韓國的士總整理/搭的士教學
韓國坐的士驚俾人呃？記得呢啲小貼士就唔使驚啦！
- 韓國的士種類/收費
- 韓國搭的士教學
- 韓國機場的士接送
- 韓國的士旅行
Hello，大家好，我哋係由韓國人每日提供最新韓國旅行資訊嘅Creatrip。
比起搭地鐵同巴士，韓國的士真係方便又快捷，如果同朋友一齊夾份，分分鐘平過自己搭公共交通。只係人生地不熟，唔熟悉韓國的士收費同相關規例，真係好驚俾人劏，搞到唔係咁心安... 今日就等小編幫大家整理一連串同韓國的士相關嘅資訊啦！
韓國的士種類/收費
韓國的士種類
如果話香港的士係根據服務地區分類，吓韓國的士就係根據服務/對象而有所唔同！
一般的士
一般的士嘅外型同顏色會根據地區而有唔同，首爾地區嘅一般的士通常係橙色，而京畿道同江原道嘅就會係銀白色或者橙色等。
一般的士係價格最平同最普遍嘅韓國的士，的士司機通常只係識講韓文，唔識韓文嘅朋友可能會怕溝通唔到。小編喺下面整理咗幾句搭的士嘅時候會用到嘅韓文，有需要可以碌落下面參考！
國際的士
雖然同韓國一般的士顏色一樣，但韓國國際的士車身上面會寫住「International Taxi」，揸呢款的士嘅司機會識中、英、日至少一種外國語言，方便唔識韓文嘅外國旅客。國際的士需要事先預約或call車，亦都有提供包車同接機服務，不過價格會比一般的士貴。
韓國模範的士
網上成日都見到有人話記住唔好搭韓國黑色的士，因為價錢貴到唔知係咪俾人呃緊錢XD 呢款所謂嘅黑色的士其實係提供高級服務嘅「模範的士」。車身兩邊會寫住「모범택시」，車內空間比較闊落同舒服，而且標榜提供高質素服務。揸呢種的士嘅司機必須要識講外國語言，而且要有十年以上無肇事安全紀錄，先可以獲發模範的士執照。
小編之前去釜山玩嗰陣坐過呢種的士，雖然感覺唔到同其他的士有咩唔同，但上落車嘅時候司機會主動幫手開門，仲會幫忙擺行李，呢方面嘅服務的確好過一般的士。
韓國大型的士
大型的士比較少見，價錢同樣模範的士計法一樣，適合一大班人搭（六至十人），車身會寫住「대형택시（JUMBO TAXI）」。呢種的士通常都要預約，喺機場比較容易見到佢哋。
Uber / UT
大家知唔知原來喺韓國都可以叫Uber呢！喺首爾市區叫Uber都好方便，而且不洗另外下載其他App，用返自己平時個Uber App就得（喺韓國會自動切換成韓國版本「UT」，頁面會維持係繁體中文），call車、搭車、俾錢方式都一樣！
i.m Taxi
最近韓國路上多咗好多呢款叫「i.m Taxi」嘅大型的士，通常大型的士都要另外call車，不過呢款「i.m Taxi」就可以直接喺路上截車，可以話係最大優點之一！
韓國的士收費
首爾一般的士收費(2024.09)
| 時間 | 起錶價錢 |
日間 (04:00~22:00) | ₩4,800 |
深夜 (22:00~04:00) | ₩6,700 (23:00~02:00) |
₩5,700 (21:00~23:00) (02:00~04:00) |
其他城市一般的士收費(2024.09)
| 城市 | 日間起錶價錢 |
| 仁川/京畿道 | ₩4,800 |
| 釜山 | ₩4,800 |
| 大邱 | ₩4,000 |
| 江原道 | ₩4,600 |
| 濟州 | ₩4,300 |
大型/模範的士收費(2024.09)
| 城市 | 日間起錶價錢 |
| 首爾 | ₩7,000 |
| 釜山 | ₩7,500 |
| 大邱 | ₩5,500 |
| 仁川 | ₩7,000 |
韓國搭的士教學
路上截車？用App Call車？
경향신문
喺韓國想截車嘅話，大家首先要睇吓車頭有冇著「빈차（空車）」燈，如果冇就代表有人。如果見到有截得嘅的士，好似喺香港咁揮一揮手就得。
如果想用App Call的士，大家除咗可以用頭先提過嘅Uber，亦都可以用韓國「Kakao Taxi（카카오 T）」。「Kakao Taxi（카카오 T）」可以綁定電話號碼，仲可以幫你事先估算車錢同路線，加上會留低Call車記錄，發生咩事都有證據！
另外大家上車之前記住睇吓車牌係唔係黃色，上面有冇寫住아、바、사、자其中一個字，要滿足上面兩個條件先係正式登記好嘅合法的士。
點話俾司機聽要去邊？
如果係Call車就唔會有呢個煩惱，不過如果係直接截車，又唔識講韓文，建議事先搵好目的地嘅「韓文地址」，或者係目的地最近嘅地鐵站/景點嘅「韓文名」。喺地鐵站落車有時候會好過直接叫司機揸去目的地（唔洗繞入人多複雜嘅巷仔，落車之後行過去可能仲快XD）！
點俾錢更加方便？
去到目的地之後大家就要按照咪錶上面嘅金額俾錢，不過如果係去機場，或者曾經上過高速公路，可能要俾埋過路費。如果大家覺得司機兜路行，或者覺得價錢唔係好對路，除咗可以記低車牌同影低咪錶，用T-Money或者信用卡俾錢留低記錄都係其中一個方法！
Call車或者用T-Money/信用卡俾錢嘅另一個優點係，如果漏低嘢喺車上面都可以即刻搵到自己搭嗰架的士！
喺韓國想投訴的士？
- 網上：韓國旅遊投訴中心
- 電話：1330（韓國觀光公社）
如果唔好彩遇到不良韓國的士，大家可以各位透過上面條link或者電話投訴（記住要寫低車牌號碼，或者係T-Money付款紀錄）。
韓國機場的士接送
仁川機場的士站
- T1：出境大堂 5C、6C、6D
- T2：出境大堂 5C
喺仁川機場出首爾搭地鐵要1個鐘頭左右，搭機場巴士就要個半鐘。搭的士雖然的確會貴啲，不過會係最方便同舒服嘅方法。仁川機場T1同T2都有的士站，如果有需要都可以去櫃檯搵職員幫手。
仁川機場的士包車接送服務
如果怕現場截車費用唔固定，或者會遇到唔好嘅司機，事先預約定機場接送服務都係一個唔錯嘅選擇！
韓國的士旅行
相比首爾同釜山，江原道等等嘅周邊地區嘅公共交通未算好發達，如果冇私家車，Call的士真係會方便好多！而家有機構提供緊一啲專為外國人而設嘅的士旅行行程，有興趣嘅朋友可以參考吓！
以上係今日小編幫大家整理嘅韓國的士介紹同教學，希望可以幫到大家！
如果有更多想知嘅內容，都可以隨時留言或者dm話俾我哋知：）
Mail：help@creatrip.com