疫情對韓國年青人嘅影響
持續咗一年嘅COVID-19對韓國年青人有啲乜嘢影響？佢哋竟然一日只可以食一餐飯？
Dispatch
Hello，大家好，我哋係由韓國人話你知每日最新韓國資訊嘅Creatrip。
#韓國社會 #韓國生活
#年青人 #COVID-19
喺上年年尾開始爆發，到而家差唔多一年嘅COVID-19影響咗全球嘅經濟同埋好多人嘅日常生活。
而韓國都唔例外，韓國自從封關冇咗遊客可以嚟之後，好多舖頭同埋餐廳都執咗笠。
呢啲情況嘅出現，受最大影響就係一班上班族。
最近，韓國媒體就報道咗呢個COVID-19對韓國年青人嘅影響。
到底有咩影響，我哋就一齊嚟睇吓啦！
✨馬上Follow我哋IG
instagram.com/creatrip.hk
COVID-19對韓國年青人嘅影響
Dispatch
喺今個月11號播出嘅節目《News Desk》入面，講述咗因為COVID-19而每日都要好艱難咁生活嘅20幾歲年青人嘅故事。
喺著名大學設計系畢業，今年27歲嘅申民俊(音釋)畢咗業兩年都搵唔到一份正職，只可以靠兼職嚟支撐佢嘅生活。
除咗生活費之外，佢最擔心嘅嘢就係佢嘅「欠債」。
佢讀大學嘅時候，借咗1700萬韓幣嘅學費貸款，仲借埋生活費嘅貸款，積積埋埋身上孭住4300幾萬韓幣嘅債務。
而且呢筆債務仲有利息，佢而家每一日都畀貸款電話折磨緊。
喺韓國，孭住學費貸款債務嘅大學生就有46萬位，就等於平均每7個大學生入面就有1個。
特別係每個月一定要還利息嘅「一般償還貸款」，6個月以上冇玩過嘅學生喺五年入面增加咗1.7倍。
而因為COVID-19而引起嘅失業率對年青人嚟講係更加殘酷。
韓國喺今年10月嘅失業人士入面，20至30歲呢個年齡層嘅比重佔咗足足40%，係所有年齡層之中上升率最高。
Dispatch
好多人都會覺得，就算搵唔到一份正職嚟做，都可以返住兼職先，但問題係而家連韓國可以搵兼職嘅地方都冇。
就係因為咁，喺韓國而家都有唔少學生冇錢食飯，每日淨係食一至兩餐。
希望可以用唔食飯慳返嘅錢去交一定嘅日常開支，例如：屋租、電話費、交通費等等。
節目入面訪問咗一位喺學校門口準備食飯嘅大學生，佢淨係喺便利店買咗一個900韓幣嘅三角飯團就當係一餐晏晝。
而另一位大學生就表示佢呢一個月以嚟幾乎每一日都淨係食一餐飯。
佢一開頭都會覺得肚餓捱唔住，但係時間耐咗之後就習慣咗。
唔少人聽到佢呢番說話之後，都覺得好慘同埋心痛。
Dispatch
隨住負債累累嘅年青人增加， 20幾歲年青人嘅「個人回生」申請係今年足足增加咗21%。
而韓國政府都意識到呢一個情況，喺上個月開始就將年青人嘅債務還款延期制度嘅對象由本身嘅30歲擴大到34歲以下。
寬限期亦都由原本嘅4年延長到5年。
今年呢一個COVID-19嘅出現真係影響到唔少人。
小編喺韓國眼見因為呢個疫情而執笠嘅舖頭同餐廳真係越嚟越多。
希望呢一個疫情可以快啲完，等社會同埋大家嘅日常生活都可以回復返正常！
✨馬上Follow我哋IG
instagram.com/creatrip.hk
| 其他延伸閱讀 | |
 大韓收購韓亞 |  冬季感染案急升兩倍 |
