同手有關嘅詞語同慣用語
韓國竟然有咁多字都同「手」 （손） 有關！你又識幾多個呢？
Hello，大家好，我哋係由韓國人每日提供最新韓國旅行資訊嘅Creatrip。
對韓文有認識嘅朋友或者會知道「手」嘅韓文係「손（son）」，但你又知唔知韓文入面亦有好多同「手」有關嘅詞語或者係慣用語呢？今日就等小編嚟同大家介紹吓啦！
同手有關嘅詞語
똥손/ 곰손/ 흙손 vs 금손/ 다이아손
喺韓文當要形容一個人唔太叻用手去製造某啲嘢，或者打機抽嘢冇咩運氣嘅時候可以用「똥손」呢個詞語嚟形容。直譯係「屎手」，中文多數會譯做「臭手」，相同意思嘅字仲有곰손（熊手）同흙손（土手）。畫畫好醜、唔識煮嘢食、唔識化妝，或者唔識做手工嘢，唔擅長任何要用手去製造嘅嘢嘅時候都可以用呢個字。而第二個意思多數係形容打機抽item嘅時候，非常冇運氣不停只係抽埋啲冇用嘅嘢嘅時候都可以用！而相反地想形容一個人好有手工天份，或者打機抽嘢好好運嘅時候，就可以用「금손」呢個字啦！直譯係「金手」，比「金手」更勁嘅時候，更可以用「다이아손（鑽石手）」添！
例句
A：야 너 아직 이 보물 없다며? 정말 똥손 맞네. （聽講你仲未抽到呢個寶物？果然係臭手。）
B：하..조용히 해. 오늘 금손 모드로 꼭 뽑을 거야. （唉...收聲，我今日一定會用金手模式嚟抽㗎。）
큰손（손이 크다）
「손이 크다」 直譯係「手大」，亦可以將佢名詞化為「큰손（大手）」咁用，係好大方同好客氣嘅意思，同我哋都會用嘅「大手筆」類似意思。
例句
A：음식 왜 이렇게 많이 가져왔어요? 손이 정말 크시네요!（點解帶咁多食物番嚟？你真係大手筆！）
B：파티하면 맛있는 거 많이 먹어야죠!（開party嘅話當然要食好多好西啦！）
손이 맵다
「손이 맵다」直譯係「隻手好辣」，有打人落手好重，只係輕輕掃過都好痛嘅意思，亦可以形容做事好乾淨利落嘅情況。
例句
A：벌칙은 딱밤 맞기야!（懲罰係彈額頭！）
B：아 진짜 싫어! 네 손이 너무 매워서 저번 딱밤 맞으니까 하루 종일 아팠잖아.（吓唔好啦！你落手好重，上次俾你彈完我痛咗全日囉）
손이 빠르다
呢個字直譯係「手快」，同我哋廣東話入面都會用做嘢好快手嘅意思。
例句
Ａ：오늘 퇴근 전에 다 완성할 수 있나요?（今日放工前做唔做得完？）
Ｂ：네, 제 손이 빨라서 금방 완성하겠습니다.（嗯，我做嘢好快手，即刻就可以做好。）
손을 보다
「손을 보다」一共有兩個意思，一係修理嘅意思，二係以打交方式教訓／收拾一個人嘅意思。
例句
Ａ：세탁기가 고장 나서 손 좀 봐야 할 것 같아.（洗衣機壞咗，所以要（搵人嚟）整。）
Ｂ：네, 그럼 제가 집주인에게 이야기할게.（好，咁我今日同業主講聲。）
番外
以下係一啲同手冇關但都用「손（son）」同音字嘅詞語，或者係同手有關但只係某一個群體嘅人比較常用嘅字，放上面有啲曖昧所以喺呢度介紹俾大家！
손절하다
呢個字同手冇關，只係發音咁啱同「손」同音，不過真係好多人用，所以小編都想同大家介紹吓。「손절」本身漢字係「孫絕」/「損絕」，前者係絕孫咁解，後者則係一個股票方面、同經濟學有關嘅字，意思係蝕更多錢之前，快啲賣出自己嘅股票。不過隨着越嚟越多人投資股票，呢個字都變咗日常用語之一，意思係「絕交/終止一段關係」。而家比起「絕交」呢個字，更多人會用「손절하다」，特別係年輕一代！當動詞用嘅時候係「손절하다」。
例句
Ａ：걔가 맨날 나를 이용하는데 손절하는 게 맞겠지?（佢成日都利用我，係咪應該絕交？）
Ｂ：이 정도면 손절해야지! （佢做到咁當然要絕啦！）
손민수하다（抄人）
呢個雖然都同手冇關，但係好多人會用嘅字。呢度嘅「손」字其實係姓氏「孫」嘅意思！唔知有睇過韓劇《奶酪陷阱》嘅朋友仲記唔記得嗰個成日抄主角「洪雪」嘅角色「孫敏秀」呢？呢個詞語就係來自呢個角色啦，代表「抄人」呢個行為。不過實際用嘅時候其實並唔係一個負面嘅字，反而比較接近「想同某個名人用同款」嘅意思！所以如果係網上search「藝人名+손민수+템（item）」，就可以搵到嗰個藝人用嘅一啲物品嘅資料㗎啦！例如「아이유 손민수템（IU孫敏秀tem）」，就係IU同款嘅意思啦！
不過小編覺得呢個字最搞笑嘅都係有時有啲idol唔識「손민수하다」呢個字，然後會一臉疑惑咁問粉絲到底邊個係孫敏秀哈哈。
例句
이 옷 무슨 브랜드인지 아시는 분 있나요?...너무 손민수하고 싶어요..（有冇人知道呢件衫係咩牌子？好想同佢着同款..）
매직핸드（魔術手）
最後一個字係「매직핸드（magic hand）」，雖然冇「손」呢個字，但都係同手有關嘅字。意思係成日整唔見或者整壞嘢嘅手。呢個字SHINee成員幫泰民改嘅花名，形容佢掂咩壞咩！不過呢個詞語始終係花名，所以唔算多人會用呢個字，多數係藝人粉絲，特別係SHINee或者SM家其他粉絲用得比較多。
以上就係一啲同手有關嘅韓文詞語或者慣用語啦，有冇覺得同手有關嘅韓文俾想像中多呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk