韓國彩虹打卡景點
韓國9個以彩虹色為題嘅打卡景點！想影到人生照就要mark底啦！
Hello，大家好，我哋係由韓國人每日提供最新韓國旅行資訊嘅Creatrip。
唔知大家最鍾意嘅顏色係咩呢？小編由細到大最鍾意嘅顏色就係彩虹色，五顏六色望住心情都特別好，不過大家又知唔知其實喺韓國國內都有好多以彩虹為主題嘅打卡景點，今日就等小編為大家逐一介紹啦！
韓國彩虹打卡景點
1. 泗川彩虹海岸公路（사천 무지개 해안도로）
地址： 경상남도 사천시 용현면 금문리 212-3
泗川彩虹海岸公路全長2.81km，沿路有彩虹色防護牆圍住，好多人開車經過都會影底，甚至好多人會喺日落嘅時候去散步，特別有feel。如果同朋友一齊去，可以夾著埋著彩虹色衫去打卡，留低一個美好回憶。
Instagram：ondal_yongeun
如果咁啱去嘅前一日有落雨，大家仲可以影呢一種倒影照？完全係另一種風格，不過如果冇落雨，大家都可以自己去整（不過可能要用好多水）。
2. 木浦彩虹道路同木浦Sky Walk（목포 무지개 도로 & 목포 스카이워크）
地址：전라남도 목포시 죽교동 465-151
Instagram： jeongah_kkang
木浦天空步道附近都有一條好短嘅彩虹步道，雖然冇泗川彩虹海岸公路咁長，但同樣都吸引唔少人去打卡，佢好近海，坐喺度聽住海聲好治癒。（不過大家要小心浪會太大。）
Instagram： railway315
行天空步道前，可以喺呢個SKYWALK前面打返張卡，一張都係用咗彩虹色。
Sky Walk係免費入場，行嘅時候可以望到木浦嘅海景，天空步道總長54米，有三份二係透明玻璃面，可以感受到喺海上行嘅快感。
3. 濟