韓國年齡文化
每個韓國人都有3個歲數？到底之前韓國年齡要點計先啱？
Hello，大家好，我哋係由韓國人話你知每日最新韓國資訊嘅Creatrip。
大家應該都有聽聞過韓國計年齡同其他國家好唔同，每踏入1月1號，韓國人就會自動大咗一歲？對於外國人嚟講所有人喺同一日一齊「生日」，呢件事應該係幾難理解而且又好神奇。不過由2023年6月28號開始，呢個制度正式廢除啦！到底之前要點計年齡，又有幾麻煩？今日就等小編向大家解釋清楚啦！
韓國年齡文化
所有韓國人一齊大一歲嘅韓國式年
呢個年齡計法係目前最普遍嘅，並唔係以生日為標準，而係以年度做標準，即係所謂嘅「虛歲」。喺每年跨年之後踏入新一年嘅1月1號，所有人都會自動增加一歲，同出生日期無關。假設小編嘅生日係1995年7月，以香港嘅計法，2020年12月嘅時候先26歲多少少，喺韓國就係2021-1995+1=27歲。2022年1月1號，全部韓國人無條件再加1歲，小編喺韓國就變成28歲（明明喺香港仲有排都未到……）。
但點解一定要加1歲呢？因為韓國人覺得仲未出世喺媽媽嘅肚入面嘅時候，已經計一個歲數，所以一出世就係一歲。如果你係12月31號出世嘅話，一出世已經一歲，到第二日跨完年之後，你就變成2歲；就算只係早過1月1號出世嘅人一日出世，喺呢隻計法上會夾硬加多咗一歲，奠定咗長幼順序。
原本呢一種年齡計法係起源於中國，以前好多東南亞國家都有用過，不過而家就剩低南韓仲用緊呢一種虛數計法。雖然法律、醫療等等都係國際計法為主，不過日常相處、對話當中，大家都係沿用緊韓國式嘅年齡交流。
韓國年齡文化
點解一出世就係一歲？
上面都有輕輕提過，韓國人一出世就係一歲。因為韓國人覺得， BB喺媽媽個肚入面嘅時候，就已經開始咗生命嘅旅程，所以韓國都好重視胎教。當出世之後，已經算係經歷咗10個月嘅成長，接近一年，所以一出世已經係一歲。
所以點解韓國人成日都嗌對方哥哥、姐姐、細佬細妹，或者同歲朋友。因為出世年度係好重要嘅，即使只係相差一兩日，形式嚟講就係年紀大啲；講唔講敬語嘅話，就係另一樣值得討論嘅問題。
要點先知自己滿幾歲？可以買煙飲酒未？
而家2022年，如果話一個人係20歲，咁實際上即係幾多歲呢？條公式係2022-X+1=20，出世年度係2003年。呢個就係韓國式年齡，同2003年出世嘅人係同歲，可以用平語傾偈；對2002年之前出世嘅人就要用敬語。不過實際上佢喺香港可能先係18歲或者19歲（視乎生日過咗未）。
但因為咁樣比較難分辨，連韓國人都成日搞亂，喺韓國見到未滿19歲嚴禁吸煙飲酒，但又成日見到藝人慶祝20歲成年，究竟係點解？因為韓國式年齡20歲嘅人，一定已經過咗生日，滿19歲。
仲有一種係行政使用嘅「年度年齡」？
上面講過嘅韓國式年齡主要用喺日常對話上；國際年齡計法就用喺醫療、法律上面之外，韓國行政上仲有一種年齡計法叫做「年度年齡」。唔會喺日常生活上出現，只會喺行政上使用，簡單嚟講係「當年度-出生年」。
「年度年齡」目前喺韓國嘅兵役法、青少年保護法上用緊，淨係同年度有關，而且唔需要加1歲。喺兵役法上，韓國規定最遲一定要28歲去當兵。以BTS的JIN（1992年出世）為例，2020年嘅佢已經就嚟超過入伍嘅年齡，不過佢同其他團員相處之間係用29歲。
同年齡相關嘅早年生文化？
韓國仲有另一種奇特嘅年齡文化，就係「早年生（빠른년생）」。所謂早年生，即係指喺1-2月出世嘅人，同舊年3-12月出世嘅人會被視為同年紀，所以入學係一齊嘅。
早年生嘅人如果俾人問到幾多歲嘅，好難正確確實咁回答到，所以通常都會答：我係幾幾年嘅早年生。
早年生嘅人入大學嘅時候實際上仲係未成年，所以雖然係大學一年級新生，但仲未可以飲酒，都唔可以落club，呢啲全部都要喺韓國式年齡21歲之後先可以做啊。亦都因為呢個制度實在太混亂，明明係同一個學年，點解有啲人已經成年、有啲人仲未，有啲人話自己已經成咗年但其實仲未成年，韓國自從2009年開始已經廢除咗早年生呢個入學條款。
2003年之後出世、生日係1月1號到12月31號嘅人，就可以喺同一個學年入學。
對韓國式年齡嘅批評
有人就話要廢除韓國式年齡，直接用國際慣例作為日常年齡計算嘅方法（即係實際上幾時生日就幾多歲），甚至會見到有人喺青瓦台人民請願留言板上面留言話「支持廢除韓國式年齡計法」。不過對於廢除韓國式年齡，贊成同反對嘅市民都唔少。
根據市場調查機構Realmeter嘅調查結果，贊成維持韓國式年齡計法嘅民眾有46.8%、而希望統一用滿歲計法就佔44.0%。支持韓國式年齡計法嘅人就話，呢一種計法已經深深植入咗喺韓國人嘅腦入面，根本冇改變嘅必要，如果改變反而可能會令韓國社會更加混亂。
根據對方同自己同齡、係長輩或者後生過自己，韓文需要用到嘅文法同單字都會有唔同。所以如果淨係用滿歲嘅計法，喺同年出世嘅韓國人之間就好難去分別邊個大邊個細。
另外，喺韓國仲有稱呼嘅問題，如果係好親密嘅關係通常都唔會計較年齡嘅大小，就算年紀上面有差距，都係會用平語相處。即使關係好親密，都仲係唔會直接嗌名，而係喺後面加哥哥、姐姐等等。
今日就同大家分享咗全世界得韓國用緊嘅韓國式年齡計法，其實每年都有人針對呢種文化提出批評或者建議，韓國人都因為成日分唔清年齡，所以希望可以統一用國際方法計算，今年終於實現到啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk