Hello，大家好，我哋係由韓國人話你知每日最新資訊嘅Creatrip。
#韓國 #韓國社會
#韓國新聞 #弱勢社群
大家知唔知首爾嘅豪宅區，喺2014年發生嘅「松波母女三人自殺事件」呢？
被生活所迫嘅三母女，一齊走上咗絕路，引起咗韓國好大嘅社會爭議。
亦都係因為咁樣嘅悲劇，好多韓國人都認為政府嘅社會安全網同埋對弱勢社群嘅關懷唔足夠。
✨馬上Follow我哋IG
instagram.com/creatrip.hk
韓國豪宅區嘅社會悲劇
到咗六年後嘅2020年，首爾又發生咗一宗弱勢家庭嘅悲劇。
一個喺屋企陳屍左五個月嘅媽媽同埋露宿街頭嘅仔，再一次令到韓國人覺得無止境嘅心痛。
不過，呢件事之所以會畀社會發現，最大功勞都係因為一個熱心嘅社工A某。
松坡母女留俾房東嘅道歉遺書
社工A某同坐喺梨水站前面嘅男人對話
2020年11月，一個男人坐喺梨水站前面行乞。
當所有行人都對佢完全無關心嘅時候，淨係得呢一位社工A某停低腳步同佢傾偈。
可能係因為呢一個男人係身上面嘅只寫着「媽媽喺5月3號過咗身，請幫下我」，令到A某唔忍心就咁走咗去。
又或者係A某自己身為社工，出於善意，令到呢一個男人背後嘅故事可以公開。
喺A某同佢傾偈嘅過程中，就發現佢雖然已經30幾歲，但因為有發育遲緩症狀。
加上佢長期露宿街頭，令到佢對A某有嚴重嘅警戒心，甚至覺得A某係要將佢捉去漁船打工，而嘗試逃跑。
諗返起男人話「媽媽去咗天堂，但身體仲喺嗰度」嘅A某
A某對記者表示，男人形容媽媽死亡嘅經過：「我媽喺睇手機嗰陣，突然話『我嘅手臂郁唔到』然後就瞓咗。」
呢個男人一邊對A某講媽媽嘅事，一邊扮佢媽媽瞓低嘅動作。
「然後啊，烏蠅就入咗嚟，啲蟲都入埋嚟，我間房到處都係蟲。」
A某聽到佢咁講，加上男人表示冇人認真聽自己講嘅故事，就覺得唔妥。
所以A某就同警察一齊去梨水站附近，男子住喺方背洞，發現咗一個屍體（媽媽金某60歲）。
金氏母子嘅屋企
2020年12月3號，喺即將會重建嘅方背洞某幢住宅入面，警方發現咗金某嘅屍體。
呢到距離首爾豪宅區嘅瑞來村，只係得10分鐘嘅距離。
根據警方表示，屍體已經嚴重腐爛咗，甚至連肉都化開，露出骨頭。
而死者金某喺韓國社福階段入面，收入係45%以下嘅「基礎生活保證領取者」階級， 10幾年嚟一直同發育障礙嘅仔(崔某，36歲)一齊生活。
佢由2008年開始就已經冇交過健康保險費，冇辦法去醫院睇病。
根據崔某講嘅嘢，同埋佢媽媽金某嘅腦出血病歷、現場亦都冇他殺嘅痕跡，警方判斷金某係因為病而死亡。
而驗屍報告顯示屍體嘅死亡時間已經超過咗5個月。
喺現場，屍體用被冚住，而棉被嘅邊同埋角都用膠紙好實咁樣痴喺地板上面。
崔某解釋係因為見到媽媽打側瞓咗喺度，呼吸好奇怪，驚佢凍就幫佢冚被。
之後亦都為咗烏蠅唔喺媽媽身邊飛嚟飛去，所以就連媽媽個頭都冚埋被。
崔某亦都對警察同埋社工講「我喊住咁祈禱，希望佛祖可以令到媽媽好返，但第二日，媽媽都仲係冇呼吸⋯⋯」。
喺佢媽媽過身之後，崔某就陪住屍體喺屋企留咗一段時間。
佢喺筆記簿上面寫咗「我嘅媽媽身體麻痹過咗身，請幫幫我」，但係冇人睇到。
之後，因為唔夠食物同斷電，崔某就離開咗屋企，瞓喺地鐵站。
根據崔某表示，佢由秋天開始就無返過屋企，直到11月6號，喺梨水站12號出口前面，遇上主動伸出援手嘅社工A某，先至令成件事曝光。
社工A某之後亦都諗返，表示崔某睇落好似好耐冇沖涼，對手成隻腫晒，著住好似地盤工人着嘅上衣同埋皮鞋。
金某原本住喺金羅北道，但因為同老公不和，但又冇辦法掉低有發育障礙嘅9歲仔。
喺1993年搬咗嚟首爾，但一直冇固定工作，佢一直透過政府嘅公營事業補助(公機關零工)維持生計。
而喺政府記錄嘅2019年5月至10月，金某喺社區進行咗62日嘅防蚊工作，獲得124萬韓幣(約港幣8,700元)嘅人工。
另外，因為金某都係中等收入45%以下嘅群組，由2018年10月開始每個月都可以拎25萬韓幣(約港幣1,750元)嘅基礎生活保障金。
但係警方發現屍體嗰陣，屋企大門就貼滿咗紅色嘅紙，表示會中斷佢哋嘅電力。
而有發育遲緩嘅仔崔某就問「點解要交租？點解唔夠錢就會畀人趕走？點解要交電費？點解會冇電？⋯⋯」
另外，最令社會懷疑嘅係，呢兩母子應該係社會福利對象入面需要加強管理嘅對象。
不過地區社福機構唔單止冇俾幫助，甚至冇主動關心佢哋。
如果崔某冇離開屋企、如果社工A某冇對崔某伸出援手，後果都可能會更加不堪設想。
目前金某嘅屍體已經火化完，而崔某就因為涉嫌遺棄屍體，接受緊警方嘅調查。
警方表示，雖然崔某嘅發育遲緩係事實，但因為冇相關嘅病歷紀錄，所以都會對佢進行基本嘅調查。
崔某喺全羅北道嘅時候，返學淨係返到小學2年班，跟住落嚟直到而家36歲嘅人生幾乎一無所知。
識讀、寫，識由1數到10，亦都識打電話同人溝通，但佢嘅社會化能力就淨係得呢啲。
社工A某表示，崔某並唔理解「報警」同埋「鄰居」呢一啲概念。
雖然可以過日常生活，但係喺韓國社會生活入面會好辛苦。
可以話對詐騙或者其他犯罪、超乎佢認知嘅事，呢一啲都完全冇防備嘅心。
目前，身為社工嘅A某正喺度幫緊崔某進行殘疾人士登記，同埋殘疾人自立。
雖然已經遲咗，但係瑞草區同方背洞嘅居民中心都話會協助幫崔某俾殘疾檢查嘅費用，同埋佢媽媽嘅喪葬費用。
另外，亦都將崔某選定做緊急福利對象，喺半年入面每個月會俾45萬韓幣(約港幣3,150元)佢做生活費。
喺韓國社會，其實都有好多呢啲事重重複複咁樣發生緊。
可以感受到韓國社會係光鮮嘅表面之下，對弱勢社群嘅管理死角有幾大。
希望之後嘅韓國，可以再對弱勢社群嘅法律、社會同埋相關安全網有進一步嘅加強。
✨馬上Follow我哋IG
instagram.com/creatrip.hk
| 其他延伸閱讀 | |
 韓國保全員之死 |  韓國史上大意外 |
