韓國娛樂公司嘅現實

Hello，大家好，我哋係由韓國人每日提供最新韓國旅行資訊嘅Creatrip。

大家係咪都對K-POP有好興趣呢？有冇諗過喺自己鍾意嘅韓星所屬娛樂公司度做嘢？可以一邊做嘢，一邊近距離見到自己鍾意嘅IDOL，可以直接接觸到佢哋創作嘅音樂作品，真係好似一份超筍嘅工咁！小編以前都有追星，都曾經夢想過喺娛樂公司度做嘢。不過喺娛樂公司度做嘢係咪真係咁好呢？今日就等小編為大家揭開係娛樂公司度工作嘅神秘面紗啦！

韓國娛樂公司嘅現實

• 成立日： 2005.02.04
• 員工人數：422名(2021年3月為準)
• 銷售額：4,533億 6,955萬won (2020年 12月31日為準)
• 企業形態：中小企業
• 年薪：3,372萬won (大學畢業生職員平均) / 5,046萬won (整體職員平均)

HYBE嘅前或現任職員對呢間公司嘅評分係點呢？

經過統計總共91名留低嘅評論，得到2.4/5分。

• 福利及待遇：3/5
• 工作與生活平衡：2.1/5
• 公司內部文化： 2.4/5
• 晉升機會及可能性：2.4/5
• 管理層：2.2/5

根據前或現任職員嘅評價，HYBE嘅企業推薦率為29%，CEO支持率就有52%，成長可能性有34%！咁具體嘅評價又係點呢？小編揀咗最近update嘅幾個評論嚟同大家分享吓！

標題

成長嘅階段存有可能性同不安感，利弊亦分明。

優點

• 作為不斷成長嘅創業公司，可以感受創新變化嘅娛樂公司嘅文化同氛圍。
• 年薪偏高。

缺點

• 會議多，冇效率。
• 溝通有困難。
• 工作同生活口唔平衡。

標題

推薦俾唔需要工作生活平衡、隨時隨地都想工作嘅人。

優點

• 彈性上班制度
• 提供多種飲品同小食
• 整體都係年輕嘅氛圍

缺點

• 公司淨係識擴大，但內部冇系統可言。
• 工作量太多，工作生活唔平衡，冇假放。

標題

"HYBE - BTS = 0" 無基礎、無系統、老一輩嘅天下（淨係會聽高層嘅意見）

優點

• 周圍嘅人會用神奇嘅眼光望你， 除咗呢個就冇啦。

缺點

• 喺嗰6個月「試用期」，叫你做咩都要做，唔做就話就趕你走。
• 週末、凌晨，甚至放緊假都要隨時為公司候命，工作生活唔平衡。
• 喺最需要獨特創意嘅地方，體驗到最被動、最無效率嘅工作環境。
• 淨係相信BTS就可以搞掂一切。
  
  

HYBE原本係叫Big Hit，後嚟改名叫HYBE，同時成間公司重整，建立咗可以俾唔同專業性嘅成員發展工作嘅系統。 另外，新建嘅辦公大樓出名為artist，亦都為所有職員嘅福利費盡心思。 福利同待遇中滿分5分有3分，從呢一點度睇，都算唔錯。

Big Hit新公司大樓介紹

所以HYBE嘅優點中，大部分都係指企業有成長嘅可能性。 另外，公司內部嘅福利同其他娛樂公司相比算是比較好，氣氛都比較舒適。

但係職員所認為HYBE嘅缺點相當致命。 首先工作同生活完全唔平衡。 另外，雖然HYBE嘅目標係橫向嘅組織文化，但大部分事情都係由冇系統嘅高層嘅決策進行。 "HYBE - BTS=0"呢句話雖然好偏激，但係喺呢句可以感受到呢位職員嘅憤怒😥

2. YG

YG又係點呢？10幾年前通過BIGBANG同2NE1成為頂級娛樂公司嘅YG，而家旗下有BLACKPINK、TREASURE、IKON、WINNER等藝人活動緊。

• 成立日：1996.05.20
• 員工人數：315名
• 銷售額： 2858億won
• 企業形態：中堅企業
• 年薪：2,820萬won（大學畢業生職員平均）/ 3,179만원（整體職員平均）

