Hello，大家好，我哋係由韓國人話你知每日最新韓國資訊嘅Creatrip。
＃韓國新聞＃熱議
＃救護車＃計程車
韓國青瓦台網站出現請願：《請處罰攔下載有緊急病患嘅救護車嘅的士司機》。
文章上線短短四日，經過媒體報導後請願人數突破60萬。
究竟發生咩事呢？
✨馬上Follow我哋IG
instagram.com/creatrip.hk
急救病患送院被阻
幾日前，韓國媒體開始大幅報導一單案件。
一名的士司機同救護車碰撞，發生輕微車禍，但的士司機堅持現場處理完，唔理車上病患嘅生死，最終令病人送院五個鐘後離世。
青瓦台請願網站上一篇《請處罰攔下載有緊急病患嘅救護車嘅的士司機》，完整講述成件案件嘅過程。
內文表示，6月8號15:15，母親身體不適，所以幫佢call白車送院。
救護車轉線嘅時候，同一架的士發生輕微碰撞。
救護車司機落車對呢名的士司機講，要以運送病人到醫院為優先，之後再處理呢單車禍，的士司機拒絕，要求即場處理，要求其他救護車嚟接應。
請願人嘅妻子落車同的士司機講，車CAM都有記錄到事發過程，之後再處理都得，依家最緊要嘅係帶病人去醫院。
但係，的士司機依然堅持己見，甚至打開救護車後門，同救護車司機講：「病患死嘅話由我（的士司機）負責，你呢度連（睇落）係緊急嘅病人都冇，係故意想走姐」。
佢不但口出狂言，甚至影底病人嘅樣。
直到其他救護車趕到現場，已經係10分鐘之後嘅事，病患早已休克。
來源：newsis
抵達急診室搶救後，呢名請願者嘅母親喺五個鐘後不幸離世。
呢件事已進入調查階段，但罪名可能相當輕。
所以請願人將呢件事上傳去青瓦台網站，希望增加懲戒，避免再有任何一個病患因為惡意攔車而延誤送院嘅時間，甚至最後死亡。
阻攔救護車嘅罪名？
來源：중앙일보
呢名的士司機如果係違反〈消防基本法〉：妨礙消防車、救護車救援，就可處以200萬韓元以下罰款；
但如果佢係違反〈急救醫療法〉，妨礙急救醫療業者救助、運送、緊急處置等行為，就可處以5年以下徒刑，或暫5千萬韓元以下罰款。
目前只可以確定的士司機妨礙救護車救援，佢同病患死亡有冇關係呢一點仍然需要調查。
調查後確定的士司機阻行令病患死亡嘅話，佢就會會有過失致死嘅嫌疑。
韓國警方目前唔排除任何可能性，積極展開調查，先以妨礙公務立案，再調查呢名的士司機有冇違反刑事法。
警方最後表示已為的士司機、救護車司機、死者家屬同醫療人員落口供。
法律界人士認為，的士司機講「患者死咗我負責」呢一句係韓國人特有嘅反語法，恐怕可以成為佢否認故意犯罪（冇意識到患者可能會死亡）嘅依據。
✨馬上Follow我哋IG
instagram.com/creatrip.hk
| 其他延伸閱讀 | |
 選手之死引眾怒 |  韓國吸煙原因 |
