韓國無人商店偷竊問題
韓國無人雪糕店、無人即食麵便利店等等應有盡有！但係出現偷竊問題到底係邊個要負責任？
Hello，大家好，我哋係由韓國人每日提供最新韓國旅行資訊嘅Creatrip。
有嚟過韓國旅行，或者本身住喺韓國嘅朋友們應該都知道，韓國比起用現金更加多用扣賬卡同信用卡。而呢個習慣間接令韓國出現更多無人自助商店，只要攞自己想買嘅嘢，嘟一嘟個barcode，再碌卡俾錢就得！不過最近喺呢啲商店頻繁出現偷竊問題，跟住小編一齊一探究竟啦！
韓國無人商店偷竊問題
講起韓國無人商店，小編第一個諗起嘅就係無人雪糕店同即食麵便利店！前者通常都可以用比超市同便利店平嘅價錢買到雪糕食，而後者就可以揀好即食麵之後直接喺鋪頭入面煮嚟食，真係超方便！
除咗頭先講嘅韓國人消費習慣之外，節省人工開支都係其中一個無人店鋪會越開越多嘅原因，老闆可以減少營運成本，顧客又可以24小時都去買嘢，可以話係雙贏！
아시아타임즈
不過因為鋪頭入面冇人可以看住，老闆們只可以喺鋪頭入面設置閉路電視同用密碼鎖扣好放錢嘅地方，唔可以話無補於事，但只可以話成效唔大。而隨住無人店鋪越嚟越多，最近呢種無人自助商店成為咗偷竊嘅重災區。
제주일보
以大邱為例，上年無人店鋪增加至299間，而無人自助商店偷竊案件就由前年嘅172宗急增至269宗，每個月平均最少都會發生5-6單。而濟州島亦都有幾個中學生趁新年期間少人看鋪頭，戴住頭盔連續喺7間鋪頭偷嘢，都真係幾誇張吓...
동아일보
呢個時候問題就出現啦，因為通常喺呢種商店偷嘢都唔會偷得太多錢，大部份都係₩1,000~2,000，如果每次都要叫警察出動查案，喺警察立場嚟睇係浪費緊人力物力同時間。有時候有啲店主仲會一直死纏爛打，點都要攞到賠償金先肯收手，變相令妨礙緊警察工作。
경향신문
雖然話警察有義務幫市民預防罪案發生同維持治安，但係警察唔係看更，而且始終人力有限，好難每次都分配人手去處理。專家都認為店主們有責任自行制定管理店鋪方針去減少偷竊案件發生，例如經常巡鋪，俾人一種真係有人管理緊鋪頭嘅感覺。
大家又認為係警察小題大做，定覺得店主們都需要負上一定責任呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk