韓國任食炒年糕餐廳「兩餐」介紹
MBTI進化到出埋年糕？韓國人點解咁有Gimmick諗到？你會唔會想去試？
Hello，大家好，我哋係由韓國人每日提供最新韓國旅行資訊嘅Creatrip。
唔知講到韓國炒年糕，大家係唔係都只會諗到紅卜卜嘅湯底呢？今日小編就想同大家介紹韓國一間專食炒年糕嘅專門店，佢最大賣點係呢度嘅年糕係可以自己去DIY調汁同拎材料煮，如果你自認係一位「食糕獸」，咁就要繼續睇落去啦！
韓國任食炒年糕餐廳「兩餐」
- 韓文名：두끼
- 地址：서울 중구 장충단로13길 20 9F [*東大門City Outlet分店]
- 營業時間：11:00 - 22:00（ Last Order 20:30、自助吧21:00）[*東大門City Outlet分店]
嚟韓國食炒年糕，大家係唔係都會只諗到街邊檔或者三清洞摩西呢？今次小編想推薦大家搞搞新意，去一間韓國人超鍾意去嘅連鎖店食，佢最大賣點係超多款年糕，同時可以自己DIY醬汁！
「兩餐（두끼）」喺韓國超多分店，全國大約有200幾間。今次小編去嘅係東大門City Outlet分店，地理位置方便，好啱大家Shopping完之後去食返餐！
呢度價錢超平！大人任食 ₩9,900、小學/中學生 ₩8,900、小童（7歲以下）₩5,900， 而36個月或以下幼童更加係免費，聽完個價錢係唔係覺得超佛心呢？ 重點係限時都有1小時30分鐘，大家完全可以食到超飽出返嚟！
全部食材都係任拎（建議大家食到幾多拎幾多，千祈唔好眼闊肚窄啊！）。呢度有提供非常多種食材，淨係年糕本身都已經有成8款咁多啊！不過今次小編之所以會想推薦大家去，係因為佢哋最近非常緊貼潮流，新出咗一款MBTI年糕！
提提大家：MBTI年糕係期間限定，12/6 - 1/20先會有，之後會唔會繼續出，小編會再留意同大家Update返！
以前韓國人可能會比較相信血型，連識人嘅時候都會問對方血型係咩。但自從突然有好多人開始討論MBTI之後，見親新朋友比起問血型，大家都會問返句：「你MBTI係咩啊~？」。
而家就跟住小編一齊睇吓「兩餐」入面有咩食啦！一去到個位，會見到有個煲同一個不鏽鋼碗，大家要攞住呢個碗去夾食材。
因為真係超多款食材，令小編都忍唔住一夾夾咗超多！
而頭先都有提到，呢度最特別就係可以自己整湯底，呢度有8款醬汁，每一款都係超人氣！
而最近仲新出咗一款「TMI醬汁」，以雞湯做基底，亦都有種好似加咗胡椒粉咁嘅辣味，不過就算唔食辣都可以接受到！如果想試新嘢，或者覺得一般炒年糕太辣太重口味，小編推薦大家可以試吓呢款！
提提大家：TMI醬汁同MBTI年糕一樣都係期間限定，12/6 - 1/20先會有，之後會唔會繼續出，小編會再留意同大家Update返！
調醬嘅位會有一個牌寫住黃金Recipe（황금레시피），係教大家點去調醬，大家去嘅時候可以參考下面嘅中文翻譯同對照住韓文，mix出最啱自己口味嘅黃金比例湯底。
小Tips：就算唔跟呢幾個Recipe，大家自行調較醬料嘅時候記住𢳂3羹嘅量就夠，如果唔係就會太淡或者太鹹㗎啦！
湯底口味 | 辣度 | 醬汁比例 （1 = 1大羹） |
兩餐ORIGINAL | ★★★ | 두끼x1 + 떡모 OR 즉떡x2 兩餐醬x1 + 萬能年糕醬 OR 辣炒年糕醬x2 |
兩餐BEST | ★★★★ | 두끼x1 + 떡모 OR 즉떡x1.5 + 동대문x0.5 兩餐醬x1 + 萬能年糕醬 OR 辣炒年糕醬x1.5 + 東大門x0.5 |