YG嘅前或現任職員嘅評分又係點呢？

經過統計總共257名留低嘅評論，得到2.3/5分。

• 福利及待遇：2.2/5
• 工作與生活平衡：2.1/5
• 公司內部文化： 2.3/5
• 晉升機會及可能性：2.5/5
• 管理層：1.9/5

根據前或現任職員嘅評價，YG嘅企業推薦率為23%，CEO支持率有25%，成長可能性有19%！

標題

係娛樂圈一間大型靠個名來維持生計嘅公司

優點

• 可以對住其他人大講講說「我喺YG返工」，裝腔作勢。

缺點

• 超低年薪，要求無限加班。
• 舊有職員排斥新人嘅情況嚴重。

標題

公司出名唔使多講都知，金玉其外，形象好。

優點

• 新起嘅大樓真係好型，有喺大公司返工嘅感覺。
• 提供午飯、晚飯、宵夜。

缺點

• 好多老派嘅人（極注重階級禮儀嘅老職員）。
• 唔使落力做嘢，只要識擦上司鞋，就可以輕鬆生存。

標題

公司有歷史，但業務上冇。

優點

• 組織偏後生。
• 有為新入職員工嘅活動。

缺點

• 明明組織好後生，但好奇怪嘅係度度都見到軍隊式文化（上下層、階級文化）同埋好壓迫嘅氛圍。
• 業務交接同記錄管理不善 ， 做嘢嘅時候分唔到邊啲係啱邊啲係錯。
• 因為唔重視職員，好多人辭職，同時好多新入職嘅人。
• 因為工作量太大，令脾氣變得唔好，健康都差咗。

YG最近都將公司搬到合井洞。 因為公司規模大，設施又好而出名，仲有最出名嘅就係YG公司飯堂。唔只呢三個評論，仲有其他評論都話YG 飯堂嘅飯真係好好食。小編朋友而家都喺YG度返工，喺SNS度寫住「為咗食飯而返工」😂

介紹韓國經紀公司食堂

另外，YG喺韓國係一間有近20年歷史嘅頂級娛樂公司，所以對YG呢個名嘅評價好高。 喺娛樂圈好top，而且大部分普通人都知YG呢間公司。

不過YG嘅缺點都好明顯，可以睇得出YG同HYBE一樣，工作同生活完全無平衡。 另外好多評論都提到上下階級文化呢個缺點。

而且好多人對於管理層嘅期望都話「唔係淨係為artist，要為員工做返啲嘢」，令小編留下好深刻嘅印象。 因為娛樂公司係以artist為中心嘅公司，所以好多時support緊artist嘅員工所作出嘅努力都好容易被埋沒，但係公司內部都應該多啲為員工著想，而呢度就將員工當係公司嘅附屬品，所以員工對YG嘅評價都非常唔好。

3. SM

SM 娛樂喺韓國首次K-pop 同 K-pop 偶像復興時企喺最前，而家旗下有好多artist。

• 成立日：1995.02.14
• 員工人數： 498名 (2021年3月為凖)
• 銷售額：約3,026億won (2020年12月31日為準)
• 企業形態： 中堅企業
• 年薪：3,109萬won (大學畢業生職員平均) / 4,177萬won(整體職員平均)

順便提一提，YG同SM嘅銷售額雖然比HYBE少，但被分類為中堅企業係因為YG同SM比HYBE更長時間喺娛樂圈處於最高位置，而且一直保持相當高嘅平均銷售額。 相信短期內，HYBE都會被分類為中堅企業。

