Hello，大家好，我哋係由韓國人話你知每日最新韓國資訊嘅Creatrip。
＃首爾市集＃韓國市集
＃推薦＃文青必行＃女孩
除咗地道嘅傳統市場之外，韓國其實都有一啲屬於年輕人嘅市集，
主要唔係賣嘢食，而係一啲手創作品、傳統懷舊嘅設計小物，甚至係跳蚤市場。
比起一般嘅市場，呢啲創意市集更令人有種嚟尋寶嘅感覺，話唔定行下行下，就可以搵到自己想要嘅嘢啦～
睇下小編嘅總整理，下次都嚟呢啲地方碰下運氣啦！
✨馬上Follow我哋IG
instagram.com/creatrip.hk
首爾創意市集
1. 仁寺洞 人人商場（쌈지길）
- 地址：서울 종로구 인사동길 44
- 時間：10:30至20:30；農年新年、中秋當日休息
相信大家對人人商場一定唔陌生，呢度係仁寺洞最出名嘅地標。
呢度除咗係個地標之外，入面仲係個賣好多手工藝品、設計品嘅創意市集。
創意市集「人人商場」嘅一樓到四樓，用路嘅概念互相連接，結構設計非常特別～
而且建築物中間嘅廣場同畫廊，成日都會有各種展覽同表演活動，就算唔Shopping，喺呢度行下都好舒服㗎～
有好多嘅可愛小店好值得行，手工做嘅藝術品、裝飾品甚至係令人愛不釋手嘅紀念品，都係獨一無二嘅存在。
想去尋寶？嚟仁寺洞「人人商場」行下啦！
? 首爾仁寺洞攻略
首爾創意市集
2. 弘大延南洞 東進市場（동딘시장）
- 地址：서울 마포구 성미산로 198
- 時間：週五晚上；週六、週日午後
喺弘大延南洞深處嘅東進市場，都係弘大周邊唯一一個有呢種風格嘅傳統市場。
東進市場喺平日同一般市場冇咩差別，不過去到星期六日，就會華麗變身，成為創意市集～
由星期五嘅夜市開始，到星期日嘅創意市集，集美食同文創於一身嘅創意市集「東進市場」，
非常推薦大家喺假日嚟呢度行下，體驗當地嘅文青市集。
呢度進駐咗好多有趣嘅店鋪而重獲新生，東進市場聚集咗開放式廚房、二手服裝店、飾品店等而成為咗新嘅文化空間。
嚟到延南洞，不妨喺呢度行下，話唔定都會有收獲㗎～
首爾創意市集
3. 東大門 東廟市場（동묘시장）
- 地點：首爾地鐵1號線、6號線東廟站（동묘앞역）3號出口
- 時間：週六、週日午後至落日前
東廟市場相信大家都唔會陌生，呢度唔算係創意市集，而係首爾一個大型嘅跳蚤市場，
入面有好多二手服飾、生活用品，等有緣人嚟尋寶。
雖然好多嚟行嘅都係老人家，但呢幾年東廟市場嘅年輕人都越嚟越多。
除咗復古嘅嘢之外，呢度仲可以用好平嘅價格買衫，只要揀得啱，就可以搵到質感唔差嘅衫啦！
星期六日下就嚟東廟市場行下啦，就算唔買嘢，都可以感受下呢個幾乎冇外國人嘅地道市場係點嘅，從而體驗到唔同嘅市集文化，就係旅途入面最大嘅樂趣啦～
? 東廟市場探訪記
首爾創意市集
4. 新設洞 首爾跳蚤市場（서울풍물시장）
- 地址：서울 동대문구 신설동 천호대로4길 21
- 時間：10:00至19:00；每月第二、四週週二公休
首爾傳統跳蚤市場位於新設洞，離清溪川非常近。
以前可以話係韓國最具代表嘅跳蚤市場（黃鶴洞），仲有萬物市場嘅稱號。
呢度主要賣由全國各地收集嘅懷舊傳統物品。
如果鍾意復古嘅朋友，就好啱嚟呢個地方行下啦～
呢度賣嘅嘢包羅萬象，幾乎咩都有，同東廟市場有啲似，但呢度係喺室內。
天氣凍嘅時候，嚟呢度行下，好像都唔錯～
首爾創意市集
5. 黃鶴洞跳蚤市場（황학동벼룩시장）
- 地址：서울 중구 흥인동 166
