韓星可愛搞笑時刻
呢篇粉絲絕對要收藏！韓星可愛又搞笑嘅時刻！有韓星差啲唔少心食咗防腐劑落肚？
Hello，大家好，我哋係由韓國人每日提供最新韓國旅行資訊嘅Creatrip。
講起韓國偶像，大家通常都係諗起佢哋好完美無可挑剔嘅形象，但其實再完美嘅偶像始終都係凡人，難免間唔中會有啲小失誤。今日就同大家整理咗啲韓國偶像可愛又搞笑嘅失誤時刻，大家心情唔好嘅時候嚟睇番保證可以即刻笑翻！BTW小編唔係想取笑任何人，只係分享出嚟希望大家睇得開心～
韓星可愛搞笑時刻
1. Super Junior成員唔記得走位事件
就算無去到現場，相信香港嘅E.L.F.都一定有耳聞過Super Junior呢一場演唱會嘅小失誤。呢件事係發生喺泰國嘅一場Super Show 6入面，當SJ表演緊Evanesce嘅時候，本身有一part係所有成員都要企喺個空中舞台上面，結果幾乎大部份嘅成員都唔記得咗退後一步。
得幾位成員順利升到上個舞台，仲走去拍其他成員膊頭提佢哋跳上去。最後，工作人員就降低返個舞台，等每個成員都行曬上去之後先再升高個台。睇片入面嘅泰國粉絲笑得幾開心就知，Super Junior果然名副其實係「搞笑偶像」！
2. EXO世勳認錯人嘅尷尬時刻
weheartit @annie_klover
每年都會舉辦嘅偶像運動會，係一班偶像可以一齊參加運動比賽嘅一個節目。因為呢個節目實在一次過聚集咗太多偶像，EXO世勳就發生過一件認錯人嘅尷尬趣事。
本身佢係同NCT嘅Johnny傾緊偈，結果喺佢行開擺低啲嘢再翻返嚟想繼續同Johnny傾計嘅時候，講咗幾句見「Johnny」無反應先發現自己係同緊Seventeen嘅淨漢講野... 因為淨漢同Johnny嘅髮型好相似高度都差唔多，喺背後望落簡直係一模一樣，所以先令世勳搞錯咗，佢都即刻行返去搵Johnny。小編覺得呢個GIF圖真係好表現到嗰種認錯人嘅錯愕，世勳個反應真係又搞笑又可愛！
3. BTS柾國體力挑戰失敗事件
有「黃金忙內」之稱嘅BTS柾國，以出色嘅體能令人印象深刻，成日都俾人叫佢展示佢嘅力量。喺以前BTS就上過一個叫《Beatles Code》嘅綜藝節目，喺入面主持就叫柾國做掌上壓，唔好以為淨係掌上壓咁簡單，仲有一位女嘉賓雙腳離地咁坐喺佢嘅背脊上面加重負荷。
當大家都以為柾國可以輕鬆咁做到呢個負重掌上壓嘅時候，柾國竟然落完去之後上唔返嚟，仲用個頭頂住地下。呢個情境令在場嘅MC同隊員都即刻爆笑，雖然證明唔到自己嘅力量，但柾國就成功咁為大家帶嚟歡笑～
不過小編相信，畀多一次機會柾國而家做掌上壓，佢一定可以成功洗脫污名！睇下佢而家啲肌肉幾結實就知，就算係男人都會有天使嘅面孔同魔鬼嘅身材。
4. GOT7 Jackson嘅超黑仔雪糕事件
呢個都係各位鳥寶寶一定知道嘅名場面之一，發生喺GOT7嘅vlive節目「GOT7 Working Eat Holiday in Jeju」。
呢條片小編都係睇幾次都忍唔住笑，事源係嗰陣Jackson享受緊用₩10,000買返嚟嘅雪糕，但當佢撕開雪糕嘅包裝紙嘅時候，突然成個雪糕跌咗落地，Jackson即刻大嗌嗰一下，真係超級搞笑！
當大家覺得自己行緊衰運嘅時候可以睇下呢條片，即刻會覺得自己都唔算好黑仔姐。
5. Seventeen DK食防腐劑事件
相信大家都有見過唔少零食入面都會有一包細細包嘅防腐劑，用嚟避免零食太快過期。呢一件搞笑事件就係發生喺Seventeen嘅簽名會上面，DK嗰陣收到粉絲畀嘅零食就好開心咁即刻拆開嚟食，結果佢一個唔為意唔小心擺埋入面包防腐劑入口......
