Hello，大家好，我哋係由韓國人每日提供最新韓國旅行資訊嘅Creatrip。
根據資料顯示，15歲以上嘅韓國男性有32%每日都會食煙，而15歲以上嘅韓國女性，就有3.5%每日都食煙， 呢個比率令韓國成為OCED國家入面第二多吸煙人口嘅國家（僅次於土耳其）。到底係有咩原因令韓國人，尤其係韓國男性嘅吸煙人口咁多呢？
***吸煙有損健康***
男性比女性食煙人口多
news1
韓國男女食煙人口嘅數量有好明顯嘅差距，咁係因為社會對食煙嘅女性有好大偏見，喺深受儒教影響嘅韓國社會，佢哋覺得男人可以做嘅，唔等於女人都可以做，部份女性指出，佢哋喺街食煙會受陌生人指責，所以要企喺比較隱閉嘅地方食，佢哋仲唔會同男朋友講自己有吸煙習慣，見面之前會噴香水或者刷牙去辟煙味。
大家嚟到韓國，應該都會見過有人食煙，由於食煙人口持續上升，韓國政府推出咗一系列降低吸煙率嘅規定。
包括：唔可以向未成年人出售香煙、唔可以喺公共場所食煙、只可以喺指定區域食煙等等。
韓國人食煙原因
1. 食煙可以減少壓力
韓國人喺社會上要承受各種壓力，學校、屋企、職場，四方八面嘅壓力令佢哋透唔到氣，於是韓國人就希望透過食煙緩解壓力，大家之後可以留意下好多上班族會喺lunch time圍埋吸煙。
2. 當兵一定要食煙
小編有朋友喺當兵之後先開始食煙，佢哋話喺軍隊，上級叫你一齊去食煙，好難拒絕，拒絕嘅話會得罪前輩，喺軍隊嘅生活就如同地獄。
3. 好奇
小編聽講有人一開始吸煙，只係出於好奇心，點知食咗一次就慣咗，慢慢就養成呢個習慣。
除咗以上幾點，小編個人覺得韓國煙價錢平都係一個好重要嘅原因，部份牌子₩4,000-5,000就有一包（港幣28至35左右）。
所以佢哋即使有食煙習慣，都唔會因為咁造成好大嘅經濟負擔，雖然食煙係個人選擇，但長遠對自己同身邊人嘅身體都有壞影響，大家又點睇呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
