Hello，大家好，我哋係由韓國人話你知每日最新韓國資訊嘅Creatrip。
＃韓國水果＃季節水果
＃當造水果＃春夏秋冬
韓國四季分明，唔同季節都可以欣賞唔同美景，而水果都會因為唔同季節，而有好明顯嘅變化。
大家可能都會知冬天一定要食士多啤梨，咁其他水果咩季節又會係最當造呢？
今日小編就整理咗韓國當造水果列表，之後嚟韓國嘅話就要試吓啦！
✨馬上Follow我哋IG
instagram.com/creatrip.hk
韓國季節水果：春天
士多啤梨（딸기）
- 1kg約₩20,000至₩25,000
士多啤梨真係無論係男女老少都會鐘意嘅水果，雖然冬天食都好好味，但韓國人就話春天會更加新鮮！
如果大家下次喺春天嚟韓國嘅時候，不如試下去超市或者傳統市場睇下有冇又平又大粒嘅新鮮士多啤梨，然後再比較下同冬天食嘅時候有冇分別。
香瓜（참외）
- 1kg約₩5,000至₩8,000
春天就快完束嘅時候，大量香瓜就會喺嗰陣開始熟透。
香瓜含有豐富嘅鉀，對排毒效果非常好，100g嘅香瓜熱量只得30kcal，所以大家亦都唔需要擔心食完會變肥。
而家好多香瓜因為變咗喺溫室養殖，所以一年四季都可以食得到。
韓國季節水果：夏天
西瓜（수박）
- 1kg約₩5,000至₩7,000
夏天最具代表性嘅水果就梗係西瓜啦！
韓國一到夏天就會出現一連串嘅西瓜新品，而韓國人為咗可以食到更香甜、清涼嘅西瓜，仲研發出一個叫「西瓜沙冰」嘅夏日甜品。
一般西瓜沙冰係用西瓜、牛奶、蘇打水、冰所做成，只要均勻攪好就可以食。
如果大家同小編一樣都係比較懶嘅話，韓國有一種飲料叫做「Milkis」（忌廉溝鮮奶），佢可以直接代替牛奶同汽水，做起嚟都會更加方便。
番茄（토마토）
- 1kg約₩4,000至₩6,000
番茄對於抗癌效果非常好，唔會造成血糖升高嘅蔬果之一，夏天嘅時候仲可以保護肌膚免受紫外線嘅傷害。
韓國人通常唔會將番茄煮嚟食，佢哋大多數都係直接生食，或者係榨成果汁、撈砂糖一齊食。
雖然番茄加砂糖係幾好食，但聽講咁食嘅話功效就會減半，所以如果想身體健康嘅朋友，不妨下次可以試下直接生食。
提子（포도）
- 1kg約₩10,000至₩15,000
韓國嘅提子有好多種類，例如青提子、紫提子、巨峰提子，甚至係比較貴嘅香印提子都可以買到。
除咗直接食之外，提子嘅籽都可以拎出做成食用油，可以話係由內到外都係超有用嘅水果。
水蜜桃（복숭아）
- 1kg約₩15,000至₩20,000
炎熱嘅夏天好容易會冇胃口，但水蜜桃就可以令人有食慾，而且有恢復疲勞嘅效果，甚至連消解宿醉都得。
佢可以話係一個萬能嘅水果，韓國人鐘意食水蜜桃嘅程度，係會將水蜜桃直接做成罐頭去賣。
韓國季節水果：秋天
蘋果（사과）
- 1kg約₩4,000至₩6,000
喺韓國講到秋天水果嘅話，第一個會令人諗起嘅一定係鮮紅色嘅蘋果，因為佢係韓國賣得最多而且最普及嘅水果。
喺韓國有一句好出名嘅講法係「朝早食嘅蘋果係金蘋果，夜晚食嘅蘋果係毒蘋果」，所以喺韓國好多人都唔會喺瞓覺之前或者食完晚餐之後食蘋果。
梨（배）
- 1kg約₩3,000至₩5,000
梨亦都係韓國秋天嘅代表性水果，唔少韓國人仲會將佢做成梨汁。
梨除咗可以促進消化，同時仲可以提升免疫力，小編每次去超市見到990won一個都會買嚟食。
柿（감）
- 1kg約₩2,000至₩4,000
柿亦都係韓國代表性嘅水果之一，佢含有豐富維他命C，對於預防感冒、抗癌有好大嘅功效。
喺韓國食柿嘅方法有三種：
- 直接食啱啱採落嚟嘅柿：甜柿
- 將柿曝曬喺太陽底下3至5日，或者放喺罈入面熟食：紅柿
- 將柿表皮去除再風乾：柿餅
唔知大家又最鐘意邊一種呢？小編更加鐘意食經過熟成之後嘅紅柿，唔單止去除咗啲澀味，食起嚟仲會有一種甜味。
韓國季節水果：冬天
漢拏峰（한라봉）
- 1kg約₩10,000至₩15,000
漢拏峰係濟州島嘅特產，由於生得好似漢拏山嘅山峰，所以由1996年開始佢就一直俾人叫做漢拏峰。
韓拏峰含有豐富嘅維他命C，對於恢復疲勞、減肥都非常之有幫助。
只要係去過濟州島嘅朋友，都一定會買過嚟食，但要注意如果想帶返香港，咁就一定要放喺陰涼處或者要冷藏先可以保持鮮味。
蜜柑（귤）
- 1kg約₩6,000至₩9,000
講到濟州島名產，第一個會諗起嘅一定係蜜柑。
最多人買嘅多數會係濟州島產「天惠香」同「橘紅香」。
「天惠香」就算喺好遠嘅地方都可以聞到佢嘅香味，軟嫩果肉同淡淡嘅酸味係佢嘅特徵。
「橘紅香」 外皮比較紅同厚實，但就好易剝。
柚子（유자）
- 1kg約₩8,000至₩10,000
柚子含有豐富嘅維他命C，感冒嘅朋友或者為咗預防感冒嘅朋友，可以餓熱柚子茶，會有非常好嘅療效。而幾乎每個韓國咖啡廳，都會有柚子茶賣，大家就可以知道韓國人有幾愛柚子茶。
石榴（석류）
- 1kg約₩10,000至₩13,000
石榴含有豐富嘅女性賀爾蒙，對40至60歲受更年期困擾嘅女性嚟講，係一個非常好嘅水果。
如果有時想送禮物俾媽媽級朋友，不妨都可以試下買韓國嘅石榴茶。
以上就係韓國各個季節嘅當造水果整理，唔知有冇大家鐘意嘅水果呢？
下次嚟韓國嘅時候，不妨試下最當造同最新鮮嘅水果啦。
✨馬上Follow我哋IG
instagram.com/creatrip.hk
韓國老字號零食
韓國零食代購
