Hello，大家好，我哋係由韓國人每日提供最新韓國旅行資訊嘅Creatrip。

每個國家或者每間學校，都會有自己嘅獨特文化，不過小編早幾日上網搵資料，發覺原來韓國嘅中學文化都幾特別。唔知如果換轉喺香港發生，大家又會點睇呢？

韓國中學獨有文化

1. 班長要請全班食漢堡包

경기일보

每到新學期，返學第一時間除咗要交暑期作業同埋同朋友仔打招呼之外，好多時都會選人做班長。呢啲時候可能係同學或老師推薦、甚至有人會自薦想做班長。大家又知唔知韓國有一個講法係「只要做班長，就要請全班同學食漢堡包」呢？

問過韓國同事之後，佢都話：「做班長嘅人多數屋企都幾有錢，或者係啲好聰明嘅學生。就算有時想做班長，都會怕俾到負擔屋企人，所以寧願唔做。」雖然而家好多學校都取消咗呢個制度，不過小編覺得呢個文化真係幾神奇。

2. 化妝同染髮返學完全冇問題

서울신문

韓國人對「靚」嘅定義，相信唔使小編多講，大家都會知。大部分韓國人崇尚外貌主義，由好細個開始就會化妝，小編有時睇YouTube都會見到韓國中學生拍片教化妝。喺韓國甚至染髮都唔係一個大問題！相信大家以前都會趁暑假嘅時候染頭髮，返學前先再染返黑。但係喺操場集隊，長期俾太陽曬住，有時就算染黑咗都會慢慢開始甩色，呢啲時候Prefect就會出動，捉啲染過頭髮嘅同學仔去見訓導主任，有時可能仲會被記小過。

3. 著任何色外套返學都得

Coupang

平時夏天可能唔覺眼，不過喺秋天同冬天嘅時候，就會見到好多韓國中學生著出街外套返學。喺香港就真係好少見，最多都係著學校冷衫同校褸，就算係冬天有幾多凍都好，最多都只可以著多啲打底。（以前小編年代哈哈哈，而家可能每間學校規則都唔同~）

4. 著咩色襪同鞋返學都得

경북일보

喺香港，學校可能都會規定要著指定嘅鞋返學，就好似著裙嘅時候好多時要著黑皮鞋，著運動服就一定要著全白色波鞋。（每間學校可能唔一樣），不過喺韓國就冇特別嘅規定，著咩鞋都可以，韓國同事仲同小編講以前有同學會著毛毛boot返學添！同樣地著咩色襪都可以自己決定，唔似香港一定要著白色或者灰色襪。

5. 基本上每一個同學都會帶毛氈同枕頭返學

NEWS1

唔知大家返學嘅時候，會唔會有時覺得好攰，想趁Lunch time或小息嘅時候瞓個教呢？喺香港可能大家都只係用雙手咁托住瞓，但喺韓國佢哋都會自備枕頭，因為佢哋覺得咁先可以瞓得舒服啲。同樣地唔少女同學仲會帶多張毛氈返學，一來可以以防走光，二來仲可以當被用。

唔知大家睇完又會鍾意韓國定香港嘅中學文化呢？歡迎大家留言話俾小編知！

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購