2026韓國的士攻略 | 首爾的士收費、深夜附加費、Uber/Kakao T、機場接送等
韓國坐的士驚俾人呃？記得呢啲小貼士就唔使驚啦！一次過幫你整理韓國的士種類、首爾收費、深夜附加費、叫車App、仁川機場搭車方法同防中伏貼士。
- 韓國的士有邊幾種？各的士種類特徵
- 想喺韓國call的士可以用咩app？
- 2026韓國各大城市的士收費
- 仁川機場邊度可以搭的士？
- 韓國的士小秘訣
- 韓國的士常見問題FAQ
Hello，大家好，我哋係由韓國人每日提供最新韓國旅行資訊嘅Creatrip。
如果你係第一次去韓國旅行，比起搭地鐵同巴士，的士相對上更方便快捷。尤其係同朋友一齊夾份，分分鐘平過自己搭公共交通工具。
只係人生地不熟，唔熟悉韓國的士收費同相關規例，真係好驚俾人劏，搞到唔係咁心安......今日就等喺韓國住咗超過7年嘅小編話你知到底韓國有邊幾種的士、最新韓國的士收費、點樣喺韓國搭的士同call的士等一連串韓國的士相關資訊啦！
2026韓國的士懶人包
- 首爾一般的士日間起錶價：₩4,800
- 深夜附加費時段：22:00–04:00（23:00–02:00 加幅最高）
- 如果唔熟韓文，建議事先準備好Uber或Kakao T等應用程式
- 行李多、同行人數多，或者凌晨落機，預約機場接送會更方便
情況 | 推薦交通 |
|---|---|
普通日間想搭的士 | 一般的士 |
深夜想安心啲 | 模範的士 |
4人以上、行李多 | 大型的士、包車接送 |
唔識講韓文怕溝通唔到 | 國際的士、包車接送 |
想用平時熟悉嘅App | Uber |
想提高成功叫車機會 | Kakao T |
韓國的士有邊幾種？各的士種類特徵
去韓國搭的士時，最常見可以分為一般的士、模範的士、大型的士同國際的士。點揀主要睇你重視價錢、舒適度、可載行李量，抑或係溝通等因素。
一般的士
上面呢款係韓國最常見嘅「一般的士」，亦都係大部分旅客最經常搭嘅的士。一般的士係價格最平同最普遍嘅韓國的士，所以如果係日頭喺首爾市區周圍去，一般的士會係最方便嘅選擇。唯一缺點係的士司機通常只係識講韓文，唔識韓文嘅朋友可能會怕溝通唔到。
另外根據2026年官方收費表，首爾一般的士日間起錶價錢係₩4,800（約KRW 4,800），同香港新界綠的差唔多。不過要注意夜晚10點到凌晨4點會另外加收附加費用，整體費用會比較貴。
🚕居韓小編小貼士：如果你打算夜晚喺明洞、弘大、東大門等人多地區返酒店，建議先用App call的士，通常會比臨時喺街邊搵車更穩陣，而且可以睇咗估計費用先再搭，更加安心！
模範的士
網上成日都見到有人話記住唔好搭韓國黑色的士，因為價錢貴到唔知係咪俾人呃緊錢。而呢款所謂嘅黑色的士其實係提供高級服務嘅「模範的士」。車身兩邊會寫住「모범택시」，車內空間比較闊落同舒服，而且標榜提供高質素服務。揸呢種的士嘅司機需要識講外國語言同十年以上無肇事安全紀錄，先可以獲發模範的士執照。
首爾模範的士2026年起錶費用係₩7,000（約KRW 7,000），收費明顯貴過一般的士，亦都同樣有深夜附加費。小編之前去釜山玩嗰陣都有坐過呢種的士，雖然感覺唔到同其他的士有咩唔同，但上落車嘅時候司機會主動幫手開門，仲會幫忙擺行李，呢方面嘅服務的確好過一般的士。
🚕居韓小編小貼士：雖然起錶價較高，但如果你需要深夜出行、趕早機、長途移動，或者同行有長輩，模範的士會係一個比較安心嘅選擇！
大型的士
大型的士比較少見，呢種韓國的士適合一大班人搭，根據車型最多可以10個人搭。呢種的士通常都要預約，或者大家喺機場可以比較容易見到佢哋，而價錢同模範的士計法一樣。推薦一家人或者一班朋友一齊去韓國玩嘅時候搭。
🚕居韓小編小貼士：雖然上面話啱六至十人搭，但建議大家要考慮埋行李數量！就算只係3至4個人，如果全部都帶住大喼，一般的士都可能唔夠放，呢個時候就要揀搭大型的士啦！
國際的士
國際的士主要係為外國旅客而設，揸呢款的士嘅司機會識中、英、日至少一種外國語言，方便唔識韓文嘅外國旅客。
雖然車費有機會比一般的士高少少，但部分路線可以用定額收費，所以就算遇到塞車，都比較冇咁擔心車費愈跳愈高。好多人都會喺機場出首爾市區嘅時候揀搭國際的士，不過通常需要事先預約或call車，有需要可以透過Creatrip直接用繁體中文同港幣預約！
🚕居韓小編小貼士：韓國國際的士睇落雖然同韓國一般的士顏色一樣，但車身上面會寫住「International Taxi」，大家記住唔好搞亂！
外國人專用觀光的士
相比首爾，江原道、坡州、濟州島等地區嘅公共交通好多時都冇咁方便，所以如果冇車，搭的士會方便好多。如果計劃去呢啲地方玩，不妨考慮使用舒適又方便嘅的士包車服務，帶你去齊當地必去景點。同一價錢最多可以有4個人一齊去，玩3~4個鐘頭，分分鐘平過逐次叫車！
韓國的士種類&特徵小整理
車種 | 特徵 | 起步收費 | 推薦情況 |
一般的士 | 最常見的士類型、首爾市內常見橙色、銀色同白色車身 | ₩4,800起 (KRW 4,800起) | 適合1至3人同行，或者想以較實惠價錢搭的士 |
模範的士 | 黑色車身，屬於較高級嘅的士類型、收費較貴但，服務質素較好 | ₩7,000起 (KRW 7,000起) | 適合深夜出行、重視舒適度、長距離移動時使用 |
大型的士 | 最多可乘坐6-10人，車尾箱較大可以放大型行李 | ₩7,000起 (KRW 7,000起) | 適合5人以上團體、機場接送、行李較多 |
國際的士 | 為外國旅客而設，可安排識講中文/英文嘅司機 | 視乎路段及預約條件 | 適合想由仁川機場安心前往市區，或者對語言溝通有顧慮嘅旅客 |
外國人專用觀光的士 | 江原道的士包車行程，用幾個鐘頭帶你去齊當地主要景點 | ₩41,500(最多4人同行) (KRW 41,500) | 想去江陵、春川、束草玩，但覺得交通唔方便 |
※上述為2026年5月更新之價錢，實際以現場為準
想喺韓國call的士可以用咩app？
如果怕截唔到的士，或者唔知點同的士司機溝通，小編會推薦大家先安裝韓國call車app，可以事先確認車費，亦都可以直接設定到達地點，唔洗同司機雞同鴨講。
而咁多個call車app當中，最多旅客嚟韓國之前都會下載定Uber、Kakao T或者最近好多人討論嘅TABA。
Uber / UT
大家知唔知原來喺韓國都可以叫Uber呢！喺首爾市區叫Uber都好方便，而且不洗另外下載其他App，用返自己平時個Uber App就得（喺韓國會自動切換成韓國版本「UT」，頁面會維持係繁體中文），call車、搭車、俾錢方式都一樣。
Kakao T
Kakao T係韓國最常用嘅叫車App之一，如果你想提高叫到車嘅機會，或者會喺首爾市內多次搭的士，推薦大家可以下載定。「Kakao T」另外一個優點係可以綁定電話號碼，仲可以幫你事先估算車錢同路線，加上會留低Call車記錄，發生咩事都有證據！
TABA
「TABA」係首爾市專門為外國人開發嘅Call的士App，最大優點係可以直接用自己國家/地區嘅電話號碼，更加可以用當地信用卡俾錢，唔需要另外整韓國電話號碼都得！另外呢個App更加提供有繁體中文同英文等各種語言服務，非常方便。
2026韓國各大城市的士收費
※以下價錢為2026年5月更新，實際請參考官方最新公告及現場資訊
首爾的士收費(按時段)
時段 | 一般的士起錶價 | 模範/大型的士起錶價 |
日間 (04:00-22:00) | ₩4,800起 (KRW 4,800起) | ₩7,000起 (KRW 7,000起) |
夜間 (22:00-23:00) | ₩5,800起(+20%) (KRW 5,800起) | ₩8,400起(+20%) (KRW 8,400起) |
深夜 (23:00-02:00) | ₩6,700起(+40%) (KRW 6,700起) | ₩8,400起(+20%) (KRW 8,400起) |
凌晨 (02:00-04:00) | ₩5,800起(+20%) (KRW 5,800起) | ₩8,400起(+20%) (KRW 8,400起) |
韓國主要城市一般的士起錶價
※各地方政府、市郡及調整時間不同，實際收費或規定可能有所差異，請確認最新公告。
※特別係道地區及廣域地區，不同市郡之間有時會出現差異。
城市 | 日間一般的士起錶價 |
首爾 | ₩4,800起 |
仁川 | ₩4,800起 (KRW 4,800起) |
釜山 | ₩4,800起 (KRW 4,800起) |
大邱 | ₩4,500起 (KRW 4,500起) |
光州 | ₩4,300起 (KRW 4,300起) |
江原道 | ₩4,600起 (KRW 4,600起) |
🚕居韓小編小貼士：因為凌晨搭的士價錢會貴20-40%，所以建議大家夜晚返酒店或者趕早機之前，最好先用叫車app睇一睇估計車資，避免超出預算或者被收多咗錢！
仁川機場邊度可以搭的士？
✈ 仁川機場第1航廈（T1）
- 一般的士：5C / 6C / 6D
- 模範的士及大型的士：7C / 8C
- 國際的士：4C
✈ 仁川機場第2航廈（T2）
- 一般的士：7C（※首爾方向；仁川方向為5D、京畿方向為6D）
- 模範的士及大型的士：7D
- 國際的士：3C
喺仁川機場出首爾搭地鐵要1個鐘頭左右，搭機場巴士就要個半鐘。搭的士雖然的確會貴啲，不過會係最方便同舒服嘅方法。仁川機場T1同T2都有的士站，如果有需要都可以去櫃檯搵職員幫手。
如果怕現場截車費用唔固定，或者會遇到唔好嘅司機，事先預約定機場接送服務都係一個唔錯嘅選擇！
韓國的士小秘訣
韓國路上截車有咩要注意？
喺韓國想截車嘅話，大家首先要睇吓車頭有冇著「빈차（空車）」燈，如果冇就代表有人。如果見到有截得嘅的士，好似喺香港咁揮一揮手就得。
另外大家上車之前記住睇吓車牌係唔係黃色，上面有冇寫住아、바、사、자其中一個字，要滿足上面兩個條件先係正式登記好嘅合法的士。
點話俾的士司機聽要去邊？
如果係Call車就唔會有呢個煩惱，不過如果係直接截車，又唔識講韓文，建議事先搵好目的地嘅「韓文地址」，或者係目的地最近嘅地鐵站/景點嘅「韓文名」。喺地鐵站落車有時候會好過直接叫司機揸去目的地（唔洗繞入人多複雜嘅巷仔，落車之後行過去可能仲快XD）！
韓國的士點俾錢更加方便？
