仁川機場附近2日1夜行程推介
仁川唔係只得機場！附近其實仲有好多地方等住你去玩！「仁川2日1夜行程推薦」一啲都唔會覺得悶！
Hello，大家好，我哋係由韓國人每日提供最新韓國旅行資訊嘅Creatrip。
平時一到步仁川機場，好多時都只係諗住快啲去酒店check in，不過唔講唔知，其實仁川機場有一個景點叫做「永宗島」，有興趣喺飛返香港之前，小編推薦大家可以喺度Stay兩日一夜！
仁川機場附近兩日一夜行程推薦
1. 松林海水三溫暖（솔밭해수방）
- 地址：인천광역시 중구 공항서로163번길 26
- 營業時間：10:00 - 19:00、逢星期二休息
喺仁川機場第一航廈搭306號巴士，大約坐20分鐘車程，就可以去到「松林海水三溫暖」，大家只睇外觀又估唔估到呢度係一個咩地方呢？
睇個名大家可能都會估到啲，呢度係類似汗蒸幕嘅地方，不過同平時去開嘅有啲唔同，而家就等小編同大家講解吓啦！
呢度兩人價錢係₩34,000，兩人以上每人追加₩14,000，俾完錢之後老闆娘會俾衫、毛巾同Locker鑰匙大家。
同平時去汗蒸幕一樣，要先沖涼換好提供嘅衫再入去三溫暖。呢度特點係會喺水入面放一個裝有肉桂、魚腥草、川芎、艾草、薄荷、九節菊等藥草包，佢可以舒緩疲勞、改善皮膚、促進血液循環，緩解女性生理痛等功效。
每間房都係獨立，唔似一般汗蒸幕要同其他人一齊共用，就算係疫情期間都唔使太擔心，大家可以自己或者同朋友喺度自由自在傾吓偈。
入到房之後，老闆娘會俾兩條浴巾同殼大家，由於呢度水溫好高，大家要將浴巾浸濕後，再敷喺身體上。過咗一段時間，成間房會充滿藥草味，水蒸氣因為係海水，所以聞落會有啲鹹鹹地嘅味道。
老闆娘有同小編講到，未來計畫會有冷水房同游泳池，希望客人喺夏天或冬天都可以喺度好好享受。
2. 海松生菜包飯（해송쌈밥）
- 地址：인천 중구 공항서로 177
- 營業時間：10:30 - 20:30、Last Order 19:50
體驗完三溫暖之後，大家係唔係應該都開始肚餓呢？小編推薦大家可以去離三溫暖唔遠，行唔使10分鐘路程嘅「海松生菜包飯」。
「海松生菜包飯」一共分咗4層，唔單止係一間餐廳，一樓有賣杯盤、四樓仲係一間景觀Cafe。
大家嚟韓國都可能試過食菜肉包，不過螺肉生菜包「飯」又聽過未呢？
螺肉包飯定食（우렁쌈밥정식1인）₩15,000
呢度有好多小菜提供，甚至連辣炒豬肉同蘿蔔燉魚都係可以無限Refill！
包飯醬係用咗20種堅果製作而成，裡面有花生、南瓜籽、葵花籽、核桃等配料，食落有啲似花生醬，好特別！
呢度提供嘅飯係用咗石鍋裝，而且仲係紫米飯！裡面仲放咗一粒對身體好嘅銀杏，大家平時喺街聞到嘅會覺得臭，不過食落其實冇咩味。
3. 馬嘶鞍海邊（마시안해변）
- 地址：인천광역시 중구 마시란로 118
大家應該都知仁川係一個海港，小編今次想帶大家去「馬嘶鞍海邊」，呢度可以同時睇到泥灘同白沙灘 。
如果鍾意睇日落嘅朋友，去開仁川不妨可以考慮去呢度，一定可以影到人生照！
4. 馬嘶鞍麵包店（마시안제빵소）
- 地址：인천 중구 마시란로 155
- 營業時間：10:30 - 21:00（星期三、四冇提供早午餐）、週末10:30 - 20:30（14:00 - 17:00冇提供早午餐）
馬嘶鞍海邊有好多Cafe可以欣賞海景，當中小編想推薦大家去「馬嘶鞍麵包店」，佢係一間有賣甜品、早午餐、雪糕、各式飲品等，而且都幾出名。
Cafe有兩層樓高，室內室外都好闊落，夠多位，平日晏晝去都幾多人，可想而知佢幾有人氣！
一樓戶外區有一個小庭院，呢度放咗好多人型公仔俾大家一齊合照留個紀念。或者大家可以落完單出嚟吹吹風，望吓大海放鬆心情。
二樓座位區有一個大玻璃窗同露天天花板，一樣可以望到大海，完全係另一個感覺！
韓式年糕牛角窩夫（인절미크로플）₩4,000 / 青提子梳打（청포도에이드）₩6,000
