2023大邱咖啡廳總整理
最強大邱懶人包！13間高質大邱cafe整理！現代藝術、IG打卡、工業風唔同風格嘅Cafe
Hello，大家好，我哋係由韓國人話你知每日最新韓國旅遊資訊嘅Creatrip。
喺大邱除咗食好嘢，點可以唔去Cafe打卡，體驗自在慢活嘅「大邱生活」。小編就精心挑選咗12間大邱最熱門嘅人氣Cafe，大家之後嚟大邱旅遊千祈唔好錯過，一齊喺靚靚Cafe入面Hea成個下晝，仲要喺IG上面瘋狂打卡！
大邱咖啡廳推薦
1. 文畫裝（문화장）
好似現代美術館咁嘅Cafe「文畫裝」，前身其實係一間旅館同韓式汗蒸幕。不過成幢大廈就化身成為一間Cafe，而原本嘅裝修就完美咁成為Cafe嘅一部份，超現代嘅藝術風格令小編諗起同樣由汗蒸幕改造而成嘅清州咖啡廳「Mokgan」，不過同嗰度唔同，呢間喺大邱嘅「文畫裝」有更加適合打卡嘅擺設，小編超級推介。
呢間「文畫裝」Cafe空間超大，四層高嘅建築再加埋頂樓嘅天台，每一層擺設、畫風都唔同，令人入到每一層都會有驚喜，真係好似行緊現代藝術館咁。如果鍾意呢一種風格嘅Cafe嘅朋友，嚟到大邱一定要去文畫裝，享受下午後嘅時光。
最後，喺文畫裝一定要嗌嘅就係三重抹茶latte，小編一飲已經覺得相當驚艷，係近期喺大邱飲過最有特色嘅飲品之一。柔軟嘅奶油唔會過甜，反而令成杯latte更加有韻味，加埋朱古力卷蛋，簡直可以話係完美！
2. Warm Moist Air（웜모이스트에어）
- 地址：대구 중구 경상감영길 210 2F
- 營業時間：星期二至星期日11:00 - 23:00、星期一休息
Warm Moist Air（wmoa）係今年6月先開幕，不過就以時尚、率性嘅風格深受大邱人嘅喜愛，絕對係當地近期最熱門嘅Cafe之一，由入口開始去到建築嘅內部都睇得出佢嘅心思。
佢嘅裝修其實非常之簡單，但係唔同嘅元素組合埋一齊喺一間Cafe入面，仲要唔顯得突兀，反而可以呈現到Cafe嘅質感，相當啱小編嘅心水。比起頭先介紹嘅「文畫場」，有另一種截然不同嘅前衛感覺。
wmoa嘅latte令人諗起又甜又柔軟嘅維也納咖啡，上面嘅奶油順滑、易入口。另外，綠色嘅抹茶餅乾都好好食，入面有白朱古力，配搭相當之完美。好推薦大家嚟大邱嘅時候坐喺Warm Moist Air窗前面嘅位置，享受午後嘅時光。
3. Blue Blues（블루블루스）
- 地址：대구 남구 중앙대로45길 56
- 營業時間：11:00 - 23:30
- 優惠：下載優惠券，享全品項9折
大邱Cafe「Blue Blues」，顧名思義成間舖都充滿令人好舒服嘅藍色色調，就好似喺天空一樣，仲有一朵朵嘅白雲。呢度都好近大邱景點之一「啟明大學」，適合大家去完參觀校園之後，坐喺度享受好似雲一樣咁嘅甜品。
俾大家睇吓「Blue Blues」可愛嘅內部空間，係咪好特別呢？同其他IG打卡Cafe嘅感覺唔同，呢一間Cafe係用清新嘅色調同擺設，做出一種舒服嘅氣氛，等大家有一種真係喺天空入面飛翔嘅感覺。
呢度連甜品都令人驚嘆，可愛到唔捨得食！有好似雲咁嘅分層嘅嘢飲就有四種口味，分別係藍色（汽水/yogurt）、黃綠色（薄荷朱古力）、綠色（綠茶）同埋可愛嘅粉紅色（yogurt/車厘子/士多啤梨），再配埋彩虹分層蛋糕，就係一個又可愛又好味嘅下午茶啦。
4. 對話之場（대화의장）
- 地址：대구 중구 북성로 104-15
- 營業時間：星期二至星期日11:00 - 22:00、逢星期一休息
「對話之場」係大邱最近嘅新文化空間，韓文名意思係「對話嘅場所」，就同佢個名一樣，呢間Cafe成日都舉辦啲展覽、小型手作會、市集等等，小編第一次去呢度嘅時候都比呢度嘅文化氣息深深咁吸引住。
大邱cafe「對話之場」有好多座位，好似小型藝術空間咁，亦都有出售自家製嘅商品，大家可以周圍行吓。而「對話之場」唔同嘅空間氣氛，迎合咗大邱年輕人多樣性嘅口味，尤其係下面嘅擺設，令小編諗起傳統嘅韓屋裝飾。
小編嗌咗番茄羅勒披薩、無花果蛋糕、奶油芝士latte同凍美式咖啡。特別推介佢哋嘅奶油芝士latte，唔單止奶油好順滑，仲可以飲到一片片嘅芝士碎片，同埋微微嘅柑桔香氣，飲落口感好豐富，配埋清爽嘅無花果蛋糕同仲有手工Pizza都係超級適合。
5. SungDangMotVill.Cafe（성당못빌）
- 地址：대구 남구 성당로 54-3
- 營業時間：11:00 - 22:00
- 優惠：下載優惠券，享全品項9折
有關注開大邱Cafe嘅朋友，一定對呢片落地窗唔陌生。冇錯，呢個就係大邱最出名嘅Cafe之一「SungDangMotVill」，有一大片斜面嘅落地窗，營造出好似教堂咁嘅莊嚴感覺，好多人都會喺呢一度打卡留念。
「SungDangMotVill」室內同室外嘅位置都令人有完全唔同嘅感覺。室內用黃木傢俬，營造溫暖嘅氛圍，配埋一啲綠色盆栽，令人好似置身喺別墅一樣咁休閒。
喺頂樓嘅打卡位可以睇到一大片藍天，令人心情非常之舒服；室外嘅座位區好天嘅時候仲可以望到頭流公園，喺到欣賞下夕陽都幾好～
「SungDangMotVill」嘅招牌菜單，除咗維也納咖啡之外，其他大部份嘅甜品都幾好食。另外提醒下大家，落地窗前面嗰個打卡位唔係一般座位，只係俾大家打卡，記得影完相要讓俾其他人。
6. 三松麵包 本店（삼송빵집 본점）
- 地址：대구 중구 중앙대로 397
- 營業時間：08:00 - 21:00（Cafe）、麵包店營業至22:00或售完為止
如果幾年前嚟過呢一間舖嘅朋友，對大邱本店嘅印象就係殘舊、唔起眼，不過而家佢已經搖身一變，成為好靚嘅三松麵包店Cafe ！由395號搬咗去隔離嘅397號，擺脫原本又細、又舊嘅外觀，變成有兩層樓嘅Cafe，之後大家嚟大邱嘅話記得唔好錯過啊。
原本好舊同好窄嘅麵包店，經過搬舖同裝修之後，變成好有質感嘅Cafe，嚟大邱嘅旅行喺度休息一陣同揀自己鍾意嘅麵包嚟食，放鬆下啦！
最經典嘅粟米麻藥麵包（₩1,600/個），食落有20%嘅鹹， 80%嘅甜，粟米嘅香味唔會太濃，反而增加咗奶油嘅清爽口感，令人食完一個都意猶未盡，更加係三松1957年開業以來銷量最好嘅麵包，絕對可以話係嚟呢度嘅必食麵包之一。
芝士年糕麵包嘅年糕好煙韌、有彈性，配埋紅豆嘅香氣，令人一啖接一啖咁食完全停唔到。燒蔬菜可樂餅都比小編想像中味道更加豐富，可樂餅再加味道香濃嘅蔬菜，飽足感十足，留一個到晚餐先食都唔會有好重嘅油膱味，依然咁好食。
7. 咖啡明家（카페명가）
要數大邱一帶最出名嘅cafe，或者係當地人都一定會識嘅cafe，莫過於係「咖啡明家」。以鮮豔嘅士多啤梨甜品打響名堂，咖啡明家喺大邱嘅地位可以話係無人撼動到，周圍都有佢嘅分店，只要係Camp By店、La Finca店、金光石街店、EXCO店都可以下載優惠券享有折扣。
睇吓上面呢一張士多啤梨蛋糕嘅相，係咪好吸引人呢？秋冬季嚟到大邱，除咗喺西門市場食到又大又甜嘅士多啤梨之外，最緊要係嚟「咖啡明家」食士多啤梨蛋糕。其他Cafe嘅士多啤梨蛋糕都係蛋糕為主再加啲士多啤梨，得呢到係士多啤梨為主再加蛋糕。
其他飲品都好出色，推薦大家嚟大邱嘅時候一定要去咖啡明家，先可以算係有嚟過大邱。小編都擺咗東城路之外嘅分店地址，畀大家參考下。
咖啡明家 La Finca店
- La Finca店地址：대구 수성구 국채보상로 953-1
- La Finca店營業時間：09:00 - 22:00
咖啡明家 Camp By店
- Camp By店地址：대구 중구 서성로 20
- Camp By店營業時間：08:00 - 20:00
咖啡明家 金光石街店
- 金光石街店地址：대구 중구 동덕로14길 58-10
- 金光石街店時間：11:00 - 23:00（Last Order 21:30）
咖啡明家 EXCO店
- EXCO店地址：대구 북구 엑스코로 10
- 營業時間 : 08:00 - 22:00 (公眾假期 10:00 - 18:00）
8. 飛機咖啡廳（비행기카페）
- 地址：대구 수성구 무학로 42
- 營業時間：目前係預約、詢問制，要至少一日之前致電053-762-2552留位
呢度唔係大邱機場，係大邱好出名嘅Cafe之一「飛機cafe」，位置喺壽城池嘅盡頭，超大嘅黃色飛機好容易搵，仲要係由真正嘅飛機翻新而成，成為一間好有特色嘅Cafe，超級搶眼，如果計劃去大邱壽城池嘅朋友，記得要擺佢做行程之一啊。
Cafe入面可以話係別有洞天，啲位都算闊落，尤其係機艙窗口隔離嘅位置，真係好有坐喺飛機入面嘅感覺！喺呢個空間會有種奇妙嘅錯覺，好似搭緊飛機咁，小編都係第一次有呢種神奇嘅體驗，大家嚟大邱推薦一定要去打卡！
小編嗌咗士多啤梨沙冰、牛油果沙冰同其他一啲糕點。想特別讚下呢間嘅牛油果沙冰，食落口感好順口，有奶香同牛油果香味。而士多啤梨沙冰就偏酸，似普通乳酪嘅口感，不過食完甜野有啲酸酸地嘅口味平衡下都唔錯。
9. 明德麵包坊（명덕빵앗간）
- 地址：대구 남구 명덕로40길 72
- 營業時間：星期二至日08:00 - 22:00、星期一休息
小編係同朋友搵地方休息嘅時候，意外發現到呢一間「明德麵包坊」Cafe，韓屋嘅入口好吸引，令小編都不知不覺行咗入去。入到去都會比舖頭入面嘅氣氛吸引，好難想像喺大邱市區會有呢一種Cafe存在，誤打誤撞都掘到寶！
「明德麵包坊」比起cafe，更加似係有座位嘅麵包店（哈哈）。不過小編都好鍾意呢一點，舖頭入面有日式嘅開放式裝修，行到攰嘅時候好適合留低喺到食住甜品同麵包休息一陣。
小編就嗌左凍美式咖啡、馬卡龍仲有黑芝麻糕，雖然都係啲外國甜品，不過食落都好好味，啲材料配搭得好好，小編覺得好彩發掘到呢一間Cafe，算係大邱之旅嘅意外收穫。
10. Nostalgia Coffee（노스텔지어커피）
- 地址：대구 중구 동성로2길 4-11
- 營業時間：12:00 - 23:50（Last Order 23:00）
位於大邱東城路小街入面嘅「Nostalgia Coffee」，一眼就見到嘅係門口嘅木質裝修，沉穩嘅設計更加令人耳目一新。而行入cafe入面都可以見到鋪頭嘅混搭風格，協調得好好，完全唔會畀人覺得奇怪。
到底係工業風定係懷舊風呢？好似冇一個風格可以形容到呢間Cafe，不過整體來講都係舒服嘅氣氛。除咗風格獨特，喺呢度嗌嘢食嘅性價比小編都覺得幾高，價錢算平，例如凍美式咖啡都只係₩3,500，喺大邱算係好平。
11. a.nook前山（아눅앞산）
- 地址：대구 남구 앞산순환로 459
- 營業時間：10:00 - 22:00（Last Order 21:00）、10:00 - 17:00供應午餐菜單
位於大邱嘅前山公園附近嘅cafe「a.nook前山」，係喺2020年9月先開幕嘅。工業風格嘅設計，加埋可以一覽大邱嘅風景，令呢間cafe好快就出名，想搵一個可以睇到風景嘅Cafe ？小編就推薦呢間「a.nook前山」。
「a.nook前山」望出去嘅風景就係咁樣，靚到令人完全移唔開眼，最前面係韓屋，令成個風景有啲古色古香嘅味道。如果大家想影靚相，建議你哋要早啲去霸位，咁先可以望到窗前面嘅景色。
而a.nook前山雖然係cafe，但都有提供一種叫做「a.nook Shakerato」嘅咖啡雞尾酒，濃縮咖啡配埋鬆軟嘅泡沫，味道都相當之特別，推薦大家一定要試下。
12. A-PLANE（에이플레인）
- 地址：대구 중구 동덕로 36-15 6F
- 營業時間：星期二至日 12:00 - 19:00
- 優惠：下載優惠券，享單杯飲品折價₩1,000
最後一間小編想推薦嘅大邱Cafe，就係位於「金光石街」附近嘅「APLANE」。由上面張相嘅入口行入去裏面，搭電梯去6樓，就可以到達純白裝修嘅APLANE；日頭嚟可以見到藍色嘅天空，下晝嚟就可以見到日落，夜晚仲可以望到夜景，係小編最鍾意嘅Cafe之一。
因為Cafe喺6樓，可以望到大邱市區嘅景色，位於戶外嘅露台推薦大家一定要去望吓。無論係日頭定夜晚嘅大邱景色，喺呢一間Cafe都係一覽無遺，唔使行到山上面已經可以喺市區附近見到呢種美景。
INSTAGRAM：juun.s
小編就嗌咗佢哋嘅奶茶、蜂蜜麥片杏仁奶昔。奶茶有濃郁嘅紅茶味，小編非常之滿意；蜂蜜麥片杏仁奶昔都有好多餡料，食落有飽足感，喺「金光石街」行完街之後，嚟呢度放鬆之餘都試吓「A-PLANE」出色嘅飲品啦。
13. The Differ（더디퍼）
- 地址：대구 중구 서성로 67
- 營業時間：10:00 - 21:00
- 優惠：下載優惠券，享飲品8折優惠
The Differ (더디퍼 카페) 係大邱市中心一間由大型倉庫改建嘅Cafe同酒吧。內部裝修同裝飾係參考中世紀歐洲設計汲取靈感，每個位都可以成為打卡位，可以同好多隻比熊犬一齊打卡影相，留底美好回億。
以上就係小編精選嘅13間大邱Cafe推薦，唔知大家最想去邊一間呢？希望大家之後嚟大邱，可以參考小編提供嘅攻略留低美好嘅回憶，咁我哋下次再見啦～
如果有更多想知嘅內容，都可以隨時留言或者dm話俾我哋知：）
Instagram：creatrip.hk
