韓國最奇特嘅學校
韓國除咗SKY三大學校之外，仲有好多奇特嘅學校！有一間巴閉到佔咗成個島添！
Hello，大家好，我哋係由韓國人每日提供最新韓國旅行資訊嘅Creatrip。
大家都知韓國有好多出名嘅學校，今日小編唔講SKY，而係想同大家分享一啲好奇特嘅學校！一齊睇落去有幾特別啦！
韓國最奇特嘅學校
1. 歷史最悠久嘅學校
校洞初等學校
韓國最耐歷史嘅小學係位於鐘路區慶雲洞 (종로구 경운동)， 1894年9月18號開校嘅「校洞初等學校」 (교동초등학교)。
培材高等學校
培材學堂（東館）
至於歷史最悠長嘅高等學校就係位於江東區高德洞 (강동구 고덕동)嘅「培材高等學校」 (배재고등학교)，係喺1885年8月3號建校嘅！佢嘅前身「培材學堂」仲喺韓國史上教科書上出現添！
2. 國家文化遺產嘅學校
中央高等學校
中央高等學校 西館
6・10萬歲運動紀念碑
有唔少學校某一座大樓列入咗國家文化遺產，而有一間學校嘅本館、西館、東館等等，全部嘅大樓都列為國家文化遺產，呢間學校就係首爾嘅中央高等學校（서울 중앙고등학교）。當中西館仲係創設朝鮮少年軍、6・10萬歲運動、光州學生運動開始嘅地方。
GFRIEND 〈시간을 달려서＞ MV
韓劇《女神降臨》
另外，GFRIEND嘅〈Rough〉（시간을 달려서）MV、韓劇《女神降臨》等都嚟呢度取過景，真係一間又有歷史氣息，又靚嘅學校！
3. 名字奇特嘅學校
仲有一啲學校嘅名讀起上嚟有其他意思，例如「야동초등학교」嘅「야동」（冶洞）係地方名，但係「야동」有另一個意思，係「A片」咁解，學校瞬間變成18禁（？），造成笑話。
「와우중학교」（臥牛中學）嘅「와우」一樣都係地方名，不過就同驚歎時所發出「WOW」嘅音好相似，亦都非常搞笑。不過唔好睇少呢間學校，好似演員徐信愛、女團(G)I-DLE嘅前成員穗珍都係呢間學校嘅畢業生！
大馬初等學校
位於全羅南道大馬面 (대마면) 嘅「대마초등학교」，簡稱為「대마초」，同毒品大麻嘅韓文一樣，俾人取笑話係咪教人種大麻嘅學校。
另外仲有「백수초등학교」（白岫初等學校），「백수」喺韓國另有意思，係指遊手好閒唔做嘢嘅大食懶，配落學校度，真係又諷刺又好笑。
「간디고등학교」（Gandhi High School）嘅「간디」（甘地）、「기린고등학교」（麒麟高等學校）嘅 「기린」（長頸鹿）都令人懷疑創校嘅主人翁同學生對象。
화요일아침예술학교
「화요일아침예술학교」（flower day morning） 係一間以花 (화) 為主題嘅藝術學校，不過「화요일아침」又有星期二朝早嘅意思，令人聯想到係咪淨係星期二朝早先返學嘅學校。
4. 全校得一個學生嘅學校
팔봉초등학교 고파도분교
位於忠清南道瑞山市 (충청남도 서산시) 嘅「八峰初等學校 古波島本校」（팔봉초등학교 고파도분교）全校得一個學生！上課、對功課都係同老師1對1進行！個學生可以好自豪咁講：「我係全校第一名」啊！老師更加冇得抽學號答問題，或者話「你哋班點點點，人哋班點點點」啊
5. 佔晒成個島嘅學校
韓國海洋大學
韓國地大物博，普通嘅學校都大過香港好多，但點諗都諗唔到有間大學佔咗成個島！就係位於釜山影島區（영도구）嘅韓國海洋大學嘅拱形校園（한국해양대학교 아치 컴퍼스），外形非常獨特，校園俾海圍住，學校外圍有環山路，空堂嘅時候就可以去睇海，影靚相！而且唔驚喺島度好唔方便，其實唔使搭船先返到學，而且基本日常需要嘅都可以係島上解決得到。
來源：YouTube@입시덕후
以上卜就係一啲韓國好奇特嘅學校，大家又想去邊間參觀吓呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
