Hello，大家好，我哋係由韓國人話你知每日最新資訊嘅Creatrip。
＃韓國調查＃情侶埋單文化
＃應該男仔埋單？＃定係AA？
小編之前都有出過一篇關於韓國人聚餐嘅時候邊個埋單嘅文章（相關文章請點我），雖然唔可以100%代表所有韓國人，不過呢樣文化喺韓國都係好普遍。
今日小編就想同大家探討下喺香港都好敏感嘅話題——男女拍拖或者見面嘅時候應該邊個埋單？
韓國有機構就做過呢個調查，甚至有節目討論過呢個主題，咁我地就一齊來睇下結果啦～
✨馬上Follow我哋IG
instagram.com/creatrip.hk
韓國男女約會邊個埋單？
韓國男女初次見面嘅心態（2016年調查）
如果係第一次見面，點樣先知對方唔滿意自己？成日都係聽講成功嘅例子，唔知大家有無聽過第一次見面就失敗嘅例子呢？
平台tong+就收集咗794位未婚韓國男女嘅調查，得到以下嘅答案。
有做過出於禮貌嘅行為？
呢個問題就係基於雖然對方唔合自己心意，但都仲係會保持禮貌回應對方嘅行動。
71.2%女性表示有做過「出於禮貌」嘅行為，男性就只有52.2%。即係話韓國女性大部分喺初次見面嘅時候，就算對方唔合自己心意，都仲係會保持禮貌嘅行為，唔會作出太失禮或者誇張嘅表現；而男性就得一半會咁做。
- 呢啲有禮貌嘅「假行為」大概是邊啲？
| 假行為 | 男 | 女 |
全部埋單 | 38.9% | 6.5% |
留有下次會 再見嘅懸想 | 32% | 19.4% |
稱讚對方嘅 外貌同個性 | 21% | 41.4% |
結束後仍會 繼續聯絡 | 8.2% | 32.8% |
呢啲問題都係基於「對方唔合自己心意」嘅大前提，接近四成嘅男性就算唔鍾意對方都仲係會埋單，剩低果六成可能就係要求AA或者搵藉口走咗。
而「留有下次再見嘅懸想」即係當下唔會即刻落對方面，會繼續傾計甚至會講埋「下次再見啦」嘅說話，男性有三成而女性就得兩成會咁做。
至於女性數據偏高嘅「假行為」就係就算唔鍾意對方都會讚佢，同埋見完面之後會繼續聯絡；男性就得唔夠一成人會繼續聯絡，可能會全部封鎖曬。
- 點解會有呢啲禮貌上嘅「假行為」？
| 原因 | 男 | 女 |
費事媒人尷尬 | 37.9% | 22.6% |
費事對方尷尬 | 28.6% | 18.9% |
想留個好印象 | 24.3% | 14.1% |
因為係好似相睇咁嘅初次約會，好有可能係透過朋友或者媒人介紹，唔少男女會作出呢啲禮貌性嘅行為都係唔想令介紹人尷尬，又或者避免當下令對方難堪，畢竟都算係新識嘅朋友。
韓國男女約會邊個埋單？
韓國男女約會畀錢比例（2019年調查）
再嚟就係拍拖嘅洗費上畀錢嘅比例，呢個調查結果小編都覺得好有趣。
原來韓國比起單一方畀曬全部洗費，更加普遍嘅係「你畀多啲、我畀少啲」嘅形式。
下面就係根據422位20代至30代韓國未婚男女嘅調查結果。
喺單次拍拖嘅花費入面，選擇男女分攤嘅結果顯示，最多人揀嘅答案係男女嘅支出比例6:4（男方畀6成，女方畀4成），佔36.7%；其次嘅男女支出比例係7:3，佔28%；而男女嘅支出比例8:2就佔7.6%，剩低19.7%就係男方畀9成或者全部。
亦即係話，喺韓國男女嘅拍拖洗費入面，大約72%都係男仔會畀多啲甚至畀曬。
至於香港比較多人提倡嘅AA制（5:5），喺韓國就淨係得13.3%人會咁做；女方畀嘅比例大於男方或者畀曬嘅比例更加係不足15%。
單次拍拖嘅洗費平均大約₩63,495（約港幣421），包括食飯、去咖啡廳同埋之後嘅續攤，仲有見面之前買嘅小禮物等等，唔怪之得大家成日話無錢唔好拍拖啦...
其實韓國情侶都會因為拍拖嘅洗費嗌交，71.2%男性就表示試過「對方覺得我應該畀多啲」而嗌交，19.5%男性更加覺得「成日都係我畀得多啲」，仲有2.9%就話因為對方唔畀拍拖洗費而嗌交。
女性嘅回答入面，48.4%就表示「感受到對方想慳拍拖錢」而嗌交；33.2%就話因為收入唔同，對方想AA制而嗌交。
正係拍拖都會因為支出而嗌交嘅情侶，結婚之後都有一半以上嘅夫婦會因為錢嗌交。
韓國男女約會邊個埋單？
韓國男女畀錢心態（2020年調查）
最後係針對參加相睇、約會嘅男女進行嘅調查，由於韓國男性喺拍拖嘅時候要埋單嘅印象比較普遍。
所以分咗三個部分提問：(1) 手頭鬆動嘅時候，對對方有好感 (2) 手頭唔鬆動嘅時候，對對方有好感 (3) 手頭鬆動嘅時候，對對方無好感。
- 手頭鬆動嘅時候，對對方有好感
由於韓國男性嘅性格比較主動，參加呢類相睇或者約會嘅時候，遇到鍾意嘅對象，自然會毫無保留咁付出，而且唔覺得可惜。
- 手頭唔鬆動嘅時候，對對方有好感
因為對對方有好感，但自己手頭唔係咁鬆動，又驚女方會係果種「習慣男仔請」嘅類型，所以都會喺食完飯之後，意思意思咁問「不如請我飲杯咖啡？」來確認對方性格。
- 手頭鬆動嘅時候，對對方無好感
呢類男性就表示自己都會畀錢，但只係為咗面子，同埋擔心同介紹人關係尷尬（呢項都符合先前嘅調查結果）。
亦都有一位22歲參與調查嘅大學生表示，自己會驚畀人傳要女仔請食飯，雖然對對方無好感，都係會因為人地嘅目光而畀比較多錢。
而針對女性嘅調查，同樣都會分三個部分：（1）對對方有好感（2）對對方無好感（3）男性主動話要AA嘅時候。
- 對對方有好感
「即使對對方有好感，都唔太會主動畀錢。」呢個係大部分女性嘅答案，除咗順應社會主流，亦都希望對方係對自己有好感，所以畀錢嘅時候無負擔，自己心入面都唔會有太大負擔。
有一個人就話驚自己埋單，會令對方覺得自己大洗，或者係隨便請男人食飯嘅女人。
- 對對方無好感
因為對對方無好感，呢類女性通常會選擇AA制，唔希望令對方誤會，另一方面自己心入面都踏實啲，唔會有果種欠人嘅感覺。
- 男性主動話要AA制
回答呢個問題嘅女性，普遍都表示自己會扮無事應承（畢竟係第一次見面），但會唔開心，甚至會有啲受傷，因為呢個提議好似代表對方唔鍾意自己，都可能係對方好小氣，令自己尷尬。
雖然話男女平等，但喺韓國嘅主流思想入面男性係應該畀錢嘅一方，都令部分女性習慣拍拖嘅時候男性會畀錢，間接造成男性會有種「我畀錢所以你要聽我講」嘅觀念，等同助長大男人主義嘅思想，所以喺韓國男女平等仲有好長嘅路要行。
呢一次就算係比較特別嘅題材，唔知大家又有咩睇法？雖然唔可以代表全部韓國人，但都算係韓國社會上大部份人對於拍拖嘅諗法。
大家有咩意見都可以喺下面留言分享㗎～我哋下次見！
✨馬上Follow我哋IG
instagram.com/creatrip.hk
| 其他延伸閱讀 | |
 韓國請客基準 |  韓式炸雞興起原因 |
