蠶室購物總整理
問到蠶室有邊度好行？一定離唔開百貨公司！呢度應有盡有！
Hello，大家好，我哋係由韓國人每日提供最新韓國旅行資訊嘅Creatrip。
想喺蠶室Shopping一定離唔開百貨公司，呢度應有盡有，不過其實喺松理團路附近都有好多精品小店等住大家，自認係購物狂嘅你，就要繼續睇落去啦！
蠶室購物總整理
1. 樂天世界購物中心（롯데월드 몰）
樂天世界購物中心相當之大，可以通過地鐵站入去，如果之後嚟旅行諗唔到去邊，可以抽啲時間嚟行吓。
呢度總共有378間舖頭、餐廳Cafe同其他設施等，所以就算安排一日嚟呢度都唔會覺得無聊！除咗食之外，大家仲可以喺度睇戲、參觀水族館等體驗活動。
呢度由B1至到6樓，真係有排可以行！
甚至世界各地品牌呢度都有，例如H&M、Zara、Uniqlo同Sephora等。
樂天世界購物中心（롯데월드 몰）
- 地址：서울 송파구 올림픽로 300
- 營業時間：10:30 - 22:00
- 小Tips：蠶室站10、11號出口隔離
2. 樂天Avenuel（롯데 에비뉴엘）
其實樂天Avenuel係同樂天世界購物中心連埋，可以透過地下或6樓穿過去，甚至6樓有埋Food Court，可以食飽之後再去瘋狂shopping！
呢度有買好多世界各地高級名牌，例如Gucci、Chanel、LV等，裝修都特別高級！
可能有啲款香港冇，嚟到韓國會有，大家都可以對比下。
Lotte Avenuel （롯데 에비뉴엘）
- 地址：서울 송파구 올림픽로 300
- 營業時間：10:30 - 20:00
- 小Tips：蠶室站1、2號出口隔離
3. 樂天免稅店（롯데 면세점）
蠶室樂天免稅店就係喺樂天世界購物中心嘅8樓同9樓，Avenuel正上面，好多時想買平嘢，去免稅店就一定唔會有錯。
如果要喺度買嘢，一定要出示機票證明，幾時會由韓國返去自己國家/地區。
呢度有平價品牌到高價品牌都可以一次過買到，甚至價錢仲會平啲，不如就喺度買番啲紀念品返去啦！
樂天免稅店（롯데 면세점）
- 地址：서울특별시 송파구 올림픽로 300 8-9F
- 營業時間： 09:30 - 17:30、新年休息
- 小Tips：蠶室站1、2號出口隔離樂天世界購物中心8-9樓
4. Kakao Friends Store（카카오 프렌즈 스토어）
講到韓國代表卡通人物，相信唔可以唔提Kakao Friends，佢哋每一個角色都有自己獨特性格同魅力。
雖然唔算好大，不過每一個角落都擺滿佢哋嘅精品，每一個季節都有特定嘅主題商品，例如之前就有聖誕款式。
唔單止公仔，呢度仲有好多家庭用品、筆記、睡衣、鍵盤等，每款都超可愛，令人忍唔住打開銀包買幾個返去。
Kakao Friends Store（카카오 프렌즈 스토어）
5. 蠶室地下街（잠실역지하쇼핑센터）
如果天氣唔好，行地下街就一定唔會錯！雖然有差唔多200間舖頭，慢慢行都可以係幾個鐘。
通常地下街買到嘅衫都係最平，而且都係流行嘅款式，襪、耳環等₩1,000都可以入手，好多衫都係₩10,000起。
呢度都有幾間韓國本地品牌美妝鋪頭，就好似有Etude House、 Holika Holika等。
蠶室地下街（잠실역지하쇼핑센터）
- 地址：서울 송파구 올림픽로 265
- 營業時間：每間鋪頭都唔一樣
- 小Tips：喺蠶室站5、8號出口中間
6. earpearp（어프어프）
earp earp係一間出名買手機殼同文具嘅舖頭，首爾好多地方都有佢嘅分店。
文具方面有貼紙、Memo紙、明信片等，大部份係₩3,000起。
另外呢度仲有好多iPhone或Galaxy嘅手機殼，每一款都係₩10,000起，設計特別同可愛，買個送返俾朋友都幾唔錯！
earpearp（어프어프）
- 地址：서울 송파구 백제고분로45길 21
- 營業時間：12:00 - 21:00
- 小Tips：松波渡口站1號出口行6分鐘
雖然講到蠶室未必會諗到shopping，不過如果咁啱當日天氣唔好，蠶室有好多時室內shopping Mall同地下街，喺度打發吓時間都幾好！
如果有更多想知嘅內容，都可以隨時留言或者dm話俾我哋知：）
Instagram：creatrip.hk