Hello，大家好，我哋係由韓國人每日提供最新韓國旅行資訊嘅Creatrip。

大家知唔知韓國日常生活中嘅一啲法規呢？嚟韓國旅行時，唔小心誤觸相關法規而被罰款嘅話，就太冤枉啦！今日就等小編同大家介紹吓，韓國生活上最常見嘅罰則，順便同香港比較一吓啦！

港韓生活上常見法規罰則比較

韓國罰金定義

根據韓國嘅憲法，罰款制度以₩50,000（約HKD350）為界，₩50,000以上稱為「罰金」（벌금），₩50,000以下稱為「科料」（과료），係小額財產刑。雖然係兩個概念，但都係因為做錯事而受到嘅懲罰，兩者都要喺30日內交晒，如果冇按時交嘅話，就必須以勞役服刑代替。

港韓罰金比較

1. 違例泊車

young hyundai

擅自停車、違例泊車等情況，喺韓國算係好常見。根據道路交通法施行令，違反停車規例時嘅罰金會根據普通道路、兒童、老人、殘疾人保護區而有所不同。另外，如果喺消防龍頭5米內違例泊車，因為可能會妨礙消防車救火，所以會罰更高嘅罰金。

同香港比較，香港嘅「牛肉乾」係港幣400至560，但冇好似韓國咁分成兒童保護區、消防龍頭等地方，會罰更高嘅金額。

2. 過路車濺水

으라차차 와이키키

落雨嘅時候，大家都應該有試過俾過路嘅車濺起嘅水，搞到成身濕晒，甚至啲衫褲唔要得😨喺韓國，如果被車濺起嘅泥水潑到嘅話，可以記低車牌號碼同相關損失，車主就會被罰款。私家車情況會罰₩20,000（約HKD140），而電單車、單車就會罰₩10,000（約HKD70）。

至於香港就冇相關嘅罰則，落大雨有積水係好正常，但被濺到有時真係會幾麻煩，希望駕駛人士可以放慢速度，減低濺起積水嘅機會。

3. Shut Down制

중앙일보

「Shut Down制（셧다운제）」係禁止未滿16歲嘅青少年深夜打機嘅法律，目的係為咗佢哋健康成長，預防過度沉迷網絡遊戲。根據規例，00:00至06:00之間，未滿16嘅青少年會強迫退出遊戲，違反嘅話會被處以2年以下有期徒刑或最高罰款至1,000萬韓元（約HKD7萬）。不過有部分青少年會用其他人嘅身份玩遊戲，或其他方法去逃避法律，所以唔容易管制，實際上冇特別去抑制青少年玩遊戲嘅時間。目前香港冇相關嘅法規。

4. 禁煙區吸煙

뉴시스

根據《國民健康增進法》規定，喺指定禁煙區嘅公共設施吸煙時，會被處以₩100,000（約HKD700），如果亂揼煙頭，就會再加罰款₩50,000（約HKD350）。

事實上，1990年代初，韓國公共交通、室內吸熛都仲係非常普遍，但隨住國民意識提高，香煙、二手煙對健康不利嘅事實被廣泛傳播，1995年禁止喺公共交通工具度吸煙，喺2015年開始，所有餐廳、酒吧、cafe室內都全面禁煙。

喺香港，違例喺禁煙區或公共交通工具內吸煙，或者攞住點著咗嘅煙頭，會被罰款港幣1,500。另外隨處揼煙頭亦會罰款港幣1,500。同韓國比，香港對於吸煙嘅罰則重啲！

5. 行山時飲酒

국립공원관리공단

韓國登山文化中，有一種叫「頂上酒（정상주）」，一種叫「下山酒（하산주）」嘅飲酒文化，甚至喺山頂上有賣酒嘅攤販。不過不斷有因為喺登山過程中飲酒而出意外同死亡嘅事故發生，政府就限制喺登山過程中飲酒，喺2018年開始，根據《自然公園法》施行令規定，喺國立公園、道立公園、郡立公園等山上飲酒，會被罰款。第一次犯嘅話會罰₩50,000（約HKD350），兩次或以上就會罰₩100,000（約HKD700）。

