仁寺洞美食總整理
原來仁寺洞可以有咁多好嘢食？韓國傳統菜、素食等每樣都可以滿足到大家！
Hello，大家好，我哋係由韓國人每日提供最新韓國旅行資訊嘅Creatrip。
講到仁寺洞，可能以為只係得傳統禮物或景點行，不過其實呢度都有唔少美食，今日就等小編帶大家去幾間最近大熱嘅餐廳！好多都係用咗韓屋去設計，唔單止有氣氛，而且味道仲要一啲都唔差，有興趣嘅朋友可以先save底，之後再飛嚟食餐好！
仁寺洞美食總整理
1. 長水天空韓牛（인사동 장수하늘소）
長水天空韓牛用嘅韓牛都係由長水直送到首爾，長水韓牛養殖海拔500米以上高冷山區，喺大自然生長而有優良肉質。
喺長水天空韓牛可以以最優惠價格食到1++No.9最高等級韓牛，加上引進最先進設備、寬敞座位區同包廂、等客人可以喺舒適環境食飯，就算一個人去都可以食得好開心！
長水天空韓牛（인사동 장수하늘소）
- 地址：서울 종로구 인사동길 34-1
- 營業時間：11:30 - 21:30（Break Time 15:00 - 17:00）、週末12:00 - 21:00（Break Time 16:00 - 17:00）
- 價格：韓式醃製烤肉（점심 한우 양념불고기）￦25,900、西冷（투뿔 채끝）₩50,000/110g、雪花肋眼（투뿔 꽃등심）₩55,000/110g、 菲力（투뿔 안심)₩59,000/110g
2. DOMA（도마）
如果問到最近仁寺洞有咩好食，應該有唔少韓國人都會推薦大家去呢一間DOMA！每日11:30開門，唔使好耐已經坐滿晒人，一到Lunch Time一定要等位。
餐廳內部用咗韓屋設計去裝修，雖然位唔算多，不過都夠闊落，而且夠乾淨。
當日小編叫咗兩個套餐，炭烤參雞營養石鍋套餐雞肉好嫩，同銀杏一齊食意外地夾！排骨石鍋套餐一樣都係肉嫩，裏面有唔少蘑菇片，一齊食超好味！每一個套餐都會附上一個大醬湯，比起一般大醬湯佢更加濃郁，令人忍唔住飲完一啖有一啖！
提提大家：食嘅時候大家要先將飯同肉擺喺個碗度，剩低少少飯，職員會過嚟幫大家加茶，用蓋冚住會變成鍋巴粥，而家諗返起都令人好回味。
DOMA（도마）
- 地址：서울 종로구 인사동8길 6-1
- 營業時間：11:30 - 21:50（Break Time 14:30 - 17:00）、星期一休息
- 價格：炭烤參雞營養石鍋套餐（숯불 삼계 영양 솥밥 정식）₩18,000、 排骨石鍋套餐 （갈비 솥밥 정식）₩21,000
- 小Tips：由鐘路3街站5號出口行405m
3. BongTak BBQ Restaurant（봉탁 항아리바베큐）
想同時食到豬肉同雞肉？小編有好介紹！可以去仁寺洞BongTak BBQ Restaurant ！呢間唔少電視台都有佢訪問過，到底佢有咩咁出名呢？
當日小編平日5:30左右去到，已經超多人，大約六點左右就已經full晒，雖然座位唔算好多，不過都算乾淨同闊落。
呢度嘅五花肉唔係普通嘅五花肉，佢係用咗傳統嘅罈子裝住用炭火燒足2個鐘！好香之餘，五花肉嘅肉汁仲保留住！除咗有辣炒雞脾肉之外，比較特別係仲有埋雞頸、蝦同埋菇，每款都好好味，各有特色！
Bongtak BBQ Restaurant（봉탁 항아리바베큐）
- 地址：서울 종로구 인사동길 13 2층
- 營業時間：星期二至日 11:30 - 22:00（Break Time 15:00 - 17:00）、逢星期一休息
