釜山「Centum SPA LAND」介紹

Hello，大家好，我哋係由韓國人每日提供最新韓國旅行資訊嘅Creatrip。

嚟韓國玩當然要去體驗吓汗蒸幕，而釜山最出名嘅汗蒸幕中心就一定係位於釜山地鐵2號線Centum City站，以服務高質聞名嘅「Centum SPA LAND」！今日就等小編帶大家去體驗吓，睇吓入面係點㗎啦！

釜山旅行必知💡

Centum SPA LAND_{(센텀 스파랜드)}

營業資訊

• 地址：부산 해운대구 센텀남대로 35
• 營業時間：08:00~23:00（最後入場 22:00）
• 前往方法：釜山地鐵2號線Centum City站（센텀시티역）12號出口

用優惠價買定入場券👇🏻

實地探訪

釜山「Centum SPA LAND」位於新世界免稅店Centum City店入面，搭地鐵嘅話落車行幾步路就到。

呢間大型汗蒸幕規矩比較多，唔係個個都可以入場！小編幫大家大概整理咗最主要嘅注意事項：

• 7歲以下禁止入場；7~13歲需由同性別成人陪同入場。
• 未滿18歲人士22:00後無法獨自入場，需有成人陪同。
• 有大面積紋身人士禁止入場。
• 入場時間限4個鐘。

去counter出示入場券之後就會得到一個電子手環鎖匙，上面會有你嘅鞋櫃號碼，大家要除好鞋，放入對應號碼鞋櫃，鎖好櫃之後就可以去嘟鎖匙入場。

去到櫃台就可以攞到汗蒸幕衫同毛巾，工作人員會直接幫你揀好size！

另外「Centum SPA LAND」本身營業時間都唔係24小時，而入場券亦只可以用4個鐘，不過如果你有喺入面額外消費超過₩10,000，就可以延長入場時間到6個鐘。

「Centum SPA LAND」總共有兩層，環境非常闊落，大家可以參考平面圖，搵你想去嘅地方！

除咗一般嘅搓澡、沐浴服務之外，現場亦都有按摩椅，雖然要另外俾錢用，但係真係幾舒服XD

「Centum SPA LAND」亦都有唔少公共空間，有好多地方可以瞓低休息。小編去嘅時候其實已經接近閂門時間，所以現場冇咩人，所以會比較安靜，可以充分休息。

講起「Centum SPA LAND」一定唔少得呢個戶外足浴Zone！大家可以喺度浸腳休息，而且因為係公共空間，所以亦可以同另一半或者朋友喺度會合，一齊享受療癒時光。

呢度仲有各種汗蒸幕，溫度同功效都唔同，大家可以逐個體驗吓。

同其他汗蒸幕一樣，釜山「Centum SPA LAND」都有小食部，選擇都多，不過價錢就唔太平。如果想喺度買嘢食，同樣只要先感應電子手環鎖匙，走嘅時候俾錢就得。

嚟韓國汗蒸幕就當然要試甜米露同食雞蛋啦！大家可以坐喺呢種common area食，不過要記住垃圾唔好四周圍亂揼啊！

食飽飽之後大家就可以好似小編咁，瞓喺梳化櫈度一邊睇電視一邊休息。

另外呢度都好貼心嘅係有提供免費手機充電服務，而且有埋密碼鎖，大家可以直接將手機寄放喺度就得。

如果想體驗按摩服務，大家記住要早少少去，因為服務時間係固定㗎！

整體嚟講，釜山「Centum SPA LAND」的確係小編去過最高級嘅大型汗蒸幕，無論係設施定工作人員嘅服務都夠高質不過費用就比起其他汗蒸幕貴少少。推薦大家下次去釜山一定要抽時間嚟體驗！

前往方法

喺釜山Centum City站12號出口出，向Gate 4方向行，就會見到位於新世界百貨公司嘅「Centum SPA LAND」。

釜山「Centum SPA LAND」原則上係全年無休，不過新世界百貨每個月休息嘅時候，Spa Land都會跟住唔開，大家可以參考以下文章，睇清楚每個月幾時會休息。

用優惠價買定入場券👇🏻

如果有更多想知嘅內容，都可以隨時留言或者dm話俾我哋知：）

✨Instagram（@creatrip.hk）

🔗Threads（@creatrip.hk）

🛍️韓國代購服務

Mail：help@creatrip.com