韓國懷舊零食
原來韓國懷舊零食同香港都幾似？除咗有《魷魚遊戲》再次興起嘅椪糖之外，仲有邊幾款？
Hello，大家好，我哋係由韓國人每日提供最新韓國旅行資訊嘅Creatrip。
講到Netflix《魷魚遊戲》，咁多個遊戲之中，最令人深刻嘅一定係椪糖關卡，呢個零食一直以嚟，唔少韓國人都鍾意，不過除咗呢款，仲有好多零食都係好懷舊，而家就等小編逐一為大家講解啦！
1960年代
1. 椪糖（달고나）
只要喺個器皿度加糖同埋梳打，加熱嘅時候用筷子去攪勻，就會變成椪糖，大家可以用唔同工具去整成唔同圖案，將佢哋壓扁之後就可以食。因為《魷魚遊戲》影響世界各地，令到呢個小食令到更加多人知，不過如果講返佢嘅起源，喺1960年代已經有人食緊。
NETFLIX
韓國小編話以前喺學校門口會見到買呢啲椪糖嘅攤檔，將工具令到佢哋壓扁變成唔同圖案係佢哋嘅特色，小朋友買完之後會好細心咁將個圖案同餅乾分開，如果成功分開可以免費多一個椪糖，不過事實玩落去真係一啲都唔簡單，只要稍微大力少少就會整斷，所以睇《魷魚遊戲》比賽嘅時候，會相當緊張。
2. 鯛魚燒（붕어빵）
鯛魚燒係眾所周知嘅冬季小食，鯛魚形狀入面會加入紅豆，自日本殖民時期引入之後，呢款零食變得更大眾化，特別係1950至1960年代，當時美國大量進口麵粉，令鯛魚燒變得更加普遍。
1970年代
1. Ice Cake（아이스께끼）
呢個可以話係雪糕嘅舊版本，聽講Ice Cake發音係源自於日本，主要係用一支棍加入糖精同香料，然後將佢哋雪凍，雖然同而家嘅雪糕差好多，不過當時可以話係代表性嘅零食之一。賣家會孭住上面個箱邊行邊大叫話有雪糕賣（有啲似以前香港賣飛機欖嘅方式），喺炎炎夏日見到，特別開心。
2. Jjoljjol-i（쫄쫄이）
呢個零食唔同廠商都會有唔同嘅名，例如有쫄쫄이（jjoljjol-i）、쫀득이（jjondeug-i）、쫀쫀이（jjonjjon-i）等，佢係用咗麵粉、粟米粉同糖去整，整成一條長方形，識落好煙韌，甚至有啲人會烤嚟食添。
1980年代
1. 阿波羅（아폴로）
阿波羅係將飲管入面分成有士多啤梨、香蕉、提子、朱古力等口味，係韓國小編最鍾意嘅零食之一。
因為佢嘅長度同形狀有啲似煙，唔少小朋友成日都會扮大人咁樣食煙，不過乖嘅小朋友千祈唔樂學啊！
2. 寶石戒指（보석반지）
呢款零食對當時嘅小朋友嚟講可以話係一個奢侈品，喺膠戒指上面整成一個好似寶石咁鮮艷嘅糖，唔單只係韓國，以前香港都唔少小朋友買嚟食。
1990年代
1. 漢堡包啫喱（햄버거젤리）
漢堡包、可樂、炸薯條等形狀整成啫喱，就好似食緊一個迷你套餐咁，以前有啲學生為咗想做班長，甚至會話請全班食漢堡包，點知當佢做到之後，只係送呢一個漢堡包啫喱。
2. 油漆糖（페인트 사탕）
喺文具舖只係賣₩200一粒，食嘅時候條脷會變成唔同顏色，不過唔少家長都唔太買俾小朋友，因為聽講對身體唔好。
甚至仲會有出啤酒形狀，小朋友最鍾意扮飲緊酒，不過實際嘅味道黃色係芒果味，以白色就食落似菠蘿。
2000年代
1. 比卡超豬排（피카츄 돈까스）
呢個以比卡超造型整成嘅豬扒，喺2000年代相當流行，成日都可以喺學校門口、文具舖，或者一啲小食店搵到。不過佢有一個好奇怪嘅傳說，有啲人話係用白鴿肉嚟整，當然事實根本就唔係咁。
2. 可樂炸雞粒（콜팝）
呢個產品係2000年由連鎖店品牌BHC所創，佢係用咗一個杯係裝好似爆谷大細嘅無骨雞肉，而下面就裝咗可樂。韓國小編話只要係星期六返學，或者係去啲大型運動會，經常都會見到呢種小食出現，亦因為咁BHC亦都咁多人識，知名度提高咗好多。
唔少零食其實同香港都有啲相似，對大家嚟講最懷舊嘅小食又係啲咩呢？歡迎留言話俾我哋知。
如果有更多想知嘅內容，都可以隨時留言或者dm話俾我哋知：）
Instagram：creatrip.hk