好彩DK無真係食咗落肚，喺佢擺咗入口嘅時候就覺得奇怪，即刻攞返出嚟。其實唔單止DK，Seventeen嘅另一位成員S.coups都發生過同一件事，好彩無發生咩意外！
6. NCT 志晟嘅舞台服裝事件
大家都知道偶像嘅打歌服通常都係著重於fashion、要夠搶眼同埋靚，不過有時候就會忽略咗對於表演嘅適切性。
有時候都會令偶像喺舞台上發生意外同失誤，就好似NCT嘅志晟咁。當NCT Dream表演緊"My First and Last"嘅時候，佢兩個袖啲繩就纏埋咗一齊，令佢要即刻扯開個結繼續表演。不過志晟對於處理呢個舞台上嘅突發意外都做得好好，可以話係當機立斷。
7. JYJ 金在中嘅骨牌事件
跌親可以話係每個人都有經歷過嘅事，不過金在中唔小心跌親影響嘅就唔淨係佢自己一個人。之前JYJ就上過一個綜藝節目模仿電影《王的男人》嘅情節，金在中著住女人嘅韓服出場嘅時候唔小心仆親，仲撞倒喺佢前面嘅皇上，搞到皇上都仆向前仲碌埋落樓梯。
雖然好衰，但小編睇完真係忍唔住笑......
8. BTS RM長腿造成嘅失誤
BTS喺舞台上嘅表演一向都係公認嘅整齊劃一，不過始終大家都係凡人，間唔中有啲失誤都好平常。喺一次BTS表演緊"Butterfly"嘅時候，RM就因為對腳太長令到佢走錯位，要其他成員拉返佢返去，不過好彩佢都好快企返啱嘅位。
9. BLACKPINK Lisa彈床事件
我諗各位Blink應該已經睇曬BLACK HOUSE啦！呢樣搞笑事件就係發生喺EP.7-4入面Lisa同Rosé玩彈床嘅時候，Lisa因為體力唔夠，玩slamball跳得唔夠遠連個框都掂唔到，真係又搞笑又可愛！
10. Davichi 珉炅紙屑事件
唔少表演嘅舞台都會用到七彩嘅紙屑營造舞台效果，而對於Davichi嘅珉炅嚟講，啲紙屑就好似同佢唔係好夾。有一次Davichi上M Countdown打歌嘅時候，啲紙屑就飛咗入佢口入面，令到佢唔小心笑場再繼續唱落去，成件事超級可愛！
其實唔單止珉炅，另一位成員海莉都因為食到啲紙屑而唱唔到歌，本身佢仲一路唱一路喊緊，但因為紙屑入口而停低。但其實紙屑入口真係幾危險，如果唔小心入咗氣管就大獲！
11. Twice Sana嘅空中瑜伽事件
空中瑜伽喺呢幾年真係幾流行，睇落去好優雅，不過實際玩嘅時候就知道唔係咁輕鬆，Twice嘅Sana就向大家示範咗。唔單止連企喺上面都好難，當佢想嘗試掛喺條繩上面嘅時候，仲唔小心變成倒豎葱嘅姿勢，真係超級可愛！
大家睇完呢啲搞笑嘅畫面心情有無好返啲？如果小編再發掘到其它偶像嘅小失誤，一定會分享出嚟畀大家睇！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
