000 （約HKD7）
平時食飯有時都會除低口罩，唔知可以點樣保管，咁就不如買返個口罩套啦！佢除咗可以防止污染之外，仲可以幫大家殺菌。
唔知今次介紹呢10款韓國Daiso大熱商品，大家又滿唔滿意呢？如果有睇啱，暫時又未嚟到韓國，都可以先save底呢篇文章，之後嚟到再買！
如果有更多想知嘅內容，都可以隨時留言或者dm話俾我哋知：）
Instagram：creatrip.hk