韓國俾錢機制
究竟同韓國朋友食飯應該AA制定要請客？年紀最大就應該要俾錢？
마타티카
2 years ago
Hello，大家好，我哋係由韓國人每日提供最新韓國旅行資訊嘅Creatrip。
大家平時同同事或者朋友出去食飯，係咪都係AA制嘅呢？不過如果大家有試過同韓國人食飯嘅話，就會發現原來佢哋嘅習慣同其他人唔同，有機會為外國帶嚟不便添啊！等小編同大家睇下韓國人喺食飯嘅時候係點畀錢，等大家下次同佢哋食飯嗰陣就唔會唔習慣啦！
韓國俾錢機制
1. 年紀最大嘅埋單
韓國社會非常重視年紀，後輩就一定要聽前輩嘅吩咐，但係喺韓國後輩同大過自己嘅人出去食飯嘅話，就有著數啦！韓國人認為，大個啲嘅喺財政方面更加穩定，所以出去食飯通常會係長輩埋單。
2. 男仔要埋單
唔少韓國男仔喺約女仔出去嘅時候都會主動俾錢，除咗可以show佢哋好有領導能力之外，仲希望喺女仔心入面留有好感。加上喺韓國社會風氣上，個個都覺得男仔係比女仔強，所以就有照顧女仔嘅需要。
3. 今餐你嘅下餐我嘅
大部分香港人喺俾錢嘅時候其實會即刻AA制，但韓國人就鍾意一餐你俾，下一餐我俾咁樣。大家覺得呢種俾錢方法點呢？
4.你請食飯我請食甜品
大部分韓國人約人出街嘅時候都唔會只係食完一餐就走，佢哋通常都係會再食第二餐。食完主食之後，佢哋會去食甜品，之後再飲酒等等，所以通常佢哋都會輪住俾錢！
5. 共同負責
近幾年，韓國嘅俾錢風氣都有慢慢咁改變，而家唔單止只係男仔俾錢，女仔同男仔出去嘅時候都會開始主動話請。而同朋友出街嘅時候，如果提出話想AA制，有啲韓國人都唔會介意，所以大家下次同韓國人出去嘅時候都唔洗一定好介意係咪要請客，如果想AA制嘅話，講清楚俾對方知就ok！
以上就同大家講咗5個韓國人喺食飯嘅時候俾錢嘅基準，唔知大家又覺得點呢？歡迎留言講下你哋嘅睇法啊！
如果有更多想知嘅內容，都可以隨時留言或者dm話俾我哋知：）
Instagram：creatrip.hk