辛辛苦苦行到上山頂之後飲返杯冰凍嘅米酒當然爽，不過都係安全第一！而香港目前冇行山禁止飲酒嘅罰則。

6. 漢江飲酒

연합뉴스

好多人都喺漢江食炸雞、飲啤酒，雖然冇法例話唔可以飲酒，但如果因為飲酒發出噪音、惡臭、醉酒，做出對其他人造成妨礙、厭惡、不安等行為，就會被罰款₩70,000（約HKD490）。而喺香港目前冇法例限制飲酒嘅場地。

7. 青少年吸煙、飲酒

韓國同好多國家一樣，未成年嘅人唔可以吸煙、飲酒，但係相關法例係唔會罰未成年嘅人，而係罰賣煙、酒俾佢哋嘅舖頭，會處以2年以下有期徒刑，或者最高罰款至2,000萬韓元（約HKD14萬），甚至會強制停業。就算係未成年者偽造身分、扮成人買煙酒，店主喺唔知情嘅情況下賣咗俾佢哋，都一樣會受到處罰。

香港方面，向未成年人士售賣或提供酒類，會被罰款港幣5萬元，售賣或提供香煙類就會最高罰款港幣25,000。同韓國相比，罰款似乎比較輕。

8. 電動滑板車

매일경제

韓國呢幾年有種新嘅交通工具--「電動滑板車」，喺路邊好容易租借到，方便大家喺短距離移動。因為電動滑板車越嚟越普及，發生過好多意外，韓國亦出現相關法律，限制電動滑板車嘅使用。

第一，有車牌嘅人先可以租借電動滑板車，冇牌駕駛者會被罰款₩100,000（約HKD700），小編嘅朋友之前唔知有呢個法規，喺冇牌狀態下揸電動滑板車，被警察截停查牌，就罰咗錢……

이데일리

第二，為咗避免超載而發生意外，如果兩人同時揸電動滑板車，就會罰款₩40,000（約HKD280）。雖然情侶一齊揸好sweet，但係安全緊要啲！

매일신문

第三，如果喺行人路上揸電動滑板車，就會被罰₩30,000（約HKD210）。因為電動滑板車最高時速可以去到25km，如果喺行人路上咁揸，對行人嚟講非常危險，所以規定只可以喺一般車道或自行車道揸。

네이트뉴스

最後係最近6月新加嘅規定，如果揸電動滑板車時無戴頭盔嘅話，會被罰₩20,000（約HKD140）。

香港將電動滑板車視為電單車嘅一類，必須要按規定登記同領牌先可以揸，否則會被判罰最高罰款港幣5000元及入獄三個月。

9. 新冠肺炎相關罰則

COVID-19疫情爆發後，韓國有唔少相對應嘅規定。第一，戴口罩義務化。如果冇戴口罩，會罰款₩100,000（約HKD700），同香港冇戴口罩嘅港幣5,000罰款，可以話好輕！喺韓國，如果對戴口罩管理不力嘅場所同設施，亦都會被罰款150萬韓元（約HKD10,500）。

第二，政府針對防疫定立咗好多措施，包括：戴口罩、出入名單管理、定期消毒及通風、禁食、有症狀嘅人禁止出入等。如果違反以上措施，個人罰款為₩100,000（約HKD700），商家就會被罰款300萬韓元（約HKD21,000）。喺香港違反有關規定，會被罰款港幣5,000。

세계일보

第三，如果違反私人集會嘅規定，最高罰款韓國300萬韓元（約HKD21,000）。由舊年開始禁止除咗家人、直系親屬以外嘅5人或以上嘅私人聚會，今年7月開始放寬7人以上。

香港嘅限聚令禁止4人以上嘅聚會，違反時罰款港幣5,000元。由人數嚟睇，韓國比較寬鬆；但由罰款嚟睇，香港就好似比較輕啦。

以上就係香港同韓國一啲日常法規嘅相關罰則，小編身為香港人，都係因為寫呢個blog查資料先知香港嘅罰款，唔知大家又有冇了解多咗呢？同時提醒吓喺韓國生活嘅朋友，要小心唔好犯咗法都唔知，到時被罰就唔抵啦！

  韓國立法規管嘅事

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購