SM嘅前或現任職員嘅評分係點呢？

經過統計總共387名留低嘅評論，SM得到2.4/5分。

• 福利及待遇：2/5
• 工作與生活平衡：2/5
• 公司內部文化： 2.4/5
• 晉升機會及可能性：2.3/5
• 管理層：2.1/5

根據前或現任職員嘅評價，SM嘅企業推薦率為25%，CEO支持率有40%，成長可能性有20%。

標題

覺得「除咗你，仲有大把人想嚟做」嘅公司，必須由合約制開始。

優點

• 提供2萬won電話費。
• OT時提供1萬won膳食費。
• 有時artist出碟，經理人會幫攞簽名。

缺點

• 有返工冇放工。
• 上頭話要做就去做，老闆今日講點做就點做，第二日話咁做就要跟住咁做。
• 唔珍惜人嘅價值。

標題

好有趣，有趣就係有嘅，但就得有趣，單純鍾意係絕對挑戰唔到。

優點

• 對於鍾意娛樂、K-pop嘅人嚟講會好有趣。
• 因為工作量太大，令自己嘅工作效率提高。

缺點

• 排斥新人同冇效率。
• 唔係OT咁簡單，直頭係當公司係屋企咁做嘢。

標題

• 守舊嘅組織文化同審批線，要有明確嘅變化。 每次經歷是是但但（冇系統、到時先算嘅處理方式）嘅方式去做嘢時，都會好怕。

優點

• 因爲多artist，每個星期都有唔同嘢做，所以可以接觸到各種內容同工作。
• 工作範圍大，諗都冇諗過嘅嘢會不知不覺咁發生。

缺點

• 太多artist，每個星期都瞓晒身去做，製作/企劃/發售嘅惡性循環不停loop。
• 「叫你做就做」嘅思維。
• 一啲動力都冇嘅超低年薪。

SM喺HYBE迅速發展之前，喺韓國娛樂公司中被選爲最大、最好嘅公司。 喺超過20多年裏面，培養咗好多artist，製作咗好多嘢，所以打響咗招牌。

但係亦都因為咁，守舊嘅上下級組織文化依然喺度，同其他娛樂公司一樣，仍然冇咩系統，呢個係一個大問題。

另外，由於有嘅artist比其他公司多好幾倍，所以需要投入大量人力物力去製作，職員工作量過大都係一大問題。 而且同工作量相比，年薪又太低，所以員工都好不滿，好多評論都話，靠住鍾意愛K-POP嘅心嚟撐緊。

4. JYP

JYP係以朴軫永為中心，TWICE、STRAY KIDS、DAY6等多個偶像團體活動緊嘅韓國代表性娛樂公司之一。

• 成立日： 1997.11.18
• 員工人數：246名
• 銷售額：約 1,300億won
• 企業形態：中小企業
• 年新：3,232萬won (大學畢業生職員平均), 4,153萬won만원 (整體職員平均)

JYP嘅前或現任職員嘅評價係點呢？

經過統計總共133名留低嘅評論，JYP得到2.5/5分。2.5分係喺4間娛樂公司中最高，令人驚訝。

• 福利及待遇：2.3/5
• 工作與生活平衡：1.8/5
• 公司內部文化： 2.6/5
• 晉升機會及可能性：2.7/5
• 管理層：2.4/5

根據前或現任職員嘅評價，JYP嘅企業推薦率為26%，CEO支持率有55%，成長可能性有13%。

標題

非常注重道德倫理，所以想要入娛樂公司嘅話，值得推薦嘅公司。

優點

• 雖然每個部門都唔同，但大致上唔使睇人面色。
• 公司食堂好食。
• 努力接納下級職員意見的嘅氛圍。

缺點

• 放假=居家工作。
• 週末同假期都會收到工作嘅電話。
  
  

標題

一間唔同team嘅工作環境差異好大嘅公司，如果真係對娛樂充滿熱情嘅話會推薦。 旺季嘅週末同夜晚都會冇咗。冇乜邊幾間會堅守原則嘅娛樂公司。

優點

• 膳食好。
• 唔會叫你做唔道德嘅事。
• 可以快速提高對娛樂產業嘅理解。

缺點

• 工作生活唔平衡。
• 新入職嘅人工非常低。
• 星期六、日都會有同工作有關嘅電話打嚟。

標題

喺娛樂公司之中，算係好為職員諗，朴軫永呢個名好大。

優點

• 提供買書費。
• 作爲娛樂公司，公司內部嘅福利唔算差。
• 老闆唔會揸晒權話事。

缺點

• 工作時間長，工作量大。
• 比起精神上嘅壓迫，肉體上嘅壓迫更大。
• 職員人工低，好難有動力做嘢。

如果你係JYP娛樂公司嘅fans嘅話，應該聽過JYP掌門人朴軫永嘅倫理觀。 朴軫永一直對artist同職員強調品格道德。 過去朴軫永出演某個節目時對公司職員話「如果去有女人招待嘅地方嗰一刻，就等於離開我哋公司。」 呢個其實係一件好理所當然嘅事，但係有好多公司喺商業同營業嘅名義之下做出呢種唔道德嘅的事。