韓式年糕牛角窩夫係呢度主打甜品之一，不過老實講....味道一般，另外飲品方面叫咗一杯青提子梳打，飲落似飲緊藥水 ，建議大家之後可以試其他款。
5. 馬嘶鞍泥灘體驗場（마시안갯벌체험장）
- 地址：인천 중구 마시란로 107-8
- 網址：撳我睇體驗時間
如果大家平時有留意開韓國綜藝節目或者韓劇，應該都會見到呢種泥灘體驗，佢係韓國西海岸常見嘅活動之一。
現場有提供各種器具、雨鞋等俾大家租借，另外仲有提供背心方便認到大家（需要俾₩10,000現金做押金）。
喺泥灘上行路要小心，因為可能一個唔小心就踩死一個小生命 仔細搵嘅話可以發現一啲濕地生物。
雖然網站中有公告體驗時間，但每日會因為潮汐而有所變動，所以小編建議大家早啲去，或者當日去之前先打電話問清楚會好啲。
6. Nest Hotel
- 地址：인천 중구 영종해안남로 19-5
玩咗成日相信大家都開始攰，咁不如就去機場附近嘅「Nest Hotel」休息一下啦！
「Nest Hotel」除咗有餐廳之外，仲有健身房、三溫暖、游泳池同圖書館等設施，就算留喺度全日都唔會覺得無聊。
酒店後面有一大片蘆葦叢，喺度散步會覺得好放鬆。
房嘅內部都好乾淨同闊落，有提供各式茶包同沖涼用品，張床都幾舒服。酒店因應提倡環保，床上有個溫馨小提示提醒連住幾晚嘅客人，如果有需要換床單嘅話再同職員講，如果唔係佢哋唔會主動入房換。
7. 黃海海鮮刀削麵（황해해물칼국수）
來源：Naver Blog nml10
喺「Nest Hotel」附近行大約10分鐘，會見到一間成日大排長龍嘅「海鮮刀削麵」店，因為太有人氣，仲開咗二號店！外觀係韓國傳統麵店嘅樣貌、招牌有啲褪色，可以feel到呢度有啲年代感，係當地人先知嘅美食店！
牆上亦掛咗唔少明星簽名，大家又認唔認到有邊個呢？呢度Menu好簡單，只係得海鮮刀削麵，大家可以再選擇要唔要另外加錢加山章魚同鮑魚（四隻）。
海鮮刀削麵（해물칼국수）₩10,000
用黃太魚乾、大蔥、蒜熬煮嘅湯，飲落好鮮甜，裡面仲有扇貝，青口，蜆、蝦、年糕等，如果覺得太清淡，可以夾住泡菜一齊食。
海鮮麵份量超多，比手掌仲要更大， 鍾意食海鮮嘅朋友，一定要嚟試吓！
8. 仙女風 水生魚片專門店（선녀풍 물회전문점）
- 地址：인천 중구 용유서로 272
- 營業時間：12:00 - 21:00、星期一、二休息
如果大家仲有時間，可以去離機場稍微遠少少嘅「仙女風 水生魚片專門店」。
韓國水生魚片同大家平時諗到嘅生魚片直接點醬食有啲唔一樣，水生魚片一般會喺底部放滿蔬菜、青瓜，上面鋪一層碎冰同辣醬，最後加飯一齊撈嚟食。
仙女水生魚片（선녀물회）₩20,000
不過小編今日介紹嘅呢碗「仙女水生魚片」係放麵食，底層放滿蔬菜，中間係碎冰肉湯，最上層係超滿嘅生魚片，因為加咗少少麻油，食嘅時候會更加香。
酸酸辣辣，魚肉好鮮同嫩，未試過水生魚片嘅朋友，如果有時間同好奇係咩味嘅話，一定要嚟試吓！
9. 永宗觀光漁市場（영종관광어시장）
- 地址：인천 중구 은하수로 3
想食到新鮮海產，嚟永宗島嘅舊邑碼頭（구읍뱃터）一定可以執到寶！
雖然永宗漁市場規模唔算好大，不過一樓有賣好多生魚片、貝類海鮮、蝦、蟹等，二樓仲有海鮮餐廳。
10. 港口紅蟹食堂（항구 홍게식당）
- 地址：인천 중구 은하수로 3
- 營業時間：09:00 - 22:00
永宗漁市場二樓有一間叫做「港口紅蟹」餐廳，紅蟹同生魚片係佢哋招牌菜同特色。
紅蟹拉麵（홍게 라면）₩10,000
一碗拉麵，有超大隻紅蟹，同時仲有超多青口、蝦同兩串魚糕。雖然紅蟹只有蟹腳有肉，但量多，湯底又夠濃郁，大家一定可以食得飽！
之後去仁川唔再只係諗到「機場」，附近其實仲有好多地方等住大家去玩！希望大家會鍾意小編呢次嘅分享啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk