蠶室咖啡廳總整理
蠶室必去8間Cafe，每一間都有獨特風格，你會係邊一type？
Hello，大家好，我哋係由韓國人每日提供最新韓國旅行資訊嘅Creatrip。
唔知大家知唔知蠶室有一條「松理團路」，呢度有好多間好可愛而且好吸引人去打卡嘅Cafe，如果本身都鍾意影相嘅你，之後會唔會抽少少時間去打卡呃吓Like呢？
蠶室咖啡廳總整理
1. Oh, Linzi（오린지）
Oh, Linzi喺韓國sns相當之受歡迎，只係睇佢外觀會覺得好似一間細屋，俾人一種好溫暖嘅感覺，幾乎每一次去到都要排隊，所以想有位一定要早啲去！（就算小編喺佢開門冇幾耐去，都已經有超多人喺入面。）
呢度有好多種唔同座位，提提大家揀好之後冇得轉嚟轉去，所以去到一定要謹慎咁去揀，而平日限時兩個鐘，而週末會係一個半鐘。
小編叫咗呢度嘅雲呢拿鮮奶咖啡（₩5,500）、百香果梳打（₩6,500），同當造水果芝士蛋糕（₩7,500）。所有飲品都好唔錯，配上呢個濃郁芝士蛋糕特別好味，佢哋嘅士多啤梨同忌廉都好新鮮，坐喺窗邊位更加令人覺得放鬆，喺度發吽豆都幾唔錯。
Oh, Linzi（오린지）
2. Cafe Pepper（카페페퍼）
呢間Cafe同樣都好出名，Ig Followers有成23.1K，成日都要排隊先入到去，但大家要留意佢係喺2樓，唔好眼大睇過龍啊！
即是小編係平日晏晝去，已經可以見到幾乎坐滿晒人，內部裝修好有歐美感覺。
呢度有各式各樣嘅甜品，真係難怪咁多人會專登嚟。
呢度每人至少要嗌一杯飲品，當日小編叫咗胡椒咖啡（₩5,500）、士多啤梨檸檬梳打（₩6,000），同一件檸檬青檸開心果蛋糕(₩7,000)。咖啡上面有一層好soft嘅cream，我梳打就好清爽，蛋糕好夠厚實，唔會好酸亦唔會太甜，味道啱啱好。
Cafe Pepper（카페페퍼）
3. Mountain Nook（마운틴누크）
Mountain Nook同樣係一間位於喺2樓，大家要細心留意，聽講佢係一間天然療愈cafe，最近喺韓國sns好紅，雖然外觀睇落冇咩特別，但入到去你就會發現好多驚喜！
就好似佢個名咁，一入到去就好似去咗一個森林咁，環境舒服裝修得令人望落心情好平靜，而且都多位，唔需要擔心。
平時喺首爾好難搵到呢啲Cafe，可以喺度放鬆幾個鐘，完全唔知道時間過，如果上埋3樓會見到呢度有好多獨特嘅座位， 同溫馨嘅燈光同植物去裝飾，不過當日小編去到太受歡迎，冇位可以座。
最後小編叫咗Nook朱古力蛋糕（₩8,000），係佢哋嘅代表甜品之一，上層用咗漿果忌廉，再加埋一個斧頭朱古力，相當之吸引，Songnidamgil（₩7,900）同樣都係招牌飲品之一，上面有啲cream同餅乾，睇落似石頭，味道好唔錯。 另外仲有一杯柚子茶（₩7,000），雖然價錢有啲貴，但考慮到Cafe獨特氛圍，都算係值得！
喺走之前，大家去返一樓會見到櫃檯有一部影相機，即影完會影print，好多人影完都會貼喺機器隔離，或者大家可以帶返屋企留低一個美好回憶。
Mountain Nook（마운틴누크）
- 地址：서울 송파구 백제고분로45길 32 2F
- 營業時間：星期日至四 10:00 - 22:00、星期五至六 10:00 - 23:50
- 小Tips：由松坡渡口站1號出口行6分鐘、由蠶室站10號出口行14分鐘
4. Lala Bread（라라브레드）
如果鍾意食麵包嘅你，呢間Lala Bread喺蠶室超出名，唔好睇佢門口咁細，其實佢仲有2樓同埋地下，呢度每日都有新鮮麵包出爐。
2樓有好多窗口，當有陽光射入嚟嘅時候，會覺得好舒服，或者自己一個人嚟帶住電腦做嘢都幾唔錯。
小編叫咗粉紅迷迭香茶（₩4,500）、冷萃雲呢拿鮮奶咖啡（₩5,500）同火腿芝士牛角包（₩4,000），佢哋嘅牛角包真係好驚喜，食落好新鮮，而且麵包好外脆內軟。Cafe除咗有麵包同蛋糕之外，呢度仲有提供Brunch，有意粉、三文治等，同朋友約喺度食lunch都幾唔錯！
Lala Bread（라라브렌드）
- 地址： 서울특별시 송파구 오금로16길 4
- 營業時間：10:00 - 21:00、平日 Brunch Order 10:00 - 19:00（Break Time 15:00 - 16:00）、週末Brunch Order 10:00 - 19:30
- 小Tips：由松坡渡口站1號出口行4分鐘、由蠶室站10號出口行16分鐘
5. Pres Coffee （프레스커피）
pres位於松理團路，呢一間之所以會咁出名係因為可以喺天台望到樂天塔。同時可以食到即叫即整窩夫，所以喺韓國人心中係超受歡迎。
天氣好嘅話真係好推薦大家上去天台座！呢度嘅景係其他地方都睇唔到，難怪咁多人都會去打卡。
小編叫咗鮮奶咖啡（₩6,000）、白咖啡（₩6,000），同漿果窩夫（₩9,000）一齊食！咖啡豆有濃郁原豆香魅力，窩夫鬆餅香脆又有咬口，同咖啡好夾。
Pres Coffee（프레스커피）
6. 珈琲島（가배도）
珈琲島有好多間分店，佢哋飲品同甜品都好出名，如果係我哋會員，仲可以喺松坡店有九折優惠添！
同普通Cafe相比，呢度有一種好復古令人着迷嘅氣氛，有陽光射入去，會顯得好平靜，每一件傢俬都經由店主精心挑選，可以見到佢哋嘅用心，唔少韓國妹都會同朋友嚟嘆番個tea。
小編分別叫咗抹茶牛奶（₩6,000）、美式咖啡（₩4,900）、Tiramisu（₩7,000）同布甸（₩5,000）。首先同大家講下呢杯抹茶牛奶先，真係好好飲！茶味意想不到嘅濃，一啲都唔苦！咖啡係偏berry香，對於咖啡初步者嚟講超易入口，Tiramisu係佢哋招牌，口感濕潤綿密，重點係一啲都唔膩！超推薦大家嚟一定要食返個！最後布丁淋上義式咖啡之後，將布丁嘅香甜味同咖啡苦澀味一齊食，無諗過會意外地夾！如果唔鍾意太濃咖啡味嘅朋友，可以只落少少！
珈琲島優惠券 ｜ 撳我
珈琲島（가배도）
- 地址：서울특별시 송파구 백제고분로45길 6 2F
- 營業時間：11:00 - 22:00
- 小Tips：由松坡渡口站1號出口行3分鐘
7. bjorklunds（뷰클런즈）
位於熱鬧嘅商業區域同樂天世界附近，呢度有一間寧靜又極具風格嘅Cafe「Bjorklunds」。
Bjorklunds每層樓都有唔同嘅功用：一樓主要俾人傾偈同放鬆，二樓係安靜區，專係用嚟展示藝術作品同睇書。
小編分咗叫咗瑞典滴濾式咖啡（₩6,800）、綠茶冰沙（₩6,800）、檸檬草茶（₩6,000）同布朗尼套組（₩5,500），瑞典滴濾式咖啡好重嘅酸味，鍾意酸咖啡嘅朋友一定要試，同布朗尼一齊食好夾！另外只要係我哋會員，消費滿￦10,000時，即送一支免費迷你奶茶。
bjorklunds（뷰클런즈）
- 地址：서울 송파구 백제고분로43길 10
- 營業時間：12:00 - 22:00
- 小Tips：由松坡渡口站1號出口行6分鐘
8. 溫花（카페온화）
鍾意食疏乎厘嘅朋友，今次要介紹嘅呢一間溫花cafe，大家千祈唔好錯過，因為同人都係超有人氣，如果大家上到去見到太多人，只要問職員拎號碼牌，等到入去會覺得好值得！
呢度廚房係開放式，大家可以睇到店員點沖咖啡同整梳乎厘，完全係可以食得開心又放心。如果咖啡啱味，呢度仲可以買盒裝返去自己沖。
小編叫咗呢度嘅冰滴咖啡（₩7,000）、綠茶鮮奶（₩7,500）、奶茶（₩7,500）同呢度主打嘅疏乎厘（₩19,000）。因為全部都係即叫即做，所以都要等15-20分鐘。飲品不過不失，不過就唔太推薦飲奶茶，因為味道好似飲緊藥咁。但呢度嘅疏乎厘就一定要叫，士多啤梨夠新鮮，同埋忌廉一齊食完全係入口即溶。
溫花（카페온화）
- 地址：서울 송파구 백제고분로45길 15 2F
- 營業時間：12:00 - 22:00 (Last order 平日 21:00、週末22:00 )
- 小Tips：由松坡渡口站1號出口行5分鐘、由蠶室站10號出口行17分鐘
唔知以上咁多間Cafe，有冇邊一間睇完你會想去呢？去咗話唔定會影到好多靚相㗎！
如果有更多想知嘅內容，都可以隨時留言或者dm話俾我哋知：）
Instagram：creatrip.hk