喺韓國生活要面對嘅現實
旅遊同韓劇入面睇唔到嘅韓國：韓國生活嘅8個現實面！住喺韓國嘅小編吐露真實心聲？
Hello，大家好，我哋係由韓國人話你知每日最新韓國資訊嘅Creatrip。
＃韓國文化＃韓國現實
韓國成日俾人光鮮亮麗嘅感覺，但其實只係由韓劇、K Pop營造出嚟嘅畫面。
唔少人因為鍾意韓國文化所以想嚟韓國生活、學韓文、讀書，不過究竟喺韓國生活，有邊啲現實嘅層面大家要知道呢？
✨馬上Follow我哋IG
instagram.com/creatrip.hk
韓國真相：1. 高所得高消費
韓國同日本好似，收入高消費都會隨之變得高，唔單止飲食，尤其係租屋同買樓嘅價錢都係好高昂。
除咗租金貴之外，保證金更加會超出原本屋租幾十倍以上，要俾咗保證金先可以入住。
解決咗住屋問題，仲要面對每一日嘅飲食同交通。
韓國交通唔算貴，飲食嘅部份如果自己煮都算OK，不過如果係需要交際應酬嘅上班族或者學生，每個月都可能會有好重嘅消費負擔。
 |  |
大家覺得呢一類屋係咪好熟悉呢？唔使高額嘅保證金，但生活空間淨係喺轉身嘅範圍之內，雖然有簡單嘅即食麵、泡菜同白飯等等供應，不過長期食呢啲對身體都唔好。
而且好多人嚟韓國working holiday，可能好難搵到同普通上班族一樣嘅人工水平，更何況係儲錢？所以嚟韓國之前，一定要有心理準備會入不敷支。
🙌 韓國租屋情報
韓國真相：2. 衛生環境
其實小編覺得韓國人都幾矛盾，明明三餐食完之後一定要刷牙，但係喺其他部份嘅衛生觀念反而好差。
例如就算喺有禁止吸煙嘅地方，都仲會隨地吐痰同食煙，甚至去完廁所都唔洗手。
🙌 韓國人嘅衛生觀念
除咗呢樣之外，仲有好多外國人都接受唔到嘅共食文化、病咗都唔戴口罩之類，都屬於韓國嘅真相之一。
正正因為係咁，韓國當時喺爆發MERS疫情嘅時候，可以話係超乎想像咁失控。
雖然而家醫院建立咗相關嘅制度，但對於韓國人嚟講，去醫院睇病或者感冒戴口罩，似乎都仲係一個唔常有嘅觀念。
韓國真相：3. 尊卑分明
韓國人嘅長幼有序思想，應該好多人都聽聞過。
喺韓國只要你嘅年紀大少少或者係早啲入嚟呢個環境，你就係真理，無論喺學校定係職場、軍隊，上下分明嘅環境甚至連韓國人都頂唔順，不過又冇辦法反抗
🙌 韓國嘅年齡文化
就算你係啱嘅，但只要年紀細，就要退讓。
所以好多地鐵老人家會肆無忌憚咁插隊、仲有軍隊同職場嘅欺凌情況，好多韓國人話要改變，但實際上去到自己嘅時候依然選擇退縮。
韓國真相：4. 空氣污染
每逢去到冬春嘅時間，韓國嘅空氣真係超級差，呼吸都有困難，連平時唔鍾意戴口罩嘅韓國人，喺呢個時候都會戴口罩。
雖然大部份人一致咁覺得係中國嘅問題，但其實高度發展嘅韓國都唔應該撇除自己嘅責任；就算係中國有好嚴重嘅霧霾，最多都係影響韓國空氣嘅60-80%，但好多韓國人都唔願意承認呢件事。
韓國嘅口罩甚至有仲有種係「黃沙必備」，甚至N首爾塔都會根據空氣嘅品質着唔一樣顏色嘅燈，大家下次嚟到韓國不妨抬頭望吓首爾塔嘅顏色。
韓國真相：5. 男女不平等
惠化站示威
雖然而家嘅男女平權思想越嚟越進步，但南韓仍然算係一個保守主義嘅國家，女性幫自己發聲，就會受到唔少嘅人譴責，直到近期開始嘅#MeToo運動，先令越來越多人意識到呢一種不平等。
無論係Me Too，定係成日受到網絡欺凌同嘲諷嘅女藝人，甚至係以女性視覺寫出嚟嘅社會現實，都一再顯示出南韓嘅男性對於兩性平等呢一方面嘅恐懼同無知。
性罪行、欺凌、偷拍、歧視等等，不平等唔單只係男女嘅角度，仲包含同志議題、社會議題、兒童教育、性文化、網絡欺凌等等重要嘅方向。
🙌 韓國高自殺率探討
韓國真相：6. 行動支付
呢個算係一個好嘅韓國現實面，好多韓國嘅舖頭接受行動支付已經好普遍，就算唔可以綠卡，舖頭都會提供銀行帳戶，畀臨時冇現金嘅韓國人用手機轉賬。
呢啲系統好完善，消費完仲會有點數回贈，去到其他商店都可以用；例如小編嘅信用卡喺經過一年幾嘅累積之後，竟然可以喺韓國便利店免費消費接近70,000won。
地鐵都係，好多信用卡都有開通T-Money嘅功能，每個月自動扣，唔使好似遊客一樣成日都要去增值。
不過，呢啲服務都係需要實名認證嘅，以旅客嘅身份基本上唔可以喺韓國長期居留。
韓國真相：7. 語言
其實韓國人嘅英文程度唔差，只係因為發音問題，令到好多外國人都理解唔到韓式英文，因為韓國嘅外來語其實全部都會轉化成韓文，發音自然對於外國人嚟講比較難理解。
例如e-mart，韓國人發音係「依媽特」、americano(美式咖啡)係「阿咩哩卡勞」。
🙌 韓國語學堂推薦
外來語太多，無論漢字定係西方嘅語言都會你轉換成為韓文。
咁點解仲會有韓國人唔鍾意講英文嘅感覺呢？可能係因為韓國人成日都要「快啲快啲（빨리빨리）」嘅民族性，令人覺得佢哋好冇耐性。
韓國真相：8. 非我族類
除咗外國人對韓國人嚟講係「非我族類」，仲有出身唔同鄉下嘅「非我族類」，同性同異性戀嘅「非我族類」，男性同女性嘅「非我族類」。
即使成個大韓民國睇落好團結，事實上細分得非常之零碎。
🙌 韓國同志文化
所以韓國人成日將「我們國家（우리 나라）」、「我們大韓民國（우리 대한민국）」掛喺口邊，變成一種習慣，內化咗我同你嘅距離。
對於好多對韓國抱有憧憬而嚟嘅人，可能會有啲難以接受，或者幻想破滅？
雖然面對呢啲真相，但小編目前為止都仲係幾鍾意韓國，只要越來越多人意識到呢啲現實面，相信韓國都會變得越嚟越好。
下次再同大家分享關於韓國嘅大小事～
✨馬上Follow我哋IG
instagram.com/creatrip.hk
| 其他延伸閱讀 | |
 韓國同性戀文化 |  住韓國真係好 |