弘大「Layered」介紹
弘大延南洞都有咖啡一條街！韓妹之間人氣超高「Cafe Layered」探訪
Hello，大家好，我哋係由韓國人每日提供最新韓國旅行資訊嘅Creatrip。
弘大有好多間Cafe，但其實喺另一邊嘅延南洞會有更多local得嚟又啱打卡嘅Cafe等緊大家。今日小編去嘅係延南洞「Cafe Layered」，呢類自助拎餐同比錢嘅Cafe最近喺韓國真係越嚟越hit！如果大家都想去試下，咁就要快啲Save低呢篇文章啦！
弘大「Cafe Layered（카페 레이어드）」
弘大「Cafe Layered」資訊
- 地址：서울 마포구 성미산로 161-4
- 營業時間：11:00 - 22:00
弘大「Cafe Layered」介紹
延南洞深處其實都有一條Cafe街，而今日要介紹嘅「Cafe Layered」就係位於呢條街啦！兩層樓嘅紅磚建築，相信只要經過都會忍唔住望多幾眼。而且一直都好紅嘅「延南洞223-14」漫畫Cafe就喺隔離。
店門口已經係一個打卡位，小編去嘅時候係平日朝早，但係都已經有好多人！
因為人多，大家可能會覺得Cafe入面有少少逼。建議大家可以先搵位坐，再去一樓點餐。大家要先去拎完嘢食，再去櫃檯叫嘢飲同比錢。要注意呢度最低消費係一人一杯飲品！
呢度每件甜品都好特別，令有選擇困難嘅小編都諗咗好耐揀咩好，真係好想每一個都買嚟食。
小編最後揀咗呢款狗仔Red Velvet紅絲絨蛋糕，係唔係好cute呢？完全係打卡必備！如果唔想食紅絲絨蛋糕，都有原味蛋糕可以揀~
另一個吸引小編目光嘅就係「Cafe Layered」嘅招牌Scone啦，有朱古力、抹茶、焦糖、芝士等超多款口味！
食嘢之前帶大家參觀吓「Cafe Layered」先啦，呢度裝修以白色同磚頭為主調，周圍都可以見到好多藝術作品，有種中古世紀浪漫感。
「Cafe Layered」雖然有兩層，但因為實在太受歡迎，平日晏晝真係一位難求。所以小編建議大家先揀好位再去點餐，咁樣先可以好似小編咁慢慢影打卡呃Like相。
小編叫咗4款嘢食同飲品，分別係凍美式咖啡（₩5,000）、檸檬蜜（₩6,500）、朱古力Scone（₩4,500）同狗狗紅絲絨蛋糕（₩7,000）。飲品因為都算係韓國Cafe嘅安全牌飲品，所以唔會伏，普普通通咁。
紅絲絨蛋糕比想像中好味，甜甜地，口感亦都好軟，同埋Cream一齊食都幾夾。不過要破壞狗狗造型，真係令人有啲唔忍心。
Scone嘅話小編就覺得有啲太乾，大家食嘅時候最好配埋飲品一齊食。
喺門口亦有呢種打卡鏡，喺IG上成日都會見到唔少韓妹咁影呃Like相。
心動不如行動！「Cafe Layered」另外喺安國、The Hyundai Seoul等等嘅地方都有分店，如果大家睇完小編嘅介紹都有興趣去嘅話，不妨plan落下次嘅韓國之旅，去完都可以喺下面留言話比小編知覺得點㗎！
以上係弘大「Cafe Layered」嘅介紹，有任何問題請先詳讀呢篇文章。
如果睇完之後有任何疑問，或者我哋語言、標示唔清嘅話，麻煩請send email告知，以方便我哋改進。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
