Hello，大家好，我哋係由韓國人每日提供最新韓國旅行資訊嘅Creatrip。
韓國中央災難安全對策本部今日（1月20號）宣佈，韓國將會由1月30號開始解除室內口罩令，大家嚟玩嘅時候唔單止室外，連喺室內都可以唔洗戴口罩啦！到底點解韓國政府會選擇喺呢個時候解除室內口罩令，又有冇咩地方仲係一定需要戴口罩嘅呢？
-最新消息（2024.04.22）-
韓國政府早前宣佈，由5月1號開始，高危地方嘅室內口罩令（如一般藥局、醫院等）解除，不過仍然建議高危人士同有新冠肺炎相關症狀人士保持戴口罩，減低風險。
韓國解除室內口罩令（2023.01.30起）
서울신문
韓國防疫當局上年12月經過討論之後，曾經公佈咗4個解除室內口罩令嘅條件，分別係1) 每個星期新增確診人數需要連續兩個禮拜減少、2) 重症患者及死亡率減少、3) 4星期內重症患者可用病床維持於50%或以上、4) 高齡人士及高危人士疫苗再接種率上升，表示只要滿足以上其中兩項就可以分階段解除室內口罩令。
국제뉴스
根據韓國政府公佈嘅數據，韓國新增確診人數由12月第四個禮拜嘅458,709人減少1月第1個禮拜嘅 414,614人，而喺1月第2個禮拜亦都跌至300,563人。另外重症患者及死亡率有明顯減少跡象，重症患者可用病床率亦都維持喺50%以上。
SBS
因為除咗高齡人士疫苗接種率未達標，而家韓國已經成功符合其餘3個條件，所以中央災難安全對策本部喺今日（1月20號）經過討論後宣佈，由1月30號起除藥局、醫院、公共交通工具等傳染風險高嘅地方，大部分室內地方都會解除口罩令，唔需要再強制戴口罩。
MBC
最近世界各地都陸續開關，越嚟越多人嚟韓國旅行，輸入個案急增，所以韓國政府曾經一度對解除室內口罩令持保留態度。而且由於韓國新年期間人口流動頻繁，政府亦都選擇延遲解除時間，最後決定喺1月底正式實施政策。
大家下次嚟韓國就可以唔洗強制戴口罩啦！雖然室內口罩令已經解除，但係小編都建議大家喺多人嘅地方同高危地方戴住口罩，減少感染風險。
如果有更多想知嘅內容，都可以隨時留言或者dm話俾我哋知：）
Instagram：creatrip.hk