全州韓劇拍攝地景點總整理
原來有唔少韓劇都係喺全州取景!之後去全州絕對唔可以錯過嘅打卡位!
Hello,大家好,我哋係由韓國人每日提供最新韓國旅行資訊嘅Creatrip。
唔知大家睇韓劇嘅時候,會唔會留意係喺邊度拍,之後會想跟住去打卡嘅呢?今次小編整理好幾部熱門韓劇係喺全州取景,如果大家之後有打算去全州嘅朋友,可以先save底之後參考吓!
全州韓劇拍攝地景點總整理
全州鄉校(전주향교)
- 地址:전북 전주시 완산구 향교길 139 전주향교
韓劇《衣袖紅鑲邊》
韓劇《衣袖紅鑲邊》第3集入面,宮女們一齊舉辦市集慶典,結果因為宮中突然出現老虎,德任協助將現場五百多位宮女疏散場景,當時其實就係喺全州鄉校大成殿取景。
朝鮮時期全州鄉校係唔少書生讀書嘅地方,而家已經變成韓劇熱門打卡景點,之前《雲畫的月光》、《成均館緋聞》、《普通的戀愛》等都有嚟取景。
一直行行到底就會見到明倫堂,呢度有棵銀杏樹擁有350年歷史,好多韓國人會揀秋天去,就係為咗同銀杏影返張人生照。
二五二一(이오이일)
- 地址:전북 전주시 완산구 오목대길 5-19
- 網址:官網(韓文)
韓劇《二十五,二十一》
2022年人氣韓劇《二十五,二十一》,女主角希度屋企而家已經變成一間可以食到燒肉嘅民宿。
因為喺小山丘上面,沿途可以望到韓屋村全景,無論朝早定夜晚望到都一樣好有feel。
寒碧隧道(한벽터널)
- 地址:전북 전주시 완산구 교동
韓劇《二十五,二十一》
《二十五,二十一》當中一個經典場景就係呢個「隧道」,除咗高宥琳歸化俄羅斯事件、男女主角兩人最後道別嘅場景,一樣喺呢度拍。
梅堂(매당)
- 地址:전북 전주시 완산구 은행로 20-4 풍남동1가
- 營業時間:11:30 - 22:00
韓劇《那年,我們的夏天》
梅堂係韓劇《那年,我們的夏天》男主角崔雄屋企開嘅「小雄同在」餐廳,同時係劇中眾多重要場面之一。
事實上呢度都係一間餐廳,主要係賣烤牛肉餅、豆腐全鍋等韓定食,入口仲可以見到老闆同演員嘅合照。
首爾鐵物工業社(서울철물공업사)
- 地址:전북 전주시 완산구 은행로 7-1
韓劇《那年,我們的夏天》
首爾鐵物工業社係劇中崔雄爸爸朋友昌植開嘅五金鋪,雖然出現次數唔多,不過係崔雄作為畫畫主題建築物之一。
三岔路客棧(삼거리주막)
- 地址:전북 전주시 완산구 오목대길 31
韓劇《那年,我們的夏天》
第一集崔雄唔小心喺國延秀面前出醜嘅場景就係呢個轉彎位。本身呢度係一間賣紅豆粥嘅餐廳,不過小編去到時見到入面係空,應該係執咗笠。
慶基殿(경기전)
- 地址:전북 전주시 완산구 태조로 44
- 營業時間:09:00 - 19:00、11月至2月 09:00 - 18:00
韓劇《雲畫的月光》
韓劇《雲畫的月光》劇中有好多場景都係喺慶基殿拍,而呢個好多人嚟到嘅打卡位,更加係李韺王世子同洪羅溫兩人第一次喺宮中相遇地方。
慶基殿內供奉住朝鮮開朝君王太祖「李成桂」肖像畫,雖然入面唔算好大,但周圍都係打卡位,好適合著住韓服影相。
全州韓屋村(전주한옥마을)
- 地址:전북 전주시 완산구 풍남동3가
韓劇《我的室友是九尾狐》
韓劇《我的室友是九尾狐》中,李潭喺條街跑就係全州韓屋村嘅「豐南洞三街」,呢度超熱鬧,有好多算命、影人生四格、同畫人像畫、賣小食嘅地方等。
基本上大部分拍攝地都喺全州韓屋村附近,所以唔會好遠!大家之後會唔會都想跟住Oppa同Onni腳步去打卡呢?
如果有更多想知嘅內容,都可以隨時留言或者dm話俾我哋知:)
Instagram:creatrip.hk