兩餐炸醬風味 | ★★ | 두끼x1 + 짜장x2 兩餐醬x1 + 炸醬x2 |
兩餐釜山風味 | ★★★ | 두끼x1 + 부산x2 兩餐醬x1 + 釜山醬x2 |
兩餐東大門風味 | ★★★★★ | 두끼x2 + 동대문x1 兩餐醬x2 + 東大門醬x1 |
兩餐粉紅醬 [微辣版] | ★ | 크림x2 + 두끼x1 忌廉醬x2 + 兩餐醬x1 |
兩餐粉紅醬 [較辣版] | ★★★ | 크림x2 + 동대문x1 忌廉醬x2 + 東大門醬x1 |
兩餐麻辣燙 | ★★★ | 마라탕소스x2.5 + 마유소스x0.5숟갈 麻辣燙醬x2.5 + 花椒油x0.5小匙 |
韓式麻辣燙 | ★★★★ | 마라탕소스x2.5 + 동대문x0.5 + 마유소스x0.5숟갈 麻辣燙醬x2 + 東大門x0.5 + 花椒油x0.5小匙 |
麻辣忌廉醬 | ★★ | 마라탕소스x0.5 + 두끼x0.5 + 크림x2 + 마유소스x0.5숟갈 麻辣燙醬x0.5 + 兩餐醬x0.5 + 忌廉醬x2 + 花椒油x0.5小匙 |
宮廷炒年糕 | 完全唔辣 小朋友都食得！ | 궁중x3 宮廷醬x3 |
忌廉炒年糕 | 完全唔辣 小朋友都食得！ | 크림x3 忌廉醬x3 |
加上呢度嘅飲品、炸物同魚糕串都係任拎，完全就係CP值超高！
拎好哂材料同飲品，小編就開始煮湯底，一開始小編就試咗佢哋新出嘅TMI醬汁，水滾之後就可以放個汁落去。
滾好之後就可以放食材，小編因為3個人去，真係拎咗勁多！
小Tips：放食材順序係 年糕 [米製(白色)]→ 魚糕 → 蔬菜 → 麵類 → 年糕[麵粉製(啡黃色)]。
呢條超長嘅年糕係用麵粉做，超煙韌，小編個人最鍾意食呢款！
食完第一鍋如果覺得唔夠喉，可以再去調其他醬。今次小編就試咗佢哋最出名嘅東大門口味（兩大羹兩餐醬＋一大羹東大門醬），佢係咁多款之中最辣，如果鍾意食辣嘅朋友絕對唔可以錯過！
小Tips：如果想換其他醬汁去煮，呢度會免費幫大家換一次煲。
不過因為小編食完TMI醬都算乾淨就冇去換到，同樣一開始先煲水，等滾好之後再落醬汁。
MBTI年糕係用米做，比起加落TMI醬汁，小編個人覺得加落辣辣地嘅東大門湯底更加惹味！
食完年糕都係覺得唔夠飽？仲可以整蓋飯食！大家可以自己DIY加炸物、泡菜（辛奇）、紫菜碎等食材，如果想再濃味啲，可以加埋照燒醬、沙律醬同麻油。
「兩餐（두끼）」注意事項：
- 限時1小時30分鐘。
- 可以免費換一次煲。
- 如果浪費食材，或者淨低超過一碗份量嘅嘢食，就會罰款₩2,000。
- 醬汁冇限可以換幾多款，只要喺限時內食完就可以。
- TMI醬汁同MBTI年糕係期間限定（12/6 - 1/20），想去試吓嘅朋友就要爭取時間啦！
- 某幾款炸物都係期間限定（12/6 - 1/20），錯過咗就會冇。
- 如果材料提早賣哂，活動就會提早結束。
- 韓國各區都有分店，大家平時嚟旅行嘅景點多數都會有，例如：東大門、明洞、梨大、弘大等，總有一間喺你附近。
- 如果唔想堂食，可以外賣返去自己煮，外賣盒有分中同大，價錢唔一樣，大家可以夾自己想要嘅材料，只要裝得哂落個盒同衾得實個蓋就可以。
整體嚟講，小編覺得價錢相當合理，就算係學生都負擔得起，超推薦大家之後嚟韓國都去試吓！
如果有更多想知嘅內容，都可以隨時留言或者dm話俾我哋知：）
Instagram：creatrip.hk