12套經典韓國電影推薦
點解韓國電影咁賣座?12套韓國經典電影推介!同時兼顧市場、藝術同議題嘅作品
Hello,大家好,我哋係由韓國人話你知每日最新韓國資訊嘅Creatrip。
#韓國電影#推薦
#韓國電影必睇清單
韓國電影唔單止以精彩嘅劇情或者超高技術嘅CG特效吸引人,其實喺呢幾十年韓國電影嘅發展當中,有唔少經典同好值得睇嘅作品面世。
比起荷李活電影,對於大眾嚟講相對陌生嘅韓國電影入面,小編就揀咗12套可以稱為韓國市場經典嘅電影,大家一齊嚟睇吓啦。
✨馬上Follow我哋IG
instagram.com/creatrip.hk
12套經典韓國電影推薦
《綠洲》2002
- 主演:薛耿求、文素利
綠洲係沙漠中最後嘅希望,咁人類生活嘅綠洲係咩呢?
導演李滄東2002年嘅作品《綠洲》即使已經上映左10幾年,但喺今日嚟睇都仍然係經典。
頂罪入獄嘅男主角遇到重度小兒麻痹,行動不便嘅女主角,兩個人竟然成為彼此生命當中嘅「綠洲」。
電影《綠洲》嘅運鏡好完美咁講述左單純嘅善念同惡意,亦都係韓國電影當中最經典、殘酷嘅作品之一,更加成為導演李滄東到今日都仲係廣為人知嘅代表作品。
《寄生上流》2019
- 主演:宋康昊、李善均、曹如晶、崔宇植、朴素淡、張慧珍
以勢如破竹嘅氣勢,橫掃海內外影展,仲奪下咗奧斯卡四項大獎嘅電影《寄生上流》,劇情係講主角一家為咗喺社會底層翻身,以唔同嘅手段混入所謂嘅上流階級嘅一個家庭,最終沉淪喺呢一個咁樣嘅現實入面嘅故事,結局嘅收尾更加係令所有人都覺得意外。
雖然韓國國內對呢套電影嘅評價褒貶不一,但奉俊昊導演運用咗大量嘅鏡頭語言,將所謂嘅「上流」同「底層」生活作出咗完美嘅對比同連接,劇本探討社會本質同現實面嘅故事,令到《寄生上流》永遠都喺影壇上面佔一席位。
《7號房的禮物》2013
- 主演:柳承龍、朴信惠、葛瀟轅、吳達庶、朴元相、金正泰、鄭滿植
被譽為係韓國電影史上最令人感動嘅電影《7號房的禮物》,心地善良、患有智能障礙嘅男主角柳承龍無辜咁捲入咗姦殺幼童嘅案件,得六歲智商嘅佢喺警方嘅壓迫之下被迫認罪。
呢套電影最感人嘅地方,就係將冰冷無情嘅監獄變成一個溫暖嘅地方,喺呢一個咁細嘅房入面,最後一份禮物到底係死亡定係自由呢?
成套電影雖然係講述無情嘅監獄,同埋人性嘅痛苦仲有罪惡,不過好多鏡頭入面,《7號房的禮物》反而係用好溫暖嘅色調去拍攝,造成咗令人心碎嘅反差。
《致允熙》2019
- 主演:金喜愛、中村優子、金素慧、成侑彬、木野花
一封寄俾媽媽嘅信,揭開咗長達20幾年以來,媽媽一直隱瞞住嘅秘密。
致允熙,允熙係邊個呢?允熙就係我哋,係我哋心裏面永遠都忘記唔到嘅名。
電影用咗非常之靚同埋緩慢嘅畫面,傾訴唔會因為時間而變質嘅思念,咁樣嘅愛,無論係允熙定係其他人,允熙同佢個女,佢個女同埋男朋友,都好似電影入面嘅白雪一樣咁純潔、令人動容。
《致允熙》都喺第56屆百想藝術大賞到入圍咗好多個獎項,係藝術價值相當高嘅一套電影,劇情雖然簡單,但主角嘅情緒相當之溫厚,係小編想推薦畀大家嘅一套經典嘅韓國電影。
《密陽》2007
- 主演:全度妍、宋康昊
老公過身,帶住個仔返到故鄉嘅媽媽,面對個仔畀人綁架、撕票嘅殘忍事實。
佢藉住上帝嘅力量進行療傷,但事實上信仰同罪惡嘅糾纏早已經超乎想像,對於脆弱嘅人心來講,「相信」救贖其實只有心靈上嘅作用,實際上係冇太大嘅效果。
全度妍嘅演技一早已經獲得國際嘅肯定,喺韓國電影《密陽》入面,佢演出咗令人深刻嘅情感波動。
喺經歷完喪子之痛之後,嗰種生無可戀嘅情感更加係令人難忘,同樣都係李滄東最令人深刻嘅作品之一。
《韓流怪嚇》2006
- 主演:宋康昊、邊希峰、朴海日、裴斗娜、高我星
《韓流怪嚇》算係韓國電影走上國際嘅第一步,講述漢江出現咗一隻殺人嘅怪物,造成國民恐慌,揭露人類真實嘅人性面。
雖然已經係十幾年前嘅電影,特效都有啲假,但係佢仍然佔有南韓影史上面一個舉足輕重嘅地位。
奉俊昊導演用佢專屬嘅手法處理鏡頭,獲得咗非常之高嘅評價。
《韓流怪嚇》上映一個月之內,觀影人數就超過千萬,喺《阿凡達》上映之前係韓國影史上最賣座嘅電影。
《炸雞特攻隊》2019
- 主演:柳承龍、李東輝、李荷妮、陳善圭、孔明
一班警察為咗追捕犯人,喺犯人據點外嘅炸雞店執行秘密任務,結果意外咁獲得咗唔少經營炸雞店嘅心得,變成咗一間遠近馳名嘅炸雞店!
