Hello，大家好，我哋係由韓國人每日提供最新韓國旅行資訊嘅Creatrip。
大家嚟到韓國，最常搭嘅交通工具應該就係地鐵同巴士，今日小編就幫大家整理好喺韓國搭地鐵有咩需要注意，無論係嚟旅行定係留學，睇完話唔定會對你有幫助！
其他相關文章：
韓國地鐵車費&小貼士
(左)Naver、(右) Kakao
韓國地圖App主要係Naver同Kakao，如果大家想搭地鐵都可以用佢睇點樣去，同時仲可以睇到首/尾班車係幾點。
首都圈
首爾地鐵總共有23條線，每條路線都會分咗唔同顏色，每個站都有代碼去區分，另外每個地鐵站都有韓文、中文、英文同日文名，所以唔怕搵唔到。
| 首爾地鐵車費 | |||
| 基本費用（10km） | 成人 | 交通卡 | ₩1,400 |
| 單程車飛 | ₩1,500 | ||
| 青少年 | 交通卡 | ₩800 | |
| 單程車飛 | ₩1,500 | ||
| 小童 | 交通卡 | ₩500 | |
| 單程車飛 | ₩500 | ||
| 額外費用 | 成人 | ₩100 | |
| 青少年 | ₩80 | ||
| 小童 | ₩50 | ||
※額外費用：10km至50km - 每5km加收₩100，超過50km - 每8km加收₩100
韓國嘅所有交通工具每段距離都會收取額外費用，另外地鐵轉巴士，或者巴士轉巴士，只要喺30分鐘內轉車，都可以享有免費轉乘優惠（最多3次）。而韓國「一般」係指19歲以上、「青少年」係13至18歲，而「小童」就係6至12歲。
釜山係韓國第二大城市，地鐵冇首爾咁複雜，佢最特別係當地鐵入站嘅時候，只要就到有海嘅車站仲會播海浪同海鷗聲為背景音樂。
釜山地鐵車費 | |||||
|---|---|---|---|---|---|
交通卡 | 單程車飛 | ||||
成人 | 青少年 | 小童 | 成人 | 青少年 | 小童 |
₩1,450 | ₩1,050 | 免費 | ₩1,500 | ₩1,150 | ₩700 |
釜山地鐵分2個區間，第1區間係指10km以內，如果搭超過10km以上就會係以第2區間去計。
小Tips：如果大家入閘時唔小心入錯邊，只要喺5分鐘內重新啪卡去另一邊就會用返基本費用去計。
大邱
大邱地鐵只得3條線，呢度尾班車比其他地區更早開出，如果大家會成日搭地鐵，建議要先check清楚。
| 列車服務時間 | |||||
| 一般 | 青少年 | 小童 | |||
| 單程車飛 | 交通卡 | 單程車飛 | 交通卡 | 單程車飛 | 交通卡 |
| ₩1,400 | ₩1,250 | ₩1,400 | ₩850 | ₩500 | ₩400 |
大邱地鐵最大賣點係無論搭幾km都係用一價錢！唯一一個Tips係如果大家去半月堂站、中央路站、東大邱站、西門市場站等要避開多人嘅時候，如果唔係會變沙甸魚。
搭地鐵方法
單程車飛
| Step 1. |  首先去地鐵站售票機揀你想去嘅地點，之後再俾錢，價錢有₩500係保證金。 |
| Step 2. |  拎單程車飛。 |
| Step 3. |  上車時啪卡。 |
| Step 4. |  落車時啪卡，再去返「保證金退還機（보증금 환급기）」退就可以拎返₩500。 |
其他卡
如果係用Tmoney或者扣賬卡，只要入閘時直接啪卡就可以，如果落車之後發覺餘額唔夠，可以喺出閘前嘅增值機增值。
搭地鐵注意事項
1. 地鐵內廣播
韓國地鐵只要去到可以轉線嘅車站就會播特別嘅背景音樂，另外首爾站、弘大入口站、仁川機場站、金浦機場站等遊客成日去嘅車站，除咗有韓文之外，仲會有埋中文、英文同日文廣播。
2. 地鐵電子顯示牌
地鐵車卡入面都有電子顯示牌，大家可以睇佢就知道而家去到咩站，亦都可以睇喺邊個方向落車。
3. 急行列車
首爾人口多，成日都會好繁忙，所以1號線、4號線、9號線、京義·中央線、水仁·盆唐線同京春線都設有急行班次，如果順利搭到有時仲會慳返唔少時間添！不過要注意因為急行列車會飛站，所以搭之前一定要睇吓會唔會停你要去嘅車站。
4. 關愛座（老人、幼兒、孕婦、傷殘人士等）
韓國地鐵有30%座位都係提供俾老人家坐，通常會設置喺車廂兩邊（X-1/X-4），另外孕婦座位會設為粉紅色，大家千祈唔好坐錯。
5. 基本禮儀
任何國家/地區搭公共交通工具時都要遵守基本禮儀，一齊睇吓韓國有咩要注意啦！
- 唔可以無禮上車
- 先落車再上車
- 關愛座唔可以亂坐
- 搭扶手電梯時唔好行同奔跑
- 手機設置為震動/講電話時請音量收細
- 唔好幫襯車廂入面叫賣嘅人
- 唔好喺車廂奔跑或大聲喧嘩
- 唔好擘大腳坐
- 禁止飲食
其他貼士
1. 巴士↔地鐵轉乘優惠
只要用交通卡就可以享用轉乘優惠，只要用交通卡搭巴士/地鐵30分鐘內轉車，就可以享有轉乘優惠，但提提大家只可以用巴士轉地鐵或巴士轉巴士，地鐵轉地鐵唔會有優惠。
2. 地鐵轉乘
9號線、機場鐵路等路線喺轉車時都要啪多次卡，但係唔會扣錢，大家唔需要太擔心。
3. 緊急出入口
每個地鐵站閘口附近都會有一個寫住「Help」嘅出入口，如果大家有問題都可以撳佢同職員聯絡，只要講有咩問題，佢哋就會幫你開門，或者推住BB車或輪椅都會用到。
喺地鐵唔見嘢可以點做？
有時唔小心瞓過龍急急腳落車，點知發覺有嘢漏咗喺車？大家唔需要擔心！只要去地鐵失物認領中心就可以（開放時間為平日09:00-18:00），但如果係放假日子/失物認領中心營業時間前後，就可以喺落車後去月台同職員講你搭車嘅車廂就可以。
資料來源：공공데이터포털、레일포털、서울교통공사 사이버스테이션、한국유학종합시스템
以上係「韓國搭地鐵小Tips」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