- 價格：Bongtak罈子燒烤 Set 1人份（봉탁 항아리 바베큐 set 1인분） ₩18,000
- 小Tips：由鐘路3街站5號出口行237m
4. Namdosikgaek （남도식객）
呢間Namdosikgaek就係喺人人商場正對面（Osulloc隔離）嘅一條小巷入面，要去嘅話都好容易搵到。
呢度用咗韓屋風格去裝修，俾人一種好傳統嘅感覺，因為網上好多評價都係大讚，小編專登避過人多嘅時候，大約5點左右就去到。
小編叫咗佢哋嘅招牌菜宫廷炖牛排骨，雖然份量唔算好多，不過肉質真係超嫩！同個汁好夾，大家可以邊食肉邊配白飯，不過講到韓國人食法，一定係食哂所有飲後，將白飯倒入個汁到，撈埋一齊食。
Namdosikgaek （남도식객）
- 地址：서울 종로구 인사동길 47-6
- 營業時間：10:00 - 21:00、逢星期日休息
- 價格：宫廷炖牛排骨2-3人份（궁중소갈비찜 2~3인분）₩36,000
- 小Tips：由安國站6號出口行300m
5. 沒掛招牌的泡菜湯店（간판없는 김치찌개）
成日聽人講嚟韓國都要試吓泡菜湯，不過邊度有平又好食？可以試吓去仁寺洞嘅沒掛招牌的泡菜湯店！
餐廳分咗兩層，不過可惜小編去到2樓有人預約咗，影唔到俾大家睇，不過一樓都好有韓國舊式餐廳氣氛。
泡菜湯至少要叫兩人份起，小編仲另外叫多咗個拉麵，湯底唔算太辣，泡菜味好濃郁，裏面本身仲有埋魚糕，嚟食一定可以食得好飽肚！
沒掛招牌的泡菜湯店（간판없는 김치찌개）
- 地址：서울 종로구 인사동10길 23-14
- 營業時間：星期六至二 08:00 - 15:30、星期三至五 08:00 - 20:30（Break Time 15:30 - 17:00）
- 價格：泡菜湯至少2人份起（김치찌개 2인분 부터 ）₩8,000@一人份、拉麵（라면 사리）₩2,000
- 小Tips：由安國站5號出口行213m
6. 首爾元祖辣燉鮟鱇魚（서울원조아구찜）
首爾元祖辣燉鮟鱇魚堅持用新鮮食材去料理，出名量多價錢平！遠望已經可以見到到老闆娘肖像，佢對每一位客人都好親切。
呢度有好多位，就算團體去都冇問題！
雖然小編係叫咗細份，但份量真係好誇張...就算3個人食都夠飽。睇圖可能會覺得好辣，不過大家可以放心，辣度係可以調整，唔食得辣嘅朋友只要事前同職員講聲就可以。另外只要係我哋會員仲可以享有9折優惠！
首爾元祖辣燉鮟鱇魚（서울원조아구찜）
- 地址：서울 종로구 삼일대로 436-1
- 營業時間：每日10:00 - 02:00
- 價格：辣燉海鮮細份（해물찜小） ₩40,000、蒸花蟹細份（꽃게찜小）₩40,000
- 小Tips：由鐘路3街站5號出口行207m
7. 仁寺洞蒜泥包肉（인사동마늘보쌈）
呢間「仁寺洞蒜泥包肉」以豐富傳統韓式料理聞名，上過唔少電視節目。
店入面嘅天花板、牆紙、擺設都仿造傳統韓屋設置，超有氣氛，而且規模都唔細，更有包廂空間。
小編叫咗3人套餐，當中包括：蒜泥包肉（中） + 燉泡菜（小）+ 罈子米酒（鍋巴or栗子），份量相當多，呢到嘅蒜泥醬好特別，佢係混合蒜頭同柚子所做成，同豬肉一齊食好夾，燉泡菜有埋肉一齊煮，肉超嫩配熟哂嘅泡菜一齊食一流！而米酒小編揀咗栗子味，有啲似係栗子口味梳打水，幾特別同好飲。有興趣嘅朋友，可以用我哋提供嘅優惠券，埋單嘅時候出示可以有9折優惠！
仁寺洞蒜泥包肉（인사동마늘보쌈）
- 地址：서울 종로구 인사동8길 12-5
