韓國小菜做法/食譜
喺屋企都可以輕鬆做韓國小菜！六種韓式小菜食譜公開！涼拌菜、煎餅、雞蛋捲全部都超簡單
Hello，大家好，我哋係由韓國人話你知每日最新韓國資訊嘅Creatrip。
嚟韓國最大嘅樂趣之一，就係喺餐廳食到唔同種類嘅小菜（韓國小菜文化請撳我），但大家又有冇諗過喺屋企整當去咗一轉韓國呢？不過想要整泡菜嘅朋友，可以先考慮下直接買現成（哈哈），因為泡菜醃製嘅時間要好耐。其他嘅韓國小菜食譜攻略都可以參考呢篇！
韓國小菜做法教學
韓式煎火腿肉
- 材料：火腿腸或者午餐肉、雞蛋
煎火腿腸喺韓國係一款常見嘅小菜，同時亦都算係韓國大型節慶一定會出現嘅煎餅之一。做法好簡單，將火腿切片，沾上蛋液落鍋煎，記得絕對唔好加鹽（因為火腿鹹度已經好夠），兩面煎到金黃色就可以即刻夾起。如果想要蛋汁厚啲，蛋液可以加少量麵粉。
나이스EJ
煎火腿大概係所有韓國人都一定會食過嘅料理，小編有時候喺屋企唔知道要食啲咩，都會整佢配白飯食，輕輕鬆鬆就可以解決一餐。
涼拌大豆芽/ 芽菜
- 材料：大豆芽、蔥、芝麻、蒜蓉、麻油、醬油、鹽
韓國咁多小菜之中，涼拌大豆芽最深得小編心，做法好簡單：300g嘅大豆芽洗乾淨之後，落鍋煮兩分鐘之後撈起，即刻過冷河，最後用手揸乾大豆芽多餘嘅水份。再將蔥、半匙蒜蓉、1大匙麻油、半匙鹽、半匙醬油等一齊撈勻（想要食辣嘅話可以加半匙辣椒粉上色），最後灑上芝麻就可以。
料理過程好簡單，唔需要太長時間醃製，幾乎係即做即食嘅小菜，大家又學識咗未呢？
涼拌菠菜
- 材料：菠菜、鹽、蒜蓉、醬油、麻油、芝麻
10000recipe
呢款小菜亦都係韓國餐廳成日都會見到，做法同頭先介紹嘅涼拌芽菜類似，甚至係更加簡單。
首先菠菜洗乾淨之後，唔需要切得太細，儘量分成兩、三段就得，再喺滾水入面加鹽，落鍋大概40秒左右（唔好煮超過1分鐘，菠菜會變得好腍，冇咗小菜嘅爽脆口感）後撈起，放入冰水過冷河之後，最後用手揸乾芽菜多餘嘅水份。
放入半匙蒜蓉、1匙或者2匙醬油（按照個人口味）、1匙麻油、芝麻（如果覺得唔夠鹹，就落少少鹽），最後一齊撈匀入味。
因為煮嘅時間比較短，所以菠菜仲會維持鮮豔嘅綠色同口感，呢個韓國小菜真係好好嘅下飯菜，小編都會喺屋企自己煮嚟食。
涼拌醃蘿蔔
- 材料：醃黃蘿蔔、糖漿、辣椒粉、蒜蓉、蔥末、麻油、芝麻
10000recipe
涼拌醃蘿蔔其實唔係嗰種由頭開始醃嘅，而係直接用現成嘅醃黃蘿蔔，做成韓式風味，做法都係非常簡單，味道都同韓國餐廳提供嘅好類似，大家可以參考一下。
首先先將醃黃蘿蔔嘅水倒出，留底蘿蔔，再倒入50g嘅糖漿攪勻，醃製6個鐘左右，令蘿蔔唔好咁鹹。6個鐘之後，就可以用飲用水沖洗，大概洗兩次之後用手將蘿蔔揸乾就可以。
最後倒入半匙辣椒粉、半匙蒜蓉、蔥同半匙麻油、芝麻攪勻就可以食得。
翠肉瓜煎餅
- 材料：翠肉瓜、火腿肉（或豬肉碎）、雞蛋
同啱啱嘅煎火腿好似，翠肉瓜煎餅喺韓國都係大型節日一定出現嘅美食，做法相當簡單。
將翠肉瓜切片（唔好太厚如果唔係就熟唔到），中間挖一個窿，塞火腿或者係豬肉碎，沾上蛋液落鍋煎。
폰요리
如果要上色比較靚啲嘅話，都可以喺蛋液加麵粉，直到煎到兩面金黃就可以食，或者唔加肉都可以，直接只煎翠肉瓜。
雞蛋捲
- 材料：雞蛋、紅蘿蔔碎、蔥、黃糖、鹽
韓國餐廳經典嘅雞蛋捲，可以話係韓國版嘅玉子燒，喺小菜入面最難（？）嘅一種，睇落雖然唔容易，但其實整落都算相當簡單，一齊同小編睇落去啦。
將六隻雞蛋、紅蘿蔔碎、蔥、少少糖、鹽一齊撈勻，然後準備落鑊。記得火唔可以開太大，第一次倒1/3落去，稍微煎熟之後捲起。喺倒第二次蛋液嘅時候，記得前後左右都要多留少少空間。
倒入剩餘嘅蛋液之後，火可以稍微開大啲，令蛋捲嘅外型固定，記得四邊都要定型，咁先係韓國雞蛋捲嘅正確形狀。起鑊之後切片，就大功告成。
以上就係六種韓國居家必備嘅小菜，做法都相當簡單，一定可以輕鬆複製出正宗韓國味。仲諗緊今日食咩而仲未決定嘅話，不妨收藏呢篇韓國小菜料理食譜，做出屬於自己嘅韓國味啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk