韓國創新戀愛真人show
韓國戀愛真人show到底有咩咁好睇？梗有一款題材你會鐘意！
Hello，大家好，我哋係由韓國人每日提供最新韓國旅行資訊嘅Creatrip。
而家韓國嘅綜藝越嚟越創新，特別係近呢兩三年不斷推出一啲題材比較特別嘅戀愛真人show，例如分咗手嘅情侶再同居、準備分手嘅情侶要住埋一齊但可以同其他人約會，甚至連比較敏感嘅同性戀都有。今日就等小編為大家逐一介紹啦！
韓國創新戀愛真人show
1. 《換乘戀愛》
뉴스1
티빙
第一套想同大家介紹嘅係《換乘戀愛》，小編身邊唔少香港朋友都有一齊追緊，甚至一齊討論。
instagram: tvn.asia
呢套戀愛真人show請嚟已經分咗手嘅情侶再同居，喺一開始嘅時候大家唔可以公開自己前度係邊個，合宿期間互相了解之後，決定究竟要同前度復合定係發展新戀情。
디스패치
티빙
承接上一季嘅人氣，《換乘戀愛》第二季喺今年（2022年）暑假開播，令好多粉絲們都非常興奮，最後一集嘅收視率仲曾經一度達到98% ，可以話係全韓國都好關注呢個節目。
2. 《Change Days》
上次介紹韓國創新綜藝節目主題嘅時候都有同大家講過呢個節目，佢同《換乘戀愛》唔同嘅係，出演呢個節目嘅人全部都係未正式分手，或者正面臨分手嘅情侶。參加者喺節目入面可以同其他異性約會，同時亦都要同現任同房瞓，透過同其他人相處重新思考自己同而家嘅另一半之間嘅關係同感情。
머니투데이
呢套節目已經出到第二季，同樣受到好多觀眾歡迎，討論度亦都非常高。如果大家係參加者，你又接唔接受到呢種玩法呢？
3. 《Love Catcher》
Daum
《Love Catcher》暫時出咗三季，節目請嚟五男五女一齊同住（男一幢、女一幢），共同歷經八日七夜。一開始入住前大家要先揀一個身份，分別係「Love」，代表入去同住期間希望搵到另一半，或者係「Money」，代表入去只係為咗錢而唔係想搵真愛。
오마이뉴스
參加者唔會知道對方嘅隱藏身份，喺同住期間可以同異性溝通，互相了解，最後一日再作出選擇。而最終互相選擇嘅男女當中，如果兩個人都係揀咗「Love」，就代表兩個人節目後會有機會發展落去，同時劇組仲會送一對「情侶戒指」俾佢哋；如果兩個人都係揀咗「Money」，咁就會冇錢亦冇愛；但如果一個揀咗「Love」，一個揀咗「Money」嘅話，揀「Money」嘅人就可以獨贏5,000萬韓幣（約HKD350,000）。
조선일보
全新一季將會喺11月中推出，參加者去到巴厘島進行拍攝，當中又會擦出點樣嘅火花，又有冇人真係可以喺度搵到真愛？
4.《Heart Signal》
뉴스1
講起韓國戀愛真人Show，絕對唔少得《Heart Signal》。呢套戀愛真人show總共拍咗3季，請嚟8位年輕男女一齊同住一個月，佢哋嘅互動有時真係會令人睇到好心動！
서울경제
除咗睇參加者之間擦出嘅火花，大家仲可以同主持人一齊估吓每位參加者會揀邊位異性！如果主持人估啱咗，就會得到一粒愛心鑽石，一粒鑽石相當於50萬韓幣（約HKD35,000）。主持人要將佢哋一直累積到最後一集，同時要答對最後一集嘅題目，先可以將鑽石換成現金。
채널A
而製作團隊最近正式募集緊下一季嘅參加者，大家可以期待下年（2023年）嘅全新一季！
5.《單身即地獄》
네이트뉴스
《單身即地獄》係推出之前就有傳聞係韓版嘅《Too Hot To Handle》，參加者們嚟到一個荒島上尋找真愛，而要順利配對成功先可以離開呢座島。
픽콘
呢套節目其中一個看點就係參加者顏值都非常高，而且內容亦都非常緊張刺激，隨時都會產生變化。
하입비스트
同《Heart Signal》一樣，製作團隊已經招募緊下一季嘅參加者，睇嚟好快就會有新一季睇啦！
6.《我是Solo》
SBS
接住落嚟呢套《我是Solo》，睇到個節目名都知道係單身人士出嚟搵另一半嘅節目，而大部分參加者都係以搵結婚對象為目標出演。呢套節目嘅特點係比較貼地同現實，節目標榜係一套超級寫實主義嘅戀愛真人show，比起上面介紹嗰幾套，《我是Solo》嘅參加者年齡層偏高，而且進行方式亦都比較簡單。
머니투데이
節目播出一年，已經進行咗11期，而每期主題都唔一樣，例如第10期就邀請咗曾經離婚嘅男女參加。呢套節目仲成全咗好多對情侶，當中仲有結埋婚嘅情侶添啊！
7.《按照各自的本能》
티빙
呢套節目邀請咗四男四女嚟參加，四位男參加者係嚟自同一個學校社團嘅好朋友，而四位女參加者就係大學同系嘅好朋友。睇到呢度應該都知道，呢套戀愛真人Show係考驗參加者到底要跟住自己個心追求愛情，定係要因為友情而放棄愛情。
tvN
選擇放棄友誼嘅參加者，就要除低入住宿舍嘅時候戴住嘅友情戒指。大家又會唔會為咗愛情而放棄友誼呢？
8. 《男人們的戀愛》
웨이브
大部分戀愛真人show都係以男女之間嘅感情做主題，而《男人們的戀愛》呢套節目邀請咗八位男同性戀參加者，睇吓佢哋喺合宿期間會擦出幾多火花，產生啲咩感情。
웨이브
始終呢套節目係韓國第一套以同性戀做主題嘅戀愛真人show，一開始唔少人都會覺得有少少唔習慣，不過亦都有人覺得呢個題材比較破格，比起千篇一律嘅戀愛真人show有趣得多。大家又點諗呢？
9. 《只是睡覺的關係》
웨이브
見到個節目名，相信大家都會呆咗，真係會有咁嘅戀愛節目？呢套節目係今年（2022年）新出嘅戀愛真人show，一開始大家全部都著住睡衣登場，參加者如果約會配對成功，嗰晚就要瞓埋喺同一張床度。
스타뉴스
「一齊瞓一晚再決定要唔要拍拖」，你又接唔接受到呢種戀愛方式呢？
10. 《Pink Lie》
조선일보
隨住年紀增長，無論係搵男女朋友，定係搵結婚對象，都開始越嚟越多要求。而每一個人都可能會有一個秘密，令對方一知道就會卻步。《Pink Lie》邀請咗10位男女一齊合宿，而合宿期間大家唔可以主動公開自己嘅秘密，希望佢哋要先以一個冇偏見嘅態度認識異性。
Disney+
呢套節目好睇嘅地方在於除咗可以喺過程中估每個人嘅秘密係乜之外，仲可以觀察到每個人嘅內心變化，到底每個人嘅秘密會唔會影響到參加者對對方嘅感情呢？
서울경제
節目暫時播到中段，已經公開咗幾位參加者嘅秘密，有人屋企係養牛嘅，有人曾經拍過成人電影... 如果大家發現自己嘅另一半收埋咗呢個秘密，你又會有咩反應呢？
每一套都各有睇頭，唔知大家又有冇追緊邊一套呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
