625戰爭電影
625戰爭70周年 從三套電影睇韓戰，每一位小人物都係戰爭入面嘅英雄！
Hello，大家好，我哋係由韓國人話你知每日最新韓國資訊嘅Creatrip。
2020年係韓國語625戰爭70周年。
1950年初6月25號，朝鮮人民軍越過三八線，進攻南韓，視為韓戰嘅起點。
韓國後嚟都有唔少有關625戰爭嘅電影。
今日要為大家介紹三套小編睇過又覺得值得睇嘅625戰爭電影。
✨馬上Follow我哋IG
instagram.com/creatrip.hk
《長沙里：被遺忘的英雄們》（장사리 : 잊혀진 영웅들）
主演：金明民、崔珉豪、金聖喆、金仁權
上映年份：2019年
呢套電影嘅背景係1950年9月發生嘅長沙里登陸戰。
電影講述韓戰爆發以嚟，朝鮮人民軍勢如破竹，將韓軍逼退到浦項市。
為咗攪亂朝鮮軍隊部署，772個學生兵搭門山號登陸艦去到慶北英德郡長沙里登陸作戰。
呢班學生兵只接受過兩星期訓練，毫無戰鬥經驗，平均年齡只有17歲。
說實話，小編睇呢套電影前，對長沙里登陸戰嘅背景了解唔多。
只係因為小編係SHINee World，為咗支持珉豪而入場睇呢套戲。
小編睇之前覺得自己應該對故事冇咩太大感觸，點知睇到最後喊到收唔到聲。
記得嗰陣坐喺小編前後左右嘅韓國人都有喊。
印象最深刻嘅係最後一幕，其中兩個士兵為咗幫同伴拖延時間，自我犧牲，留到最後還擊，最後中槍身亡嘅畫面。
佢哋雖然年輕，但為咗同伴、國家甘願獻身嘅精神透過電影重現，值得大家記住。
《半世紀的諾言》（국제시장）
主演：黃晸玟、金侖珍、吳達庶、羅美蘭
上映年份：2014年
呢套電影同《長沙里》唔一樣嘅，係佢對戰爭場景嘅描述比較少，著重講韓戰之後韓國人要面對嘅事。
小編嗰陣啱啱喺語學堂學過有關韓國離散家庭嘅背景，就同兩個語學堂嘅同學一齊喺Netflix開咗呢套戲嚟睇。
黃晸玟飾演嘅男主角尹德洙，經歷過韓戰後嘅赴德運動、越南戰爭等等，最後因為越戰而留下腳傷。
結局，尹德洙成功透過KBS播出嘅《尋找離散家屬》節目搵返逃難時失散嘅妹妹，算係大團圓結局。
小編眼淺，睇到好多場景都忍唔住喊⋯⋯尤其係搵返妹妹嗰一幕。
每當有戰爭，自然就會有家庭被拆散嘅悲劇。
南北韓之間嘅三八線，令好多家庭被分隔兩邊，一直到80年代先有電視台舉辦搵返失散親人嘅節目，成功令10,189個離散家屬同親人重聚。當然，更多人冇辦法搵返屋企人，抱有遺憾。
呢套電影上映後，大受歡迎，獲得第52屆大鐘獎最佳影片、最佳導演、最佳劇本、最佳男主角、最佳男配角、最佳攝影、最佳剪輯、技術特別獎、最佳錄音和最佳企劃10個獎項。
太極旗飄揚：生死有情 （태극기 휘날리며)
主演：張東健、元斌
上映年份：2004年
韓戰突然開始，李振泰同李振碩兩兄弟帶住屋企人逃難嘅時候，被強徵入伍。
喺軍隊入面，因為誤會令原本關係好好嘅兩兄弟漸行漸遠，甚至到最後處於敵對狀態。
最後哥哥戰死，細佬成功逃脫，並喺50年後找返哥哥嘅遺骸。
呢套戲係三套入面最耐以前嘅一套電影，喺韓國人眼中係一部經典。
大多數韓國人都會睇過呢一套戲，連綜藝節目講起韓國電影都一定會提起。
小編寫文前有問過韓國同事對呢套電影有咩睇法。
佢話個陣好細個，仲係小學生，但都睇到喊晒。
呢套電影對於兄弟情兄描述，的確賺人熱淚，有時間嘅朋友不紡搵嚟睇下。
戰爭對人民帶嚟嘅痛苦。
《長沙里》入面為同伴衝上前線、犧牲自己嘅士兵；《半世紀的諾言》入面自責大半生嘅尹德洙；《太極旗》入面對細佬十分愛護嘅李振泰。
佢哋都係戰爭入面嘅「犧牲者」，失去嘅大至生命、小至正常生活，但每一個都稱得上係英雄。
帶望大家會鍾意今日小編嘅分享啦！
✨馬上Follow我哋IG
instagram.com/creatrip.hk
其他延伸閱讀 | |
 那些經典韓國電影 |  Netflix韓國電影 |