黃鶴洞跳蚤市場係啱啱介紹嘅首爾跳蚤市場裝修、搬遷嘅前身。
呢度有好多舖頭，同東廟市場都有啲像，但規模更大、貨物更齊全。
由古董到化妝品都有，呢個先係萬物市場嘅原身。
而家呢度成為咗一個地道的市集，紀錄咗過去幾十年嘅事物。
相機、雪櫃、洗衣機、電視機、鐘錶、進口産品、錢幣、古畫等等嘅商品，都可以喺呢度搵到。
整體嚟講，黃鶴洞跳蚤市場比室內嘅規模更大，而且呢度行落更有趣味。
大家如果有興趣，都可以嚟呢度尋寶，睇下當地人嘅真實生活啦。
首爾創意市集
6. 弘大自由市場（홍대 프리마켓）
- 地址：서울 마포구 와우산로21길 19-3
- 時間：3月至11月的每週六13:00至18:00；遇雨公休
喺弘益大學附近嘅呢個公園，
每逢星期六（3月至11月限定）會有個自由市場，
有好多攤販、表演藝術者會喺呢度擺攤，吸引好多人嚟睇。
但比起其他市場嘅規模，弘大自由市場更似係個小型嘅文創市集，
創作家同一般大眾直接面對面，互相溝通、交流，好似一個小型嘅慶典。
除咗可以喺呢個創意市集搵到手工小物，呢度仲有啲街頭表演睇㗎。
下次咁啱星期六嚟弘大嘅，不妨可以去埋自由市場。
另外，弘大4號出口隔離（百貨前），星期六日下就都有條小飾品街可以行㗎。
? 弘大地圖懶人包
首爾創意市集
7. 三清洞 感古唐街市集（감고당길）
- 地址：서울 종로구 소격동 154-5
- 時間：2019年04月20日至10月的週六、週日；07月、08月不舉辦
感古唐街係咩嚟㗎呢？
佢就係好出名嘅三清洞石牆路，亦係韓劇《鬼怪》嘅拍攝地之一。
咁講大家應該就會有啲印象～
呢條街位於三清洞，人流比較多，而呢度嘅文創市集都非常發達㗎。
感古堂街創意市集由2015年先開始，當初係政府為咗支持喺首爾進行手工藝創作嘅女性，而特別開設嘅文藝街。
而家已經成為韓國數一數二嘅文創聚集地～喺春天吸引咗無數嘅遊客嚟參觀。
小編去行過一次，文創市集唔單止係手作、紀念品攤位，現場仲有好多街頭藝人，
例如音樂表演、幫遊客畫畫等等，攤位內容好多元、豐富，之後有機會一定要去睇下啊。
首爾創意市集
8. 首爾 夜貓子夜市
- 地點：汝矣島漢江公園、盤浦漢江公園、東大門DPP、清溪川、文化儲備基地
- 時間：每年4月初至10月底嘅週末，各地點營業時間唔同
講到最為人所知嘅創意市集，莫過於每年春天開始，秋天結束嘅鬼怪夜貓子夜市。
喺首爾各地嘅星期六日晚，都係好多觀光客會前嚟共襄盛舉嘅盛會。
街頭表演、美食、文創小物，喺各個人氣景點集結而成嘅小攤檔，吸引咗好多人。
小編去過幾次，雖然夜市規模冇想像中咁大，但都幾有趣㗎～
把握時間啦！每年都有限定嘅開放日期～大家都嚟首爾夜貓子夜市好好體驗一下韓國夜市係點㗎啦！
不過每個星期會開嘅攤檔都唔係好同，可能會有落差感，只可以話係要靠各位嘅運氣啦～
以上呢啲首爾創意市集，唔知邊啲啱大家胃口呢？
韓國有好多特色市場，唔單止美食，好多古董、生活小物都可以搵到，非常有趣。
有人話行市集，揀到嘅嘢就代表同自己有緣份。
下次嚟韓國個陣，咁啱遇到市集開嘅時間嘅，就過嚟呢啲地方行下啦。
咁多位，我哋下次見。
✨馬上Follow我哋IG
instagram.com/creatrip.hk
| 其他延伸閱讀 | |
 弘大文具店整理 |  首爾站交通整理 |
 韓國飾品店整理 |  炸雞必點口味 |
 首爾新景點整理 |  NoBrand漢堡 |