有賴於朴軫永嘅價值觀，JYP嘅公司內部文化同福利都比較唔錯。 同其他3間公司相比，公司文化、晉升機會同可能性比較高。

當然JYP娛樂都同其他娛樂公司一樣，工作同生活完全唔平衡。 本身可以自由放假嘅好環境都冇咗意義，放假都收到工作嘅電話，可見工作量有幾大。 同其他地方一樣，人工低亦都係原因之一。

娛樂行業

呢個只係HYBE、YG、SM、JYP呢啲大型娛樂公司嘅問題？ 唔係㗎，其實上面提到嘅問題都是娛樂行業嘅通病。

以上係小編喺Job Planet上search娛樂公司時得出嘅結果，分別有Pledis、FNC、Jellyfish、Cube、Woollim。 之前介紹嘅4大娛樂公司嘅評分都係喺滿分5分中得2.3~2.5分，屬於非常低嘅水平，但係其他公司一眼睇到係仲差。

整理一下娛樂行業嘅問題：

1. 工作量非常大。
2. 夜晚嘅時間、週末、假期都冇得保證有得休息。
3. 年薪好低。
4. 冇一個健全嘅系統。
5. 存有上下級決策結構。
6. 將artist放喺第一位，所以忽視其他職員。
   
   

大部分娛樂行業嘅現實就係咁樣，所以熱愛K-POP嘅人就算滿懷夢想咁入到公司，都唔係堅持到好耐，好多都會喺幾年之內就會辭職。 精神上嘅壓力同體力上嘅疲勞都太嚴重，付出嘅勞力同所得嘅回報唔對等，冇辦法長久咁堅持落去。

之前介紹嘅4大娛樂公司嘅同時，亦都展示咗大學畢業生職員嘅平均年薪同整體職員嘅平均年薪。 4大娛樂公司嘅大學畢業職員的平均年薪大約有3,133萬won左右。 根據Job Korea透露，以2021年為準，大企業嘅大學畢業生年薪大約有4,121萬won，中小企業嘅大約係2,793萬won。

以目前娛樂公司嘅大學畢業生職員為標準，可以講比中小企業稍微高一啲，但係考慮到工作量同工作時間，其實算係低。 工作多到冇固定嘅工作時間同假期。

所以聽講喺娛樂公司，除咗工作咗好長時間嘅高層之外，大部分嘅人都工作咗唔夠5年，好難建立到健全嘅體系，只能夠形成上下級嘅業務決策結構。

而且呢種娛樂公司嘅惡名都好多人知。 小編喺大學接受就業諮詢時，都被勸唔好考慮娛樂行業界😓上面介紹嘅4大娛樂公司已經屬於好好嘅一類，係咪好震驚呢？

為咗K-POP進一步發展同創造更好嘅作品，artist嘅力量固然重要，但係同佢哋一齊工作、支持佢哋嘅娛樂公司職員嘅力量都非常重要。 如果上面提到嘅問題得唔到解決，咁好似而家嘅情況只會反覆出現，喺娛樂行業工作的嘅人嘅壓力只會越嚟越大。

서경스타

娛樂公司入面有經理人、內容企劃及製作、營銷、a&r等多種職務。 其中想要詳細了解娛樂公司嘅經理人可以撳入以下嘅link度睇！😊

明星經理人介紹

今日帶大家了解咗娛樂公司嘅現實，係咪有啲震驚呢？小編都好鍾意K-POP，學生時期都夢想住喺娛樂公司工作，但了解咗娛樂公司嘅現實之後，先意識喺嗰度單靠夢想好難堅持落去😥 希望K-POP娛樂公司可以有所改變啦！

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購