Hello，大家好，我哋係由韓國人每日提供最新韓國旅行資訊嘅Creatrip。

最近香港重播《女神降臨》，唔知大家係支持書竣定係修豪呢？不過無論你哋係邊個派別，下面嘅內容都一定會有興趣，因為小編整理好《女神降臨》嘅拍攝地點整理！大家記得要mark低想去打卡嘅地方，遲啲解禁之後再嚟韓國踩點。

備註：照片來源係tvN《女神降臨》

《女神降臨》拍攝場景

1. YN ANIMA（와이앤아니마）

• 地址：서울 종로구 윤보선길 31
• 營業時間：12:00 - 18:00、逢星期一休息

喺《女神降臨》入面修豪同朱靜都好鍾意去呢間漫畫店，佢就係位於安國站附近嘅「YN ANIMA」。不過其實淨係借咗佢嘅門口嚟影，內景係喺其他地方拍攝。韓屋嘅外觀再配合埋綠色植物同埋溫暖嘅黃光，成個感覺好溫馨，真係好想跟住男女主角一齊嚟呢度打卡。

估計《女神降臨》入面嘅王者漫畫房（왕자 만화방）應該係廠景，真係有啲可惜...小編都想體驗吓喺漫畫店入面食公仔麵！

2. 延世大學（연세대학교）

• 地址：서울 서대문구 연세로 50

大家一定都好好奇，《女神降臨》入面一班主角嘅高中係喺邊度拍攝？呢個咁靚嘅紅色外牆其實就係喺「延世大學」取景，而另一個拍攝地就係鄰近首爾站嘅「孫基禎文化體育中心」。

3. 南道小食 益善店（남도분식 익선점）

• 地址：서울 종로구 수표로28길 33
• 營業時間：11:30 - 21:00

學識化妝嘅朱靜喺轉校嘅第一日已經識到新朋友啦！佢哋仲一齊去益善洞玩，一齊食呢炒年糕，呢間鋪頭喺韓國好出名，而且有好多分店（南道小食北村店），大家下次可以睇吓邊間近啲就去邊間。

南道小食喺益善洞都有分店，連朱靜食完都意猶未盡，無論係辣炒年糕定炸物拼盤，呢啲韓國傳統小食南道小食都應有盡有。以後嚟到韓國，大家記得要跟朱靜、秀貞同秀雅一齊去南道小食食炒年糕！

4. 砰砰娛樂室 益善洞店（콤콤오락실 익선동점）

• 地址：서울 종로구 수표로28길 23-6
• 營業時間：24小時營業

同朋友去旅行梗係要盡情去玩，而呢間砰砰娛樂室同一般香港嘅「冒險樂園」唔同，帶有復古嘅味道，同頭先介紹嘅南道小食一樣位於益善洞。喺到可以玩夾公仔機、跳舞機等等，前排喺韓國人之間都係一個好熱門嘅拍拖勝地。

5. NIN Natural in Nature（닌）

• 地址：서울 종로구 계동길 122-1

朱靜媽咪主理嘅「潘朵拉店」就係位於北村一帶嘅巷仔入面，而且呢間NIN（Nature In Nature）都同《女神降臨》故事設定一樣係經營一啲美容嘅業務。外觀同戲入面一樣有好靚嘅青綠色，北村普遍都係木質色調嘅房屋，所以特別顯眼。

6. 益善洞（익선동）

• 地址：서울 종로구 익선동

大家記唔記得朱靜、秀貞同秀雅一齊行過嘅呢一條路？其實都係位於益善洞嘅範圍，喺《女神降臨》入面佢哋三個可以話係帶大家遊咗一次益善洞。大家如果好掛住益善洞，可以睇《女神降臨》嚟止癮。

7. 世運商街（세운상가）

• 地址：서울 종로구 청계천로 159
• 營業時間：09:00 - 19:00、逢星期日及公眾假期休息

喺《女神降臨》其中一個令小編印象非常之深刻嘅景點，就係書竣逃避一班人追殺嘅時候，跑到嘅呢個地方。雖然畫面剪接好連貫，但其實已經由新村跑到去明洞，最後又跑去位於鐘路三街一帶嘅「世運商街」。世運商街既夜色，實際上都好似戲入面影出嚟一樣咁靚，係首爾近期嘅一個新興景點。

世運商街原本係首爾嘅五金零件販賣中心，後尾因為產業老化嘗試轉型，政府就將呢一帶改造成有文創同藝術感嘅空間，頂樓嘅展望台更加係一個好靚嘅眺望景點（營業時間可以參考下方連結），大家之後嚟首爾，尤其係書竣派，記得一定要嚟呢度打卡！