比起老本行,賣炸雞好似先係呢一班警察嘅天份,搞笑嘅劇情令《炸雞特攻隊》呢一套韓國電影成為韓國搞笑片嘅經典。
即使呢五個人意識到「唔可以再淨係賣炸雞」而選擇加價,都仲係阻擋唔到炸雞店變得咁熱門嘅事實。
最後,《炸雞特攻隊》喺韓國電影史上獲得咗季軍嘅觀影人次,突破1,600萬次觀影記錄。
《半世紀的諾言》2014
- 主演:黃晸玟、金侖珍、吳達庶、羅美蘭
韓戰永遠都係韓國人心目中難以磨滅嘅傷痛。
電影《半世紀的諾言》就記錄咗呢一個殘酷嘅時代:喺逃難嘅過程當中,主角同佢嘅爸爸、細妹走散,但佢仲記住佢爸爸講嘅最後一句說話「喺國際市場嘅花粉之家相見」,艱苦咁成長甚至去到越戰嘅戰場工作,都只係為咗獲得高額嘅報酬,用嚟維持家計同埋守護「花粉之家」呢一個地方。
戰爭唔單止會造成死傷,更加會令成個時代變得沉重。
《半世紀的諾言》係韓國史上第四賣座嘅電影,寫實嘅鏡頭記錄咗多數韓國人難以忘懷嘅悲傷軼事,係相當之經典嘅韓國電影之一,值得大家用心感受。
《與神同行》2017
- 主演:河正宇、車太鉉、朱智勛、金香起、都敬秀、金東旭、吳達庶、李政宰
《與神同行》嘅第一集係永遠嘅經典,因公殉職嘅消防員成為咗地獄嘅貴人,需要通過七大地獄:謊言、怠惰、不義、背叛、暴行、殺人、天倫嘅審判先可以成功轉世。
不過過程當中,枉死嘅細佬成為陰陽兩界都不安嘅存在,同貴人同行嘅三位使者必須要出面解決呢啲難關。
《與神同行》最經典嘅部份就係喺劇情最後嘅轉折,同埋每個地獄審判入面,令人忍唔住心碎、落淚嘅故事。
而續集《與神同行:最終審判》都喺韓國海內外獲得突破性嘅成績,成為韓國影史上相當之經典同埋具有代表性嘅電影。
《愛不怕》2014
- 主演:郭時陽、李在濬
《男朋友·男朋友》又叫《夜間飛行》,係韓國少數嘅同志電影,亦都係呢位導演嘅同志電影系列作品之一。
講述同志高中生愛上同校嘅古惑仔,亦都比其他人發現佢同志嘅身份之後遭遇到欺凌同埋性侵。
兩個人喺最孤獨嘅時候相遇,無論係愛情定係友情,呢一種感情都係相當之勇敢。
呢套韓國電影《男朋友·男朋友》嘅色調好唯美,壓抑嘅情節同埋配樂都令人覺得好憂鬱,更加係韓國經典嘅同志電影之一,大家有興趣嘅不妨可以睇吓。
《熔爐》2011
- 主演:孔劉、鄭有美
《熔爐》改編自真實嘅「仁和瘖啞學校」教職員性侵、欺凌學生事件,成套電影似乎氛圍好安靜,但喺配樂同演員嘅張力之下,獲得令人窒息嘅效果。
而《熔爐》嘅上映,更加促成咗國會設立《性侵害防止修正案》,產生咗一定嘅社會力量。
據了解,孔劉當初當兵嘅時候就收到《熔爐》嘅小說,退伍之後更加四圍奔走,終於促成電影嘅拍攝。
而孔劉同鄭有美亦都係自從《熔爐》開始連續咗好幾套作品合作無間。
《82年生的金智英》2019
- 主演:鄭有美、孔劉、金美京
女主角嘅背景就係1982年生,個名係最普通嘅智英,喺韓國街上面大嗌「智英啊」可能同時會有兩三個人擰轉頭。
《82年生的金智英》就係記錄住平凡女仔喺成長當中會遇到嘅每一件事:重男輕女、性騷擾、職場不平等對待、夫家嘅壓力。
到最後,智英呢個名好似已經唔係自己,只係人哋個女、老婆、媽媽。
鄭有美接演咗《82年生的金智英》之後收到好多惡評,因為呢套電影嘅原著,係韓國女權主義嘅經典代表作,所以好多女明星讀完呢本書都會受到抨擊,但如果係男星就反而一啲事都無。
而呢套電影喺NAVER上面嘅評價,都以男女為主,呈現相當之兩極化嘅評論。
✨馬上Follow我哋IG
instagram.com/creatrip.hk
其他延伸閱讀 | |
![]() | ![]() |