首爾花卉市場介紹
首爾兩間花卉市場介紹，用批發價可以買到好靚嘅鮮花！
Hello，大家好，我哋係由韓國人每日提供最新韓國旅行資訊嘅Creatrip。
小編相信應該唔會有女仔唔鐘意花？ 花係可以令到生活空間或者辦公室充滿生氣嘅好方法，亦都可以為大家嘅生活帶嚟一啲色彩。今日小編想同大家介紹韓國兩個主要花卉市場，喺嗰度可以搵到好多批發花，以1萬韓幣以下嘅價錢就可以將美麗嘅鮮花帶返屋企！
首爾花卉市場
1. 良才花卉市場
地址：서울특별시 서초구 강남대로 27
營業時間：每間舖頭營業時間都會唔一樣
泊車：頭1個鐘1000韓幣，之後每15分鐘500韓幣
小Tips：由良才市民의숲（梅軒）站4號出口直行200米就到。
一入到門口附近就可以睇到呢度市場地圖，第一區係教育同辦公室嘅主要建築、第二區係地下建築，有賣花同花籃嘅商店、第三區係鮮花批發大樓，而第四同五區就係賣各種花草嘅溫室。
第4區 溫室
營業時間：01:00-15:00、隔週休息
（第五部分嘅溫室會同佢分開隔週休息，所以如果第4區休息的話，嗰邊就會開放。）
入到去就會見到好多擺滿曬喺地下嘅花盆、仙人掌等等植物。
大家可以見到，價錢比出面普通花店平得多！
大家諗到嘅植物，呢到基本上都會有。
如果大家有興趣，亦都可以喺度買種子返去親自種！
由溫室嘅7號出口出嚟的話，就可以見到前面有第五區同第二區嘅地下建築。
第二區 地下建築
營業時間：07:00-19:00
落到去大家就會發現呢度有個地方俾人休息，如果行到攰都可以喺度坐吓。
地下呢度通常都係出售花束同花藍，所以想買包裝好嘅現貨的話，嚟呢度就啱曬。如果冇啱心水，都可以自己即場揀花，俾店家幫你包好。
呢啲花束嘅售價通常都係￦15,000至￦40,000不等，不過大家要注意嘅係淡季嘅花係會比較貴，所以買之前同店家問吓價錢就最啱。
第五區 溫室
營業時間：01:00-15:00、隔週休息
（第四區嘅溫室會同佢分開隔週休息，所以如果呢邊休息的話，嗰邊就會開放。）
由溫室嘅7號出口出嚟的話，就會見到批發大樓。
第三區 批發大樓
營業時間：00:00-12:00（營業時間浮動）
呢座批發大樓應該就係最多人嚟嘅地方，因為喺呢度就可以用合理嘅價錢大量購買鮮花。
小編嚟嗰陣因為係春天，所以就揀咗啱春天嘅顔色「黃色」。
當揀完想買嘅花後，老闆就會用報紙包好。
咁大束花大家估吓幾多錢？答案係￦7,000咋！喺韓國普通花店係絕對搵唔到呢個價錢。
帶返屋企之後，就可以修前一下個尾，放喺花樽就得。
因為小編屋企冇花樽，所以就用咗酒樽代替。
淨係用￦7,000就可以整咗咁多，仲要有多所以分咗啲俾朋友，如果大家都想買價廉物美嘅鮮花的話，小編強力推薦良才花卉市場！
首爾花卉市場2
南大門市場
營業時間：星期一至四 03:00-15:00、星期五六03:00-16:00、星期日 休息
地址： 서울특별시 중구 남대문시장4길 21 E동 3층
小Tips：回賢站5號出口行大約3分鐘
花市位於三樓，不過因為呢度冇電梯，所以大家去到要行樓梯。
呢度價錢都會寫好曬，大家唔需要特別問價，大家可以睇到呢度一束先￦3,000！
呢度各種顏色嘅玫瑰同鬱金香，仲有康乃馨、百合、繡球花等等，令有選擇困難症嘅小編真係好難揀啊！
小編就搵店主推薦，佢好親切咁推薦咗同小編銀包一樣嘅飛燕草，真係好靚！
小編仲買咗鬱金香都只係￦5,000，同出面花店比真係超級平。
同良才花卉市場一樣，呢度都係用報紙幫手包好啲花。
除咗鮮花之外，呢度仲有人工花、乾花、花樽等等。
雖然呢度冇良才花卉市場咁大，𣎴過南大門都有細批發量嘅花可以賣。
大家睇完有冇覺得好想去返轉花卉市場呢？
「千里送花束，物輕情意重」如果想俾海外朋友一個生日或特別驚喜？都可以搵我哋代訂花束㗎！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com