Hello，大家好，我哋係由韓國人每日提供最新韓國旅行資訊嘅Creatrip。
唔知道大家有冇追開《GOING SEVENTEEN》呢？小編身邊有好多朋友就算唔係CARAT都好鍾意睇！其中一集SEVENTEEN就去咗位於孔德嘅「賣烤腸的烤肉店」，節目播出之後有好多Fans都專程去食，到底味道又係點㗎呢？今日就等小編帶大家去睇吓啦！
孔德「賣烤腸的烤肉店（곱창 파는 고깃집）」
孔德「賣烤腸的烤肉店」資訊
- 地址：서울 마포구 마포대로 173-14 마포센텀슬로우스퀘어 401호
- 營業時間：15:00 - 22:00（Last Order 21:00）、逢星期一休息
- 小Tips：兒嶺站（애오개역）1號出口行6分鐘
孔德「賣烤腸的烤肉店」介紹
「賣烤腸的烤肉店」係一間買烤腸同燒肉嘅餐廳，呢度仲可以飲到8款生啤，啱曬同朋友一齊嚟！
相信CARAT們對呢間餐廳一定唔陌生！SEVENTEEN之前拍《GOING SEVENTEEN》嘅時候曾經嚟過呢度，而餐廳老闆喺節目播出之後亦都有喺網上share當時嘅趣事，令fans們更加想去朝聖！所以呢度食飯時間真係好多人，如果餐廳滿座嘅話亦都會限1.5小時之内就要食完，所以建議大家儘量避開lunch/dinner時間。
鋪頭由內到外都擺滿曬SEVENTEEN嘅應援物，𨋢門一打開就會見到佢哋嘅海報、相同公仔，Fans嚟到一定會超興奮！
餐廳亦都會不斷播住SEVENTEEN嘅歌，小編當日去食飯都見到有唔少來自世界各地嘅CARAT！
呢度亦都有為Fans們準備「CARAT套餐」，包括有菜乾湯飯同酸泡菜湯飯可以揀，係唔係好有儀式感呢~
呢度嘅小菜全部都需要自己攞，款式都算多。（餐盤架上面仲有成員THE 8喺度歡迎大家XD）
綜藝《GOING SEVENTEEN》
之前睇節目見到SEVENTEEN成員們食到lamlam脷，搞到小編都好期待！
影完相、攞埋小菜之後，就可以開餐啦！呢度嘅腸類餐點都最少要叫2人份或以上（可以mix埋），叫完之後職員就會嚟幫大家燒，大家只要等食就得！
韓牛大腸（한우대창）₩25,900/200g
韓牛大腸加埋食燒腸必備嘅韭菜、雞脾菇、薯仔等等超香口，不過可能食到最後大家可能會覺得有少少漏，建議大家可以配其他小菜或者叫個飯/海鮮公仔麵一齊食。
豬大腸（막창）₩25,900/200g
豬大腸食落唔油，不過同小編印像當中嘅口感有啲唔同。如果下次再有機會嚟，小編可能會叫燒肉或者其他menu試！
雖然嘢食味道冇想像中咁好食，不過入面真係有好多可以影相同打卡位，各位CARAT不妨帶埋小卡嚟朝聖啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
