韓國夜生活文化
韓國夜生活超豐富！hunting bar係咩嚟？老人家都有專屬嘅夜店？
Hello，大家好，我哋係由韓國人話你知每日最新韓國資訊嘅Creatrip。
＃韓國夜店文化＃夜生活文化
＃夜生活 ＃年輕人
大家一諗韓國嘅夜生活，係唔係都會諗到club呢？不過除咗年輕人成日去嘅club之外，韓國仲有老人專屬嘅club㗎！
小編今日要介紹韓國夜店嘅文化同種類，如果你都對韓國夜生活有興趣嘅話就一齊睇落去啦。
✨馬上Follow我哋IG
instagram.com/creatrip.hk
韓國夜店文化
1. Club
講到韓國夜店，大家諗到嘅應該就係位於弘大、江南、梨泰院一帶。每逢星期五六一定會有好多年輕人去嗰邊準備去玩通宵。
來源：NB
呢啲地方嘅共通點就係都會有入場費，不過唔一定會包酒券，冇酒券嘅話入到去之後想飲酒就要另外俾錢，當然亦都可以入到去咩都唔點，單純享受音樂。
好多年輕人想飲酒就會出去便利店買，相對會比較平啲，仲可以吹下風，休息一下。
來源：M2
夜店通常都會有自己嘅潛規則，例如年紀大嘅話唔可以入場，著得唔好睇，或者著得太休閒都可能唔俾入去，一切都係睇工作人員當下嘅心情。
甚至出面會有工作人員，睇到啲比較靚嘅女仔的話，會主動問要唔要免費入去坐包廂，吸引多啲男仔去。
不過呢類夜店都會容易引發一啲問題，例如性騷擾、性侵害，甚至酒後鬧事等等，而先前Buring Sun夜店更加有落藥性侵，同俾未成年入場嘅醜聞。
弘大主要係以大學生、20代、外國人為主，穿著上都會比較輕鬆；江南就偏高檔少少，比較注重穿著，入場費都會較貴；而梨泰院就咩人都會有，對外國人就最友善。
2. 酒吧
韓國酒吧通常都係冇入場費，最低消費就係一人一杯酒。
不過比較大型（有舞池嗰啲）就唔會太在意你到底有冇點到酒。
除此之外，韓國嘅酒吧係偏向Pre-Drink嘅概念，通常係先同朋友喺呢邊傾計，等到再夜啲就去club玩。
韓國酒吧基本上都係西式，賣調酒同啤酒居多。而比較有趣嘅係，韓國人通常都係會點啤酒，唔太會點調酒。
呢啲酒吧嘅啤酒雖然一細枝，都要大概₩8,000至₩12,000（港幣$57至$86），但種類繁多，飲落都比較順口，較高檔嘅酒吧就會賣紅酒、白酒為主。
酒吧唔單止會開喺夜店附近，只要係「夜生活區域帶」嘅話就一定會有。
唔只弘大、江南、梨泰院，喺鐘路、新村、大學區附近都會有各類酒吧林立。
3. Pocha
Pocha（포차）都係韓國夜生活文化之一，比較似係「餐酒館」，唔單止會賣酒，一枱都至少要叫一份主食。
Pocha同一般餐廳唔同嘅地方係，Pocha通常都係夜晚先開始營業。
比較偏向年輕人喺呢度先填飽個肚，飲完幾杯之後，再去下一輪酒吧或者夜店。
而特別嘅係韓國嘅Pocha係唔太會俾泡菜之類嘅小菜，主要都係俾小餅乾為主。
韓國嘅Pocha文化興盛，好多年輕人或者上班族都鐘意夜晚同朋友一齊去消遺。
最近韓國亦都流行洋酒Pocha，主打中低價位嘅白酒、紅酒同西式美食。
同傳統Pocha唔同，氣氛更加休閒，舒服。亦都唔會有燒酒同韓式料理食，不過都吸引咗好多年輕人同朋友去chill下。
4. 同志夜店
同志夜店之所以會被人注意到，係因為20年4月，梨泰院同志夜店爆發咗群聚感染。
嗰件事發生咗之後，先知道原來喺酒吧、夜店林立嘅梨泰院，係有好多間同志夜店。
來源：조선일보
不過同志夜店同一般夜店冇咩唔同，都係要俾入場費，而入面通常清一色都係男性，聽講女性想入去嘅話入場費會更加貴。
聽講喺鐘路三街附近都有同志Pocha，基本上只會比男性客人入場，以防一般異性戀男女誤入，造成其他同志客人不便。
5. Hunting Bar
Hunting Bar喺韓國都好流行，江南、弘大等地方都有。
通常係同性朋友一齊去，然後再喺入面搵人搭訕（通常都係男仔搭訕女仔），再一齊坐埋飲酒，或者出去第二攤。
大家可能會覺得冇聽過好神奇，但其實呢個係韓國大家都會知道係個咩地方。
喺Hunting Bar入面識到嘅人，通常之後都唔會繼續聯絡或者係見面。
係因為「打獵」就係滿足當時嘅慾望為主，外貌符合喜好條件之下就可以坐埋一齊飲酒，所以通常見幾次面之後，繼續聯絡嘅機率好低。
來源：매일경제
即使知道結果係咁，但仍然有好多韓國人都抱住「話唔定會遇到啱嘅人」嘅想法去Hunting Bar打獵。
同埋好多都話Hunting Bar會睇年紀，超過30歲就唔可以入去。
6. Colatek（콜라텍）
隨住韓國慢慢進入高齡化社會，針對老人家嘅娛樂需求都開始受到重視。
喺首爾、釜山一帶都開始出現越嚟越多只有銀髮族先可以入場嘅Colatek。
來源：《青春記錄》
迎合銀髮族嘅作息時間，只要一到夜晚呢啲銀髮族夜店「Colatek」就會唔開。
不過呢啲地方其實之前係只限未成年學生入場，只可以賣可樂等無酒精飲品嘅夜店嚟。
由於學生消費能力唔高，又只會開到夜晚九點，淨係提供無酒精飲品嘅Cloatek根本滿足唔到班學生。
就係因為咁經營者都轉曬型，將主要客群轉到好少有社交，會懷念後生嗰時跳舞嘅銀髮族。
來源：중앙일보
呢類Colatek入場費都好平，舞池附近都會有工作人員隨時看守住，避免老人家情緒太High會唔小心跌倒。
銀髮族夜店多數集中喺高齡人口居多嘅東大門區一帶，令到一班老人家可以喺度聚會，重溫年輕舊夢。
來源：한겨레
雖然因為疫情影響，呢啲夜店都受到營業限制，紛紛停業或者係轉型，希望之後疫情會快啲好轉，大家再有夜生活。
亦希望大家會鐘意小編今日嘅介紹，我哋下次見。
✨馬上Follow我哋IG
instagram.com/creatrip.hk
| 其他延伸閱讀 | |
 飲燒酒嘅方法 |  韓國飲酒文化 |
