韓國拉麵便利店介紹
韓國人鍾意食拉麵可以發展到開「拉麵便利店」？30幾款拉麵任揀、配菜任加？
Hello，大家好，我哋係由韓國人每日提供最新韓國旅行資訊嘅Creatrip。
韓國人真係好鍾意食麵，除咗喺便利店同超市可以買杯裝即食麵之外，韓國而家仲有埋「即食麵便利店」，早排KBS仲有去影過！小編睇完都忍唔住跟去，而家就話俾大家知佢有咩咁特別啦！
想食盡韓國好西？😋
韓國即食麵便利店介紹
地址：서울 종로구 돈화문로 11
營業時間：24小時
韓國有好多好食嘅即食麵，如果大家之後嚟韓國旅行，真係好推薦大家嚟即食麵（無人）便利店，保證係一個新體驗！
呢間即食麵便利店喺鍾路3街站14號出口附近，每日24小時營業，所以無論幾時去都冇問題，佢最特別之處就係冇人睇住，大家可以自出自入，俾錢同煮都係自己一手包辦！早排KBS仲有嚟過拍攝講解添！
餐廳分咗兩層，但就唔算好大，位都唔太多，不過就有好多即食麵款可以揀，如果唔夠飽呢度另外仲有白飯買，韓國人好鍾意將剩底嘅湯用嚟撈白飯食㗎！
如果想飲嘢，都可以俾完錢再打開雪櫃拎。
二樓有幾個煮麵機同座位，樓下太多人都可以上去整。
大家首先要喺一樓嘅機器揀想要嘅即食麵，機上有哂名同圖，所以落單相當方便，想加雞蛋、白飯、汽水等直接加就OK！
揀好哂之後撳右下角嘅藍色制就可以插卡俾錢。
俾完前之後拎好單，再去即食麵櫃到拎啱啱落單嘅拉麵就可以，最後小編買咗辣雞麵（불닭볶음면）、芝麻拉麵（참깨라면）同1隻雞蛋（계란）。
喺自助煮麵機前面會見到有一個個紙碗，將拉麵放入碗，再倒其他調味料加水一齊煮就得。不過如果係辣雞麵就只放麵煮就得，倒咗啲水之後，先好再落調味料。
另外呢度仲會免費提供新鮮芽菜、大蔥、魚糕、辣椒粉、芝士等，大家可以隨意加落麵到一齊煮，雞蛋喺水滾之後先好落。（為咗衛生，大家喺加配料時，記得要戴好手套。）
加哂所有配料之後，將碗麵放喺煮麵機上，然後撳M1（1包麵）、撳M2加湯，最後撳M3煮麵。
機器會自動加水、煲水，同時會set好時間，大家只要等就可以啦！
大約等3分鐘左右，一碗麵就煮好啦！喺隔離會有一個托盤同筷子，大家可以順便拎埋醃蘿蔔、泡菜同拉麵一齊食。
成個過程5分鐘都唔使！價錢亦都唔貴，唔知吸唔吸引到大家呢？
因為加咗大蔥、大豆芽、魚糕等配料，同平時一般喺便利店買到嘅杯麵真係差好遠！
鍾意食辣嘅朋友，識食一定係食火辣雞撈麵！不過今次小編加埋魚糕一齊煮，覺得味道冇咁辣，不過一樣都好味！
芝麻拉麵係小編最鍾意嘅韓國拉麵之一！喺韓國食唔到出前一丁，小編都會用佢代替（雖然味道唔一樣，但麻油味一樣重，超好食！）加埋配菜一齊食超完美！
如果食唔晒，大家可以將啲麵倒入不鏽鋼筒度，黑色垃圾桶係揼一般垃圾，白色垃圾桶係揼回收垃圾，而食完嘅拉麵碗，只要擺喺最左邊嘅紙箱就可以。
雖然平時去漢江都可以整自助拉麵，不過配料唔多，呢度反而可以免費加，都係一個唔錯嘅體驗！
安坐家中都可以買到即食麵？🍜
如果有更多想知嘅內容，都可以隨時留言或者dm話俾我哋知：）
Instagram：creatrip.hk