去到目的地之後大家就要按照咪錶上面嘅金額俾錢，不過如果係去機場，或者曾經上過高速公路，可能要俾埋過路費。如果大家覺得司機兜路行，或者覺得價錢唔係好對路，除咗可以記低車牌同影低咪錶，用T-Money或者信用卡俾錢留低記錄都係其中一個方法！
Call車或者用T-Money/信用卡俾錢嘅另一個優點係，如果漏低嘢喺車上面都可以即刻搵到自己搭嗰架的士！
喺韓國想投訴的士？
雖然唔少人都會擔心韓國的士會唔會出現劏客或亂收費問題，不過截至2026年，韓國當地針對外國旅客遇到的士問題嘅支援措施比以前完善，大家唔需要太擔心。
其中一個例子係官方正逐步加強QR code舉報渠道，同時亦改善咗收據上嘅英文資訊，令旅客更容易核對乘車內容。所以如果不幸遇到不合理收費或者其他乘車糾紛，大家可以掃描車內嘅 QR Code、前往韓國旅遊投訴中心網站，或者打電話去韓國觀光公社1330（提供中文服務）提出投訴！
🚕居韓小編小貼士：想提出投訴嘅時候記住一定要提供車牌號碼、上落車地點、乘車時間、收據等資訊，以免申訴唔成功！
韓國的士常見問題FAQ
| Q1. 韓國的士主要分幾多種類？
A：一般旅客最常遇到嘅主要有四類：一般的士、模範的士、大型的士同國際的士。想慳錢通常揀一般的士；如果深夜搭車或者想坐得舒服啲，可以考慮模範的士；多人同行或行李多就適合大型的士；如果擔心語言溝通，國際的士會更方便。另外江原道亦有另外提供外國人專用觀光的士服務，江陵、春川、束草都有。
| Q2. 首爾一般的士起錶幾多錢？
A：根據2026年5月最新資料，首爾一般的士日間起錶價為₩4,800（約KRW 4,800）。實際車資會因距離、時間、路況同附加費而有所不同。
| Q3. 韓國的士深夜附加費由幾點開始？
A：首爾一般的士通常由 22:00 至 04:00 收取深夜附加費，其中 23:00 至 02:00 加幅最高。
| Q4. 喺韓國可唔可以直接用Uber？
A：一般情況下可以，直接用原本已經登入好嘅Uber帳號喺韓國叫車就得，對第一次去韓國嘅人嚟講夠方便。
| Q5. 韓國的士可唔可以用信用卡俾錢？
A：大部分情況都可以。除咗信用卡，T-money、WOWPASS 等付款方式亦相當常見。不過為免遇到讀卡失敗，建議準備現金等後備付款方式。
| Q6. 仁川機場去首爾市區大概要幾多錢？
A：一般的士通常約₩60,000-95,000（約KRW 60,000-KRW 95,000）；如果係大型的士或者深夜時段就會再貴啲。
| Q7. 韓國的士會唔會另外收高速公路費？
A：會。特別係由仁川機場去首爾市區，通常會另外計算高速公路收費，所以最後費用會比起咪錶上價錢貴少少。
| Q8. 外國旅客可唔可以用Kakao T叫車？
A：可以，不過建議事先下載同登入，試埋付款設定會比較安全。
| Q9. 深夜截唔到車可以點做？
A：最實際方法通常係改用 Uber、Kakao T 等叫車 App；如果仍然叫唔到，可以行去大路、酒店門口或者便利店附近再試。
| Q10. 如果喺韓國搭的士漏低嘢，可以點樣搵返？
A：如果係用 App 叫車，通常可以喺乘車紀錄搵到車輛或司機資料；如果係街邊截車，建議你一定要留低付款收據同記錄低上落車時間。
參考資料及確認來源
本文由長期整理外國旅客韓國交通、預約同出行資訊，居韓超過7年嘅Creatrip小編撰寫，並根據官方及公開資訊持續更新。
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
