韓國明星最愛餐廳
韓星都不斷Encore嘅餐廳！跟住韓國藝人食好西啦！
Hello，大家好，我哋係由韓國人每日提供最新韓國旅行資訊嘅Creatrip。
韓國有好多明星都係美食家，去親嘅餐廳都有信心保證！今日小編幫大家整理咗一連串韓星經常去嘅餐廳，大家記住要save低，下次跟住韓國藝人嘅足跡，食盡韓國！
想去首爾、釜山、濟州最hit餐廳/Cafe但唔想排隊？
買一套即享人氣店鋪即時入場 + 獨家優惠！
韓國明星最愛餐廳
1. 金豬食堂（금돼지식당）
- 地址：서울 중구 다산로 149
- 營業時間：11:30 - 23:00（Last Order 22:15）
- 到訪明星：BTS 柾國、BTS Jimin、BTS V、EXO SuHo、少女時代 潤娥
NAVER @hg_7033
講起最近呢兩年最hit嘅燒肉鋪，一定唔少得「金豬食堂」！呢度經常未開門出面就排曬長龍，門口嘅牆上面都貼滿曬Idol同明星相，特別係BTS柾國同EXO等等都係呢度嘅熟客，Fans們一定唔可以錯過！
帶骨五花肉（본삼겹）₩19,000/150g
呢度嘅豬肉比起其他餐廳口感更加好，而且油花分佈得好靚又juicy！而且呢度嘅職員會由頭到尾幫大家用炭火燒肉，保證大家可以食到最juicy最嫩滑嘅肉~
2. 合井烤肉店（합정고깃집）
- 地址：서울 마포구 양화로1길 21
- 營業時間：星期一至五 16:00 - 00:00、星期六 15:00 - 00:00（逢星期日休息）
- 到訪明星：全昭旻、李光洙、樂童音樂家、WINNER 姜昇潤、WINNER 李昇勳、朴海日
位於合井站附近嘅「合井烤肉店」都係韓國藝人經常會去嘅餐廳之一，鋪頭入面有超多明星嘅簽名，例如李光洙、樂童音樂家同WINNER姜昇潤等等。
拼盤B（모듬B）₩45,000
雖然唔係話多明星簽名就一定好食，不過小編可以保證絕對唔伏！呢度嘅牛肉係美國Prime等級，每款都肉味濃夠juicy。
除咗燒肉之外，大家仲可以另外叫泡菜湯、韓式蒸蛋、紫菜飯糰等等一齊食！跟餐仲會有辣拌葱絲、醃洋蔥、海鹽同呢度嘅獨家青陽辣椒蒜蓉醬，建議大家可以點肉嚟食，可以幫手解膩~ 想知道韓國明星鍾意食嘅燒肉係咩味，就要嚟「合井烤肉店」試試啦！
3. 松雞屋 狎鷗亭店（송계옥 압구정점）
- 地址：서울 강남구 선릉로161갈 34
- 營業時間：星期一至五 16:00 - 22:30、星期六至日 15:00 - 22:30（Last Order 21:30）
- 到訪明星：宋江、黃旼炫、Red Velvet Seulgi
講起最近突然爆紅嘅韓國餐廳，一定唔少得位於狎鷗亭嘅炭火燒雞專門店「松雞屋」！宋江亦都係呢度嘅熟客，門口亦都有佢嘅簽名。
松雞屋什錦拼盤（송계옥 모둠 한판）₩44,000/2~3人份
「松雞屋」最特別嘅係可以食到雞嘅各種特殊部位，呢款什錦拼盤就包括有平時大家食開嘅雞柳同鹽燒雞脾肉，仲有雞心、雞腎、雞軟骨同雞頸！
伯爵茶High Ball（하이볼 얼그레이） ₩8,500
呢度最出名嘅除咗燒雞，仲有喺好多韓國節目都出現過嘅伯爵茶High Ball，連宋江都一試愛上！另外幾款主食味道都唔錯，大家可以配住一齊食！
4. 賣烤腸的烤肉店（곱창파는고깃집）
- 地址：서울 마포구 마포대로 173-14 401호
- 營業時間：15:00 - 22:00（Last Order 21:00）、逢星期一休息
- 到訪明星：SEVENTEEN
綜藝《GOING SEVENTEEN》
如果你係CARAT，咁就一定聽過呢間餐廳！SEVENTEEN嘅團綜《GOING SEVENTEEN》就係喺呢度拍㗎啦~ 節目出街之後呢度成為咗Fans朝聖勝地，老闆亦都會同Fans們分享拍攝當時嘅趣事，鋪頭入面更加擺滿SEVENTEEN嘅應援物品，𨋢門一打開就會見到佢哋嘅海報同相！
豬大腸（막창）₩25,900/200g
韓牛大腸（한우대창）₩25,900/200g
呢度嘅腸類餐點都最少要叫2人份或以上（可以mix埋），叫完之後職員就會嚟幫大家燒，加埋食燒腸必備嘅韭菜、雞脾菇、薯仔等等，超香口！不過小編個人覺得整體嚟講口感有啲韌，唔算太推薦...大家如果打算嚟，不妨試吓燒肉，記住share埋俾小編知好唔好食啦~
5. 永東橋家（영동교집）
- 地址：서울 강남구 선릉로148길 11
- 營業時間：11:00 - 23:40（Last Order 23:20）
- 到訪明星：EXO世勳、伯賢、Kai、少女時代、SHINee、東方神起
「永東橋家」係一間喺韓國人同藝人心目中超出名嘅燒肉店。 因為鋪頭店面唔算太大，聽講只要一到夜晚就要至少等一個鐘先可以入到...所以如果之後有興趣嘅朋友，建議可以早少少到。
咁多藝人都去食過嘅「永東橋家」燒肉店，大家如果之後嚟韓國想撞到韓星，話唔定都可以碰吓運氣，話唔定可以喺度見到
6. 秋風嶺刀五花肉（추풍령칼삼겹살）
- 地址：서울 강남구 도산대로51길 41
- 營業時間：星期一至五 11:30 - 23:00（Lunch Break 14:00 - 17:00）、星期六 16:00 - 23:00、逢星期日休息
- 到訪明星：EXO、TWICE、GFRIEND、SHINee、CNBLUE、Super Junior、Wonder Girls、NCT等
「秋風嶺刀五花肉」附近因為有SM同FNC等等嘅經紀公司，所以很多明星都有嚟食過！
就咁睇相，係咪都流晒口水呢？店員會幫大家將每嚿肉燒成金黃色，外脆內Juicy~
7. 大海食堂（바다식당）
- 地址：서울 용산구 이태원로 245 2F
- 營業時間：11:30 - 22:00（逢第一、三、五個星期一休息）
- 到訪藝人：BIGBANG 太陽、GD、BLACKPINK、BTS RM、張根碩
「大海食堂」位於梨泰院，行上餐廳條樓梯兩邊有超多明星簽名！
呢度嘅Menu非常簡單，小編最推薦部隊鍋！呢度嘅部隊鍋味道濃，食落唔會太辣，而且非常足料，加埋芝士真係一流！
8. 崔社長家的雞（최사장네 닭）
- 地址：서울 마포구 연남로 4-1
- 營業時間：11:00 - 22:00（逢星期四休息）
- 到訪明星：申東燁、黃致列、金峻鉉、柳炳宰
「崔社長家的雞」係雞肉料理專門店，最招牌嘅係辣炒雞湯！鋪頭外觀非常有韓國傳統風情，因為有好多藝人都嚟過，所以非常受韓國人歡迎！
辣炒雞湯2-3人份（닭볶음탕2-3인분）₩24,000
一鍋入面有好多雞肉、薯仔同大葱，非常入味！小編推薦大家可以將薯仔煮腍少少，然後加少少湯撈飯食，咁就可以一啖食到辣炒雞湯嘅精華啦！
9. 三巨里肉鋪（삼거리 푸줏간 센트럴시티점）
- 地址：서울 서초구 사평대로 205
- 營業時間：11:30 - 22:00（Lunch Break 15:00 - 16:00）
- 到訪明星：BLACKPINK、WINNER、李昇基
「三巨里肉鋪」鄰近江南，交通方便，好多韓國YG藝人成日都會去，鋪頭入面都有好多簽名~
食燒肉一定要配燒蒜頭同雞脾菇！全部都燒得勁香口，唔怪得有咁多熟客啦！
10. 17 Pizza
- 地址：서울 동대문구 회기로21길 22
- 營業時間：星期一至五 11:30 - 20:30、星期六 11:30 - 16:00（逢星期日休息，賣曬嘅話會提早收鋪）
- 到訪明星：白種元、車銀優
大家之前去回基好多時都係去慶熙大學賞櫻，不過喺附近其實都有唔少美食~ 「17 Pizza」喺韓國綜藝節目《白種元的胡同餐館》第54集出現過，當時係韓國美食家兼商人白種元同車銀優一齊去食㗎！
去之前小編都有做足功課，睇吓銀優同白老師食咩Pizza跟住一齊叫。當時佢哋叫咗蝦仁煙肉玫瑰醬Pizza、Ricotta芝士明太子Pizza、蟹肉忌廉醬Pizza同辣肉腸Pizza。不過可能因為太遲去，當時得返Ricotta芝士明太子Pizza同辣肉腸Pizza，有啲可惜。如果大家有機會去，記住話俾小編知其他味好唔好食啊！
11. Pizza Express
- 地址：서울 강남구 압구정로10길 28 B1
- 營業時間：12:00 - 22:30（Last Order 22:00）
- 到訪明星：劉在錫、Jessi、TXT秀彬
各位MOA應該都知道秀彬有曾經嚟過「Pizza Express」~ 除此之外，韓國國民MC劉在錫主持嘅《玩什麼好呢?》也曾經喺呢度進行過拍攝！
裝修非常有美國風情，不過因為入面座位唔多，所以建議大家要提早少少到！
呢度最正嘅係可以單叫一塊Pizza，就算係自己一個人食都冇問題！而且份量都夠大，叫埋小食一定夠飽~
12. Waikiki Market
- 地址：서울 마포구 마포나루길 332
- 營業時間：11:30 - 23:30
- 到訪明星：GOT7
「Waikiki Market」位於漢江附近，係首爾一間好出名嘅戶外餐廳，二樓有好多圓頂帳篷，可以一邊食BBQ、一邊欣賞漢江景色。同時呢度都係GOT7拍攝MV嘅地方，各位I GOT7不妨可以嚟朝聖！
可以喺漢江邊食燒肉、欣賞靚景，真係好寫意！推薦大家可以同家人朋友一齊嚟~
13. Krap Pom（까품）
- 地址：서울 강남구 선릉로153길 18 B1
- 營業時間：星期一至五 11:30 - 22:00、星期六至日 11:30 - 23:00
- 到訪明星：BLACKPINK Lisa、Sorn、(G)I-DLE Minnie
「Krap Pom」係一間泰國餐廳，裝修雖然唔精緻，不過鋪頭入面嘅電視會播泰國節目，亦都會播泰文歌，加上泰文廣告、海報同鐵枱膠櫈，令人好似置身於泰國夜市咁！
BLACKPINK Lisa、Sorn、(G)I-DLE Minnie等等喺韓國出道嘅泰籍IDOL都有親自嚟食過，佢哋全部都話呢度嘅嘢食夠曬正宗，鍾意食泰國嘢嘅朋友們絕對唔可以錯過！
14. Ossu Seiromushi（오쓰세이로무시）
- 地址：서울 송파구 백제고분로45길 30
- 營業時間：11:30 - 22:00（Lunch Break 15:00 - 17:30）、逢星期日休息
- 到訪明星：BTS Jin
「Ossu Seiromushi」由BTS Jin親生阿哥經營，整體裝修非常有日式風格，雖然鋪頭唔大，不過完全唔會覺得翳焗。
呢度嘅招牌Menu係「Seiromushi」，即係將各種蔬菜同肉放喺木蒸籠入面蒸住食嘅日本料理，兩人set入面包括豬肉片、韓牛片、南瓜、菇、白菜、大蔥等，好味得嚟夠曬健康！
15. DONJUDA（돈주다）
- 地址：서울 강남구 영동대로138길 9
- 營業時間：星期一至五 16:00- 23:00、星期六至日 14:00 - 23:00
- 到訪明星：GOT7 MARK、有謙
「DONJUDA」餐廳環境非常闊落，有好多落地窗，夠曬通風，所以食完燒肉都唔會成身味！呢度係GOT7 MARK同有謙超鍾意去嘅燒肉鋪，佢哋仲曾經喺度開過直播添！
燒到金黃色嘅肉配上泡菜同芽菜，點埋鋪頭獨家醬汁真係一流！如果覺得燒肉太油膩，建議可以配埋醃洋蔥食~
16. Art Monster（아트몬스터 강남역점）
- 地址：서울 강남구 테헤란로1길 28-3
- 營業時間：星期一至五 17:00 - 01:00、星期六 15:00 - 01:00、星期日 15:00 - 23:00
- 到訪明星：嚴正化、李孝利、Jessi、華莎
大家可能冇聽過「Art Monster」呢個名，不過就一定會喺韓國電視節目入面見過佢！呢度裝修到好似香港咁，四周圍都係招牌同霓虹燈，同時係「退貨遠征隊」拍MV嘅地方，所以有唔少人就算唔飲酒都會專程嚟打卡！
無論炸雞定Pizza味道都唔錯，非常啱送酒！
以上就係小編為大家整理出嘅韓國明星最愛餐廳，大家如果想跟住韓星嘅腳步食好西，就記住要save低呢篇blog啦！如果怕太受歡迎要等好耐，大家都可以考慮買「Creatrip特快通行證&優惠券」，大大縮短排隊時間，仲有額外優惠，唔好錯過啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com