- 營業時間：11:00 - 22:00（Break Time 15:00 - 17:00）
- 價格：3人套餐（3인한상）₩63,000
- 小Tips：由安國站5號出口行381m
8. 五世界香（오세계향）
韓國好似成日都大魚大肉，冇咩好嘢啱素食者？咁樣諗就大錯特錯啦！五世界香係一間出名素食餐廳，唔單止韓國人鍾意，好多遊客都會專程嚟食！入到去舖頭仲會見到掛住素食主義者嘅外國藝人相。
餐廳係用咗韓屋設計，雖然好簡約但就俾人一種好舒服嘅感覺。
小編當日就試咗佢哋嘅嫩豆腐湯同烤素肉包飯。嫩豆腐湯有分辣同唔辣兩個版本，小編今次揀咗辣，豆腐係佢哋親自整，味道都幾唔錯，令人印象深刻。而烤素肉包飯小編覺得雖然唔係用肉去整，但味道同真正嘅冇咩分別，用菜包住食更加好味。
五世界香（오세계향）
- 地址：서울 종로구 인사동12길 14-5
- 營業時間：平日11:30 - 21:00（Break Time 15:30 - 17:00）、週末11:30 - 21:00（Break Time 16:00 - 17:00）、達星期四休息
- 價格：嫩豆腐湯（순두부 찌개）₩11,000、烤素肉包飯（현미불구이쌈밥）₩13,000
- 小Tips：由安國站6號出口行225m
9. Kkot, Bape Pida/A Flower Blossom on the Rice（꽃,밥에피다）
第二間想同大家推薦嘅素食店就係「Kkot, Bape Pida」，佢哋用嘅都係有機食材，而且仲有好多款揀。
今年已經係第4年入圍米芝蓮餐廳！可想而知佢有幾咁出名同好食！餐廳內部唔算好多位，如果有興趣去建議可以先預約。
呢度用嘅食材都係有機，呢個拌飯總共有七種唔同材料組成，食嘅時候會覺得好健康，另外亦都可以再放啲辣椒醬同麻油去吊味，食完仲會覺得好飽，就算唔係素食者，食完都會難忘。
Kkot, Bape Pida / A Flower Blossom on the Rice（꽃,밥에피다）
- 地址：서울 종로구 인사동16길 3-6
- 營業時間：Lunch 11:30 - 15:00、Dinner 17:30 - 21:00（Last Order 14:30 & 20:30）、Course Last Order 14:00 & 20:00
- 價格：Bojagi拌飯套餐Lunch Only（보자기 비빔밥 세트 - 점심만제공）₩22,000
- 小Tips：由安國站6號出口行185m
10. 開城餃子宮（개성만두 궁）
由2017年起，仁寺洞「開城餃子宮」就一直受到米芝蓮指南推薦，成日經過都會見到有好多人喺度排隊。
小編當日去仲有兩位職員包餃子，皮薄餡多，每日新鮮整！
呢度嘅餃子鍋最少要叫2人份，可以唔同口味一齊叫，泡菜口味辣咗啲但夠惹味，豬肉餃子味道重咗啲，但都一樣好味，價格方面雖然貴咗啲，但絕對係值得！
開城餃子宮（개성만두 궁）
- 地址：서울 종로구 인사동10길 11-3
- 營業時間：星期一至六11:30 - 21:00（Last Order 20:30）、星期日11:30 - 20:00（Last Order 19:30）
- 價格：豬肉餃子（고기만두전골）₩16,000、泡菜餃子（김치만두전골）￦19,000
- 小Tips：由安國站5號出口行370m
今日同大家介紹咗好幾間仁寺洞美食餐廳，希望大家都會鍾意啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk