韓國人私藏揀韓牛小貼士/攻略

Hello，大家好，我哋係由韓國人每日提供最新韓國旅行資訊嘅Creatrip。

唔知道大家嚟韓國有冇食過韓牛呢？通常講起韓牛，大家都會首先諗起馬場洞，不過去到要自己揀肉，唔知點樣嘅牛肉先叫靚？今日小編搵嚟韓國同事教大家要點揀韓牛，到底分幾多個等級？有咩部位必食？

🔎韓國必食韓牛餐廳推薦

首爾仲有咩好食？

韓國人私藏揀韓牛小貼士

韓牛歷史淵源

《朝鮮牛馬醫方》

「韓牛」呢個詞語喺1399年出現，韓國第一本獸醫學書《朝鮮牛馬醫方（조선우마의방）》就有提及到！但係其實去到2004年，韓國先開始記錄各種韓牛嘅數量，而去到2011年，韓國人更加利用基因技術重新培養部分已經滅種嘅韓牛！

喺韓國養殖嘅牛就係韓牛？

喺韓國養殖嘅牛唔一定係韓牛！根據品種、產地與牛隻用途，韓國嘅牛分成韓牛（한우）、肉牛（육우）同奶牛（젖소）。

韓牛有限定品種、產地同養殖方式；而肉牛就有分韓國產跟外國產（冷凍牛肉），而所謂嘅韓國產肉牛，只要喺韓國飼養超過6個月，就算係海外品種牛隻都可以被稱為韓國產，不過因為品種唔同，所以唔可以叫做韓牛；而奶牛顧名思義就係生產牛奶嘅牛。

所以大家唔可以因為牛隻標示係韓國產就當佢做韓牛，韓牛一定要有等級同產地標示，並且通過韓國農林畜產食品部認證，養殖方式方面都要符合標準，先算係真正嘅韓牛。

韓牛有幾多個等級？

各國牛肉肉質等級

韓牛根據等級分為五種，同美國牛、日本牛等級比較起大約會係上面呢個表咁。

好多韓國人都認為，最高等級嘅1++韓牛好食過日本和牛，但亦都有部份人覺得真正嘅A5和牛係最好食嘅牛肉，不過因為韓牛同和牛無論係脂肪定肉質都完全唔同，所以好難比較。

헬스조선

不過比較特別嘅係，如果係以日本嘅BMS（牛肉脂肪交雜基準）來看，1++等級嘅韓牛最多得BMS 9等，而A5和牛可能會高達12等。由此可見，韓牛其實唔會好似和牛咁多油脂，但係喺肉質同口感上就完全係另一個level！

韓牛肉量等級

韓牛等級分為肉質等級同肉量(肉:脂肪比例)等級，肉質等級會係數字（1++最高、3最低），而肉量等級就會係英文字母（A最高、C最低），大家揀韓牛嘅時候可以參考吓！

所以最靚嘅韓牛等級除咗有1++，仲有1++A、1++B同1++C；跟住就係1+A、1+B、1+C，如此類推。

一般喺大型超市買牛肉，最多只可以搵到1+等級，想食1++甚至係1++A嘅韓牛，就要去馬場洞畜產市場或者比較高檔嘅餐廳。

韓牛部位要點揀？

無論係咩牛肉，每個部位都各有各擁躉！如果係燒韓牛，通常大家都會揀里脊/西冷（등심）、牛柳（안심）、板腱肉（살치살）同排骨（갈비）。

如果鍾意食油脂香味比較重嘅部位，推薦大家叫雪花里脊/西冷（꽃등심）。而小編覺得比較令人驚艷同特別嘅係板腱肉，燒嘅時候會有淡淡嘅牛油香！

而喺韓國食韓牛，並唔一定要燒嚟食。例如有時候大家可能會喺餐廳見到賣「韓牛排骨湯」，通常都會好食過普通排骨湯，不妨可以一試（當然相對地價錢都會貴啲啦）！

韓牛喺邊度食最好？

想用比較平嘅價錢食高質韓牛嘅話，一係就去盛產韓牛嘅地方，一係就去畜產市場，呢度嘅價錢都會平過去普通韓牛餐廳食！

首爾馬場洞畜產市場

• 地址：서울 성동구 고산자로 344
• 前往方法：龍頭站（용두역）4號出口；往十里站（왕십리역）3號出口

首爾最大嘅韓牛市場位於馬場洞，呢度主要分成兩種營業模式，一種係直接去餐廳叫一份份肉食（都係可以用批發價食到）；另一種就係先喺一樓嘅肉檔揀好肉，再由肉檔老闆帶大家去相熟餐廳。

呢度大部份肉檔同餐廳都已經有一定歷史，亦都經過韓國農林畜產食品部認證，最正嘅係可以自己揀食咩等級嘅肉，包你一定唔會洗冤枉錢！

不過大家要注意，喺馬場洞餐廳食韓牛嘅話，除咗韓牛本身嘅價錢，仲要俾一筆開檯費用（通常會包括蔬菜、醬料、燒板、水等等）。想喺首爾食韓牛嘅話，大家可以考慮嚟馬場洞！

🔎馬場洞韓牛真實食評

江原道橫城郡

江原道「橫城」被譽為韓牛嘅故鄉，亦都係韓牛最大產地，基本上全韓國嘅韓牛，有一半以上都係來自橫城郡！如果想食到最新鮮嘅韓牛，不妨嚟返轉江原道之旅！

全羅道長水郡

長水郡亦都係著名韓牛產地之一，呢度以水源乾淨聞名，亦都係孕育韓牛嘅重要城市。韓國有一部分餐廳嘅韓牛，係由長水每日新鮮運嚟，食落一樣味道香濃、口感好又juicy！

以上係小編幫大家整理嘅揀韓牛攻略，因為韓牛本身比較貴，所以相信唔少朋友都會怕洗咗筆大錢但係會中伏。大家去食韓牛之前不妨可以參考今日呢篇blog！

如果有更多想知嘅內容，都可以隨時留言或者dm話俾我哋知：）

✨Instagram：creatrip.hk

🔎Facebook：Creatrip 帶你認識韓國每一面

Mail：help@creatrip.com