Hello，大家好，我哋係由韓國人每日提供最新韓國旅行資訊嘅Creatrip。

多數人喺首爾，都係揀搭地鐵多，不過其實有時候搭巴士會更快同方便添㗎！今日小編就要同大家介紹韓國巴士種類同搭乘方法，唔單止首爾巴士，釜山巴士都係一樣。同時小編亦會介紹好用嘅韓國巴士APP俾大家參考，有興趣嘅就要繼續睇落去啦！

韓國巴士總整理

首爾巴士種類

相信嚟韓國旅行嘅朋友大部分都係去首爾玩，所以小編主要會介紹首爾巴士種類同搭乘方式俾大家參考。

韓國巴士有好多種，不過佢哋嘅車身顔色都唔一樣，所以好容易可以分辨得到。建議大家可以買定張交通卡，唔單止方便，有時候仲可以有車費優惠𠻹！

1. 紅色巴士（廣域巴士） 

• 快速連接首爾首都圈（仁川、京畿道）巴士

喺韓國，大家經常會見到呢種紅色巴士喺路上行駛，呢種巴士主要來往京畿道同仁川廣域市，方便大家唔使成日要搭地鐵同人逼，可以去到京畿道、江原道同仁川附近嘅近郊玩！

不過大家要注意，如果只係喺首爾搭巴士去附近地點，千祈唔好搭韓國紅色巴士，因為會比較貴㗎！

2. 藍色巴士（幹線巴士） 

• 連接首爾市區同外圍，行駛距離較遠

韓國最常見嘅巴士，就係呢種藍色巴士，除咗多韓國人搭之外，唔少觀光客都會搭佢，但係大家又知唔知藍色巴士編號係代表唔同意思嘅呢？韓國巴士編號通常係三個數字，開頭數字係路線起點區、第二位數字係路線終點區，不過大家其實唔需要記，因為連韓國人都搞唔太清楚。

韓國人最多搭嘅就係藍色巴士，主要行駛範圍都係主要道路（大馬路，同埋鄰近地鐵站），對上班族、學生，同埋想喺地鐵站換乘嘅人嚟講，可以話係非常方便。

3. 綠色巴士（支線巴士） 

• 連接特定地區嘅循環巴士，或者行經次要路線、行駛距離近嘅巴士

韓國除咗藍色巴士，第二多嘅就係綠色巴士啦！綠色巴士亦分為兩種，一種係大型（代碼四位數字），另一種係小型（代碼兩位數字）。

代碼係四位數字嘅綠色巴士，通常行駛地鐵站之間，或者地鐵去唔到嘅小區，綠色巴士班次多、行駛距離近，經常會穿梭巷仔。對屋企離地鐵站要行10分鐘左右嘅人嚟講，綠色巴士係最方便。

綠色巴士又稱為小區巴士（마을버스），係指只會喺一個小區內運行嘅巴士，行駛距離會更短。

小區巴士代碼係兩位數，前面通常都會有地區名，標示係嗰區行駛嘅巴士，主要作用係連接地鐵站無咁密集嘅地方，所以主要熱門區域其實係唔會見到呢類巴士㗎～

4. 黃色巴士（循環巴士） 

• 首爾特定觀光區域循環行駛巴士

首爾地區主要巴士路線，大部分都係藍色同綠色巴士，而黃色巴士只會喺特定區域，或者觀光地區循環行駛，數量唔多。

大家可能最常見到嘅黃色巴士應該就係來往明洞同南山N首爾塔嘅循環巴士。

  N首爾塔觀景台門票預約優惠

5. M巴士（廣域急行巴士）  

• 快速連接首爾首都圈（仁川、京畿道）
• 冇企位

M巴士同一開始介紹嘅紅色巴士差唔多，都係主要喺首爾同京畿道行駛。M巴士嘅巴士號碼前面會有「M」字，巴士車身顔色亦都唔一樣，好容易就可以分辨到。除此之外M巴士冇企位，所以如果所有座位都滿咗，司機會唔埋站，直接開走。

不過M巴士嘅班次比較少，路線亦都唔多，所以其實大部分韓國人要搭長途車多數都係搭紅色巴士。

6. 觀光巴士（雙層巴士）    

• 提供觀光導覽嘅雙層開篷巴士

觀光巴士主要係民間營運，需要另外買飛。同頭先介紹嘅巴士唔一樣嘅係，呢種雙層巴士係負責喺市中心景點之間為觀光客提供當日無限次嘅接駁服務，車上面仲會有聲音導航，介紹經過嘅每個景點，非常適合嚟旅行但又唔知去邊好嘅朋友。

7. 機場巴士

• 連接機場同其他城市嘅巴士

大家一到步韓國，通常都係搭機場快線或者機場巴士離開機場。機場快線淨係會經過特定嘅地方，而機場巴士有好多唔同嘅路線，會更加方便嚟旅行嘅大家。要注意唔同嘅巴士路線班次、票價都會唔一樣㗎。

  全韓機場巴士整理

韓國巴士票價

1. 首爾巴士票價（2023.10更新）

2. 釜山巴士票價（2023.10更新）

3. 大邱巴士票價（2023.10更新）

4. 濟州巴士票價（2023.10更新）

以上巴士票價都係拍卡（T-money）嘅費用，建議大家一定要用交通卡，除咗有巴士同地鐵轉乘優惠之外，亦會比較方便，唔使上車急急忙忙拎散紙。

  韓國交通卡整理 

韓國巴士優惠

1. 青少年、小童優惠

韓國巴士票價分三種，分別係成人（19歲以上）、青少年（13-18歲）同小童（7-12歲），6歲以下嘅小朋友喺父母陪同下可以免費乘搭。青少年同小童嘅交通卡可以去地鐵服務中心或者便利店出示護照申請。

2. 巴士轉乘優惠（首爾）

地鐵轉巴士/巴士轉地鐵

• 朝早7點至夜晚8點59分：30分鐘內轉乘可享優惠
• 夜晚9點至朝早6點59分：60分鐘內轉乘可享優惠

喺韓國搭公共交通工具嘅優點係可以享受轉乘優惠，但係記住一定要用同一張交通卡，喺指定時間範圍同時限之内轉乘。除咗上述嘅情況，當你地鐵出站之後轉搭巴士，再轉搭另一架巴士，同樣都可以享有轉乘優惠。

早鳥優惠

• 用Tmoney喺凌晨4點至6點30分期間
• 搭地鐵、巴士，都可享有車資減免
• 夜間巴士（N開頭）除外

為咗疏散翻工時間嘅人潮，一大早去搭巴士都會有車費優惠（記住一定要用交通卡啊）。唔止首爾，釜山同大邱等等嘅城市都有呢類型嘅巴士優惠，大家嚟韓國旅行周圍走嘅時候可以好好善用呢點，慳翻啲車錢。

韓國巴士APP推薦

Naver Map

iPhone下載　Android下載

想喺韓國搭巴士，但係唔知點搭好？小編非常推薦大家用「Naver Map」呢個app！佢本身係一個地圖app，但同時可以check到巴士同地鐵嘅路線、班次等等嘅資訊，亦都有提供中文（簡體）版。雖然中文版嘅搜尋結果會比韓文版同英文版少，但係對於完全唔識韓文嘅朋友嚟講都算可以幫補吓。

設定Naver Map語言

查地址嘅時候需要用簡體中文

如果想喺Naver Map用中文查地址，大家需要將個地址變成簡體中文先會查到，或者大家可以選擇輸入英文或者韓文地址。經過實測，小編發現最快同最準嘅都係用韓文地址！

不過如果唔知道自己想去嘅地方準確嘅韓文名或者地址都唔緊要，我哋Creatrip網站入面介紹嘅店舖全部都有寫埋韓文地址同舖頭名，俾大家用Naver Map嘅時候可以直接copy and paste，順利搵到點去。

確認巴士路線/上落車位置

喺Naver Map上面打曬你嘅起點同終點之後，就可以睇到可以搭咩車去啦！撳「公交（巴士）」就會見到有好多種唔同嘅搭車方法，而大家可以揀最少轉乘、最少步行嘅option，慳翻啲時間同腳骨力，仲可以減低盪失路嘅風險。

喺地圖上面放大起點嗰part，大家就可以仔細咁睇到巴士站嘅位置，咁就唔使怕搭錯方向啦。而落車之後，大家就可以跟住地圖上嘅點點行去自己嘅目的地。搭車嗰陣如果怕搭過龍，除咗可以聽巴士報站廣播，最準嘅都係望住Naver Map嗰定位。

  Naver Map詳細教學

韓國巴士注意事項

1. 點截車?

其實喺韓國就算你唔舉手截車，巴士司機通常都會每個站停一停。不過為咗保險起見，建議大家都係喺巴士就嚟到站嘅時候起身等，或者稍微做出「我要搭呢架車」 嘅舉動。

2. 上落車有啲咩要注意?

同搭香港巴士一樣，喺韓國搭巴士都係前門上車、後門落車，同埋要落車嘅時候要撳鐘。而同香港巴士最大嘅差別就係，喺香港淨係上車嗰陣拍一次卡就得，但韓國上落車都需要拍，記住呢一點，搭韓國巴士就唔會有太大問題。

3. 可唔可以喺巴士上面食嘢?

韓國巴士上嚴禁飲食，而且如果你仲拎住未飲完嘅嘢飲或者嘢食嘅話，司機係唔會俾你上車㗎。

可以帶上巴士嘅食物/飲品：包裝完整嘅食物（例如包裝完整嘅飯盒、炸雞），冚好蓋嘅水樽等等。

4. 點睇架巴士幾時到站? 

除咗可以善用頭先介紹嘅Naver Map，想睇要搭嘅巴士幾時嚟，或者車上面多唔多人嘅時候，大家可以參考巴士站嘅電子螢幕，上面會顯示巴士號碼、距離巴士到站仲有幾耐（或者有冇停駛）、同埋即將到站嘅巴士。

另外括弧入面顯示嘅就係嗰班車嘅人流狀態，여유表示有空位，보통表示幾乎坐滿， 而혼잡就代表車入面有非常多人。

5. 韓國巴士免費Wifi

大部分韓國巴士都有免費Wifi，小編實測過都算幾穩定，大家需要嘅時候可以參考下面嘅資訊。

首爾巴士Wifi

• Wifi名稱：SEOUL_Secure（亦都可以連'Seoul'）
• Wifi帳號：seoul
• Wifi密碼：seoul

釜山巴士Wifi

• Wifi名稱：Public Wifi Secure
• Wifi帳號：wifi
• Wifi密碼：wifi

呢個功能因為唔需要本人認證，所以旅客都可以享用呢個服務。通常輸入一次密碼之後就可以自動連接到Wifi㗎啦！

  韓國SIM卡比較

韓國巴士頭/尾班車

一般韓國巴士喺翻放工時段出車會比較密，而頭班車大約會喺朝早5點，尾班車通常就會係夜晚9-10點。

如果趕唔切尾班車都唔緊要，因為韓國地鐵會開到12點左右，大家可以選擇搭地鐵。但如果你連地鐵尾班車都搭唔切，而又身處首爾嘅話，可以選擇搭N字頭嘅「深夜巴士」！深夜巴士通常都會開到凌晨4點左右，大家嚟玩嘅時候可以參考吓~

  首爾深夜巴士總整理

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購