聖水「Grandpa Factory」 介紹
猶如藝術館嘅大型聖水「Grandpa Factory」 Cafe，早前《黑道律師文森佐》都喺度取景！
Hello，大家好，我哋係由韓國人每日提供最新韓國旅行資訊嘅Creatrip。
最近首爾林附近嘅聖水洞一間好靚，人氣超高嘅大型cafe，叫「Grandpa Factory」。如果大家去完首爾林會搵間cafe飲杯咖啡嘅話，極力推薦呢間cafe！究竟「Granddpa Factory」入面係點嘅樣㗎呢？跟住小編嚟啦！😊
聖水「Grandpa Factory」 介紹
Grandpa Factory （카페 할아버지공장）
- 地址：서울 성동구 성수이로7가길 9
- 營業時間：每日 11:00 - 22:30
- 小Tip：聖水站（성수역）3號出口行6分鐘
Grandpa Factory位於距離首爾林唔係好遠嘅「聖水洞咖啡街」。 呢度嘅設計師--洪東熙代表，係韓國好出名嘅建築設計師同擺設藝術作家，運用佢所有秘訣，將Grandpa Factory打造成聖水洞最靚嘅cafe！
事實上，平平無奇嘅聖水洞街之所以能夠成為而家有咁多靚靚cafe，充滿文化氣息嘅咖啡街，都係因為洪東熙代表喺2013年開設嘅Gallery cafe同大林倉庫。大家係咪好好奇呢？
Grandpa Factory總共有四個空間，等小編慢慢介紹俾大家啦！推開木門，首先望到嘅係一片綠色嘅植物， 呢度就係1樓coffee store啦～
就咁睇係咪覺得好大呢？但係呢度只係Grandpa Factory嘅1/10嘅空間！大家想唔想像得到究竟呢度有幾大呢？
入口嘅右手邊會見到一個長型嘅黑色counter，俾大家嗌嘢食。
Counter右邊掛住木製黑板造型嘅menu，呢度除咗有咖啡，仲有沙律、三文治、牛扒、意粉等等嘅正餐，可以喺度醫肚，唔使再去其他地方搵食！
Counter嘅正前方有一道通向院子嘅玻璃窗。 好似小編去嗰日咁冇落雨嘅話，可以咁樣打開窗，直接同院子相連。
經過order嘅counter之後，再行入去睇吓啦！中間有四張又大又長嘅原木枱為中心，兩邊擺放着住幾張枱。
望落去好似係差唔多樣嘅原木枱，其實每一塊木都具有獨特嘅色彩，再加上原封不動咁保留住自然裂開，或彎曲嘅樹形，成個空間都好和諧，好靚，俾人一種親近自然嘅感覺。
LP唱片機、造型特別嘅燈、大型鏡等等嘅裝飾物令空間更有氣氛，呢塊鏡係Grandpa Factory嘅打卡位，大家嚟到記得喺呢度影返張認證照啊！
1樓最入面設有上去2樓嘅樓梯同坐墊。坐喺呢度可以一覽無遺咁睇到1樓嘅空間，欣賞吓室內裝修設計，心情都特別放鬆。
沿住樓梯上去嘅話，就係2樓嘅gallery store，設計雖然同1樓差唔多，但展示咗各種藝術作品。 天花板嘅設計好有美術感，好似去咗現代美術館一樣。
牆上掛滿咗一幅幅藝術作品，好有特色。
仲展示咗各式各樣嘅畫作、攝影作品、美術擺設。展品唔會一直一樣，會週期性咁換上唔同嘅藝術家所創作嘅作品，令空間帶嚟變化。 果然老闆係藝術家出身，為咗熱愛藝術嘅人，打造一個完美嘅文化空間。
2樓角落有一間細型嘅房。
呢度擺放咗兩張長型原木枱。適合團體聚會，開party。
兩面嘅牆上都放滿好型、好感性嘅藝術作品，被天然陽光照射落去，顯得更有感覺！
房嘅前面有條樓梯，沿住行上去都係屋頂嘅陽台。
符合成間cafe嘅概念，陽台嘅地板同框架都係用原木製成。順着原木框架掛上嘅藤蔓，真係好靚！
可能因為係6月，度度都開咗繡球花！ 淡淡紫藍色，令呢度變得更加迷人。
陽台都有唔少座位，天氣好嘅時候可以上嚟休息，欣賞吓風景。
最後要介紹嘅就係個庭院啦！被周圍嘅建築包圍，物別有神秘感！
庭院入面除咗有木製嘅枱之後，仲有唔顏色嘅枱枱櫈櫈，有一種童話嘅感覺，而且又有繡球花，望落更加靚。
庭院中間種咗一棟樹，樹上有一間小屋，係Grandpa Factory最有標誌性嘅地方！ 就好似爺爺鄉下屋企嘅小屋一樣！
呢個一眼就望到庭院嘅位置，聽講最近啱岩播完嘅韓劇《黑道律師文森佐》喺呢度取景！ 呢個位置就係文森佐同洪車瑛坐過嘅位置。
小編今日點咗冷萃髒髒維也納咖啡同牛油果醬蝦三文治，呢兩款都係呢度嘅招牌。
冷萃髒髒維也納咖啡（콜드브루 더티 아인슈페너）- 8,000won（約HKD56）
冷萃美式咖啡上放滿咗cream奶油，撒滿咗可可粉，再喺杯嘅側面加咗啲朱古力糖漿，營做髒髒感。以為又有朱古力糖漿同cream會好甜，但飲落去又冇想象中咁甜，反而朱古力糖漿有陣苦苦哋嘅黑朱古力味，同cream夾埋就啱啱好！（不過就有啲貴 😅）
牛油果醬蝦三文治（쉬림프 과카몰리 샌드위치）- 17,000won（約HKD116）
三文治個麵包底好厚，上面放咗牛油果醬、雞蛋、洋蔥、蕃茄、蝦、蔬菜等。 擺盤擺得好靚，影完相都唔捨得食！
因為三文治都好大份，先用刀將佢切成一啖嘅size，再鋪好啲配料，一啖食落去，感覺真係好正！
味道唔會太鹹，又唔會太淡，份量又大，所以食一個就好飽啦！
以上就係一間好似入咗藝術館一樣嘅Grandpa Factory Cafe，大家又鍾唔鍾意呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk