2023釜山青沙浦總整理
海雲台隔離嘅寧靜小村莊「青沙浦」介紹！天空步道、海景、壁畫村同咖啡廳嘅結合
Hello，大家好，我哋係由韓國人每日提供最新韓國旅行資訊嘅Creatrip。
去釜山旅行想玩得特別啲？咁就去海雲台附近嘅「青沙浦」啦！小編推薦大家可以去到近郊嘅青沙浦行下，位於大海隔離嘅寧靜小村莊，啱啱好半日就可以行完，大家不妨可以save底，下次嚟釜山就可以去啦。
青沙浦（청사포）簡介
位於釜山海雲台嘅青沙浦一帶，係一個適合做半日行程嘅地方。青沙浦原本漢字係青蛇浦，但因為「蛇」字唔吉利，所以就改咗同韓文사「沙」嘅漢字而成。呢度最出名嘅景點就係雙胞胎紅白燈塔同天空步道。
天空步道
雙胞胎紅白燈塔
去呢度嘅交通方式亦都好方便，由海雲台搭巴士過去，或者係由萇山站（장산역）3號出口前面嘅巴士站，搭海雲台小區巴士해운대구2，至청사포（青沙浦）落車就得，唔洗半個鐘就會到。更多人會揀直接搭的士，幾個人一齊平分車資都幾平。
釜山青沙浦景點
1. 雙胞胎紅白燈塔（청사포 쌍둥이 등대）
- 地址：부산 해운대구 청사포로 129
落咗巴士之後，就可以聞到海水味同聽到浪花聲，再向前行就可以睇到青沙浦雙胞胎燈塔，一白一紅，好靚。
呢度唔會太難行，係值得一睇嘅純樸景色，同時亦係青沙浦重點行程之一。左紅、右白，兩個燈塔互相對望，所以就有雙胞胎燈塔嘅稱號。
2. 青沙浦天空步道（청사포 다릿돌 전망대）
- 地址：부산 해운대구 중동 산3-9
- 時間：9月至5月09:00 - 18:00、6月至8月09:00 - 20:00（如果遇上大雨、暴風等，就會視乎天氣狀況）
- 費用：免費，但需要套上鞋套保護步道路面
沿住海岸線行，就可以睇到另一個青沙浦景點：天空步道風景好靚，係一個可以近距離體驗釜山海景嘅景點，小編之前去嘅時候都好鐘意。
如果喺黃昏嚟呢度，青沙浦展望台都會點起燈，變成發光嘅路，別有一番感覺。聽住大海嘅海浪聲，有種難以講出口嘅感動。
由釜山青沙浦天空步道望出去嘅景緻真係好靚，而且同雙胞胎紅白燈塔距離好近。
而步道除咗一般見唔到底嘅路之外，仲有可以直接望到下面海底嘅透明玻璃步道同鐵蓋步道，膽大嘅人可以企喺上面行下㗎。
3. 青沙浦壁畫村（청사포 벽화마을）
- 地址：부산 해운대구 청사포로58번길 97
青沙浦本來係一個靠海嘅小漁村，因為壁畫出名而將呢個沒落嘅釜山村莊，重新燃起一片生機。
同其他首爾、釜山知名嘅壁畫村相比，青沙浦壁畫村更加清淨一啲，而且好少有觀光客會去。小編行咗一圈，覺得呢度仍然保留咗好多當地生活嘅樣貌。
不過都要提醒大家，如果係嚟海雲台一帶，想睇壁畫而去青沙浦壁畫村，就唔好抱太多期望，因為數量冇其他壁畫村咁多。
釜山青沙浦Cafe
1. Cafe Roof Top（카페 루프탑）
- 地址：부산 해운대구 청사포로 139-4
- 營業時間：星期一11:00 - 18:30；星期二至星期日11:00 - 22:00
- 優惠：Creatrip會員下載優惠券，可享九折優惠
位於海岸地帶青沙浦嘅「Roof Top」露台，直接眺望到靚海景，成為呢度最出名嘅屋頂Cafe。
喺屋頂大家可以欣賞到海雲台嘅大海，深受每個人歡迎，但因為相對比較高怕對小朋友造成危險，呢度係禁止小朋友出入，計畫帶小孩嚟青沙浦嘅朋友就要注意啦。
青沙浦Roof Top嘅屋頂好寬敞，呢度設有幾個大坐墊、櫈、座位區同躺椅，想要喺度瞓住睇景亦都得，因為附近冇其他建築物，所以大家可以睇到一望無際嘅海雲台大海。
想要享受一段美好嘅海雲台旅遊時光？就一定要去呢間屋頂咖啡廳Roof Top享受下啦！
2. H.US Coffee（에이치어스커피）
- 地址：부산 해운대 청사포로 135
- 營業時間：星期一至五 11:00 - 18:30（Last Order 18:00）、星期六至日 11:00 - 19:00（Last Order 18:30）
- 優惠：下載優惠券即享飲品9折優惠
同樣位於青沙浦嘅「H.US Coffee」都好出名，大家有冇發現呢度嘅咖啡廳都主打啲咩呢？無錯！就係獨棟建築同靚海景，H.US Coffee同頭先介紹嘅Roof Top 2間都係小編嘅最愛。
去到H.US Coffee樓上，就會俾窗前嘅靚景吸引，貼近海岸線嘅風光，加上Cafe內部舒適嘅裝修，完全就係小編嘅菜。
如果係啱啱好黃昏時間去，就可以影到夕陽海景照，H.US Coffee可以話係青沙浦一帶最出名嘅咖啡廳之一，大家快啲save底，下次都嚟呢度打卡啦。
以上就係小編整理嘅海雲台青沙浦攻略，推薦大家去釜山旅行嘅時候，加插半日青沙浦行程，享受呢啲咁美好嘅寧靜時光。
如果有更多想知嘅內容，都可以隨時留言或者dm話俾我哋知：）
Instagram：creatrip.hk