韓國創新綜藝節目主題
近年韓國綜藝有唔少新嘗試！分咗手再同居？喺前度面前同另一半約會？
Hello，大家好，我哋係由韓國人每日提供最新韓國旅行資訊嘅Creatrip。
平時講到韓國綜藝，大家可能最先都會諗到《Runningman》、《新西遊記》、《認識的哥哥》、《玩什麼好呢》等，不過呢幾年綜藝都有唔少嘅新嘗試，最緊韓國好興將就分手/已經分咗手嘅情侶聚集埋喺同一間屋，之後再睇佢哋相處，或者會唔會有可能發展新嘅戀情等，相當大膽，而家就等小編為大家介紹，有邊幾套特別綜藝啦！
韓國創新綜藝
正在看着你 (暫譯/지켜보고 있다)
- 主持人：金寶拉
- 開播日期：2021年8月21號
TVING將會喺8月26號推出犯罪真人劇《正在看着你》，以公開日常生活中嘅CCTV做主題，近日推出嘅預告片可以見到係影緊人哋間房、Lift、Office同酒店等日常空間，當中可能會遇到刑事案件，例如約會暴力、性侵、網絡賣淫、職場性騷擾、飯店殺人等。
呢種節目主題相當之創新同驚悚，未開播就已經引嚟唔少話題同爭議，因為韓國平均每日都發生1,300起暴力犯罪，其中30%仲未被發現。節目透過喺日常生活中嘅「第三隻眼」，揭開案發當日嘅蛛絲馬跡，提醒人要對犯罪事件，有可能隨時隨地都會發生。
作為節目唯一主持人嘅金寶拉就講到「犯罪離人唔遠，希望呢個節目可以作為一個生活上嘅警惕」。而呢個將真實社會議題拍成節目，的確為韓國社會大眾帶嚟好多衝擊。
《換乘戀愛》
- 主持人：Simon D、李龍真、金叡園、Yura
- 開播日期：2021年6月25號
- 出演者：高敏英、李可可、李惠善、金普賢、宣浩民、尹正權、郭民在、李周輝
韓國TVING今年推出一套叫做《換乘戀愛》嘅綜藝節目，佢哋請嚟四對已經分咗手嘅情侶再次一齊同住，八個人可以喺同住期間互相了解，最後可以選擇前度或者發展新戀情，不過大家就要望住前度同另一位異性互動，有啲情侶可能只係分開咗短時間，有啲可能好耐。
但《換乘戀愛》就係想帶出每個人都會喺戀愛過程中錯過，之後大家最後選擇分手，整理好之後再搵新一個。
節目一開始係要八個人互相扮唔識對方，之後入住同一間屋，最初連年齡同職業都要保密，每晚可以揀一位留言對象，可以揀前任或者其他異性，最後會再收到一個message係前任有冇揀到自己。除咗出演者會互動之外，主持亦會邊睇出演者嘅互動，一邊進行分析，睇佢哋有冇機會復合或者發展新戀情。
雖然節目嘅概念令到唔少觀眾都受到衝擊，不過小編邊睇呢個節目發現，每一個人嘅愛情觀、需求、想法都好唔一樣。女仔喺失戀嘅時候，鍾意搵姊妹一齊傾，男仔多時都係收收埋埋，擺喺心入面唔太講出嚟，之後再慢慢去用時間沖淡。
因為其中有對情侶已經一齊3年幾，但喺今年2月頭先分開，男方已經調整好心態諗住去面對，但女方就覺得未算係正式分手，兩人成為「最熟悉的陌生人」，小編睇到佢哋喺cafe嘅對話，令到唔少人深同感受，流咗唔少眼淚。
喺現實生活中，的確有唔少情侶都會因為小事而鬧交，慢慢堆積嘅只係厭倦同疲累，感情亦會因為咁而變淡，呢啲時候大家又點去解決呢？分手？定係會諗辦法一齊解決？
最後結果係點亦都令人好好奇，如果大家都有睇呢個節目，又會想揀前度定係選擇新開始呢？
《Change Days》
- 主持人：張度練、梁世燦、許齡智、Code Kunst
- 開播日期：2021年5月18號
- 出演者：姜宇碩、李洪珠、曹聖鎬、李相美、吳振祿、金敏善
《Change Days》同《換乘戀愛》有啲唔同，呢個節目係請嚟三對面臨分手問題嘅情侶出演，六位演出者要喺濟州島一齊生活一星期，到最後一日再揀同前度定係一個新開始，喺一齊生活期間，各情侶都要同房，但同時要同其他異性約會，最後再返宿舍一齊住，呢種節目概念大家又接唔接受到呢？
《Change Days》同樣都請咗4位主持人幫大家一邊睇，一路進行分析。不過節目其中最令人膽戰心驚嘅場景，莫過於節目中廣播響起，第一次由男方選擇想約會對象，第二次就係由女方直接邀約男方，而呢個廣播會直接喺眾人面前講出揀咗邊個，在場嘅六位出演者由眼神到肢體動作都會有各種微妙變化。
唔知到最後，呢三對情侶又會做出咩最後決定呢？
《我們離婚了》
- 主持人：申東燁、金媛熙
- 開播日期：2020年11月20號
- 出演者：李瑩河、鮮于銀淑、崔烤肉、柳藝琳、朴在勳、朴慧英、李漢爾、朴宥善、朴世赫、金俞敏、金東聖、印旼正
《我們離婚了》係以「離婚夫婦再次相聚」為主題，同之前熱門綜藝《我們結婚了》完全相反概念，首播收視率就已經有10.2%，最高收視率更達到14.7%，因為係相當爆嘅主題，所以引嚟唔少熱話同討論。
《我們離婚了》冇要求演出者要進行太多任務，只係單純拍佢哋日常，紀錄曾經組織家庭嘅兩個人，再次重逢後心境上嘅變化。就好似已經離咗婚13年嘅資深演員李瑩河同鮮于銀淑，兩人即使已經係爺爺嫲嫲，但見到對方仲係會想精心打扮，俾對方留一個美好回憶。
節目組有安排兩人背對背講出自己心聲，係最催淚嘅部分。同時節目組仲會問關於兩人先前遇到嘅問題、點解會離婚等問題，再由男女方各自回答，甚至有可能會聽到同一個故事，但有兩種唔同解釋，咁樣可以令當事人明白對方真實感受。就算兩個人盡咗全力，最後迫於無奈分開，令觀眾睇到好心酸同心痛。
因為係關於「婚姻」，太貼近每個人生活，即使係名人，現實中都有好多無法克服嘅問題，《我們離婚了》每一集都令觀眾落淚。
《dolsingles》
- 主持人：李慧英、俞世潤、李智慧、鄭糠雲
- 開播日期：2021年7月11號
- 出演者：金宰烈、朴孝貞、裴秀珍、彬河英、李雅英、鄭允植、崔俊昊、朱成延
《Dolsingles》係由已經結過婚，又恢復單身嘅八位男女出演嘅同居節目，因為係已經離過婚嘅男女再聚埋一齊，所以節目中有好多火熱場面，出演者話題亦相當開放。
節目組公佈兩種海報係有唔同含義，一張遮住出演者面部只影到兩人拖手，呈現心動嘅感覺。另一張強調「兩次都得」、「因為經歷過一次所以感覺做得更好」等字句，呈現出經歷一段婚姻後單身男女，心底最真實嘅說話。
八位男女可以喺山莊揀心動對象，展開同居生活。離過婚嘅男女望落比較放得開、同時亦都係比較跟住感覺去做，正因為佢哋彼此經歷過類似傷痛，所以先更貼近彼此內心。節目亦請到有經驗主持人，一齊分享最現實婚姻議題，令節目變得更有趣。
《隘路夫婦》
- 主持人：崔化精、洪真慶、李龍眞、安善英
- 開播日期：2020年7月27號
《隘路夫婦》係針對已經結咗婚一段長時間，感情已然降溫嘅夫婦，想再次有激情嘅19禁節目。內容討論各種夫妻外遇、婚姻生活、性生活、家庭及姻親問題等各種困難，亦間接睇得出節目嘅尺度好大。
節目分成兩個部分，第一部分係劇情再現。製作組會收集各個觀眾分享，重新詮釋故事、第二個部分係同嘉賓傾夫妻生活，大家嘅討論令唔少觀眾聽完都好震驚。
呢種私人話題居然可以喺節目上大方公開，已婚嘅人睇完都覺得好有同感，未婚嘅人可以睇到冇諗過結婚真實生活嘅一面。每集播出之後，韓國亦都有唔少網民互相討論內容。
唔知以上幾套相當創新嘅綜藝，大家又接唔接受到呢？歡迎大家留言話俾我哋知。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