8. 明洞（명동）

• 地址：서울 중구 명동8길 8-10

《女神降臨》入面呢個場景，小編一望已經認得喺邊度拍！呢度就係位於明洞商業街區域入面，好受遊客歡迎嘅「百濟蔘雞湯」樓下條街（仲有Egg Drop）。

小編睇到呢一幕都有啲感慨，《女神降臨》入面嘅明洞雖然好光猛，亦都有啲仲營業當中嘅店舖，只不過街上嘅人潮真係非常之少。之前韓劇如果想喺明洞取景，通常要三更半夜或者封埋條街先有可能，劇入面咁空蕩嘅明洞，可能先係最貼近而家嘅現實。

9. CGV Piccadilly 1958（CGV 피카디리1958）

• 地址：서울 종로구 돈화문로5가길 1

朱靜喺《女神降臨》第4集入面同狗公一齊去睇戲嗰間戲院，就係位於鐘路3街站嘅CGV 1958廣場。呢間係鐘路最大嘅戲院之一，亦都係複合式商場，一樓係鐘路3街一帶常見嘅稀金屬販賣商街，而地下就係戲院。

大家有機會，一定要去CGV1958回味修豪妒忌、呷醋同埋發嬲嘅場面。大家睇《女神降臨》第4集嘅時候，唔知有無留意到端午同白經嘅客串？

10. 弘大秀練歌房（수노래연습장 럭셔리 홍대점）

• 地址：서울 마포구 어울마당로 67

平時去開弘大嘅人，對於呢個場景應該唔陌生，位於弘大停車場街嘅「秀練歌房」，超級大又搶眼嘅建築物外型，令人經過嘅時候視線都不知不覺俾佢吸引。

呢度亦都係《女神降臨》入面，一班演員補完習之後去唱歌嘅地方，咁啱朱靜仲喺度見到書竣㗎摩托車，即刻踢咗幾腳（小編睇到忍唔住笑）。

小編估秀練歌房應該有贊助《女神降臨》，因為喺第六集入面，朱靜俾人帶過去嘅嗰間K房都係秀練歌房，不過就係位於新村。

11. 龍山Dragon Hill Spa（드래곤힐스파）

• 地址：서울 용산구 한강대로21나길 40

仲有朱靜同佢家姐一齊去嘅嗰間汗蒸幕，小編都係一望就知係位於龍山，一直都好受觀光客歡迎嘅Dragon Hill Spa汗蒸幕！

對於《女神降臨》劇組可以租到呢到拍攝，小編真係覺得幾神奇。可能因為疫情關係，觀光客嘅數量大減，劇組先有方法可以包落成個時段進行拍攝，正常情況下呢度通常都人山人海，有韓劇喺度拍攝一定會比好多人影相。

12. 肯德基大學路店（kfc대학로점）

• 地址：서울 종로구 동숭동 1-27

呢度雖然唔係咩好出名嘅觀光景點，不過喺小編落足眼力嘅情況下，都認得呢度係位於成均館大學，惠化站2號出口後面嘅KFC。雖然《女神降臨》入面會遮住啲LOGO好明顯嘅舖頭，不過大學路嘅青春氣氛絕對係點都遮唔住！

素顏嘅朱靜遇到以前欺凌佢嘅同學，當佢又俾人欺凌嘅時候，跑出去但發現銀包漏咗喺店舖入面，好彩修豪出面幫佢解圍，真係大加分！

13. Cafe Gabbiano（대학로 가비아노）

• 地址：서울 종로구 대학로 122

其中一個《女神降臨》入面嘅經典場面，修豪同朱靜為咗唔俾人發現而匿埋喺樓梯口嘅呢個位置，就係位於啱啱介紹嘅KFC隔離嘅Olive Young，二樓係另一間cafe叫Gabbiano。

修豪用佢件褸幫朱靜擋住素顏，呢個動作完全係俘虜晒所有粉絲嘅心，有機會真係想喺呢個位置重演呢一幕！

14. 惠化站2號出口（혜화역2번출구）

大部份大學路嘅景色，都包含埋頭先提過嘅惠化站2號出口後面。新春高中校慶演唱會嘅場地，亦都係喺大學路上面舉行，如果之後仲有更加多喺大學路取景嘅景點，小編一定會再同大家介紹。

以上就係小編目前整理出嚟嘅《女神降臨》拍攝場景，呢啲拍攝地全部都係位於首爾，對於想踩點嘅朋友嚟講，可以話非常之方便。

唔知大家滿唔滿意目前為止嘅劇情發展？歡迎大家喺下面留言同小編分享你係書竣派定修豪派！

備註：照片來源係tvN《女神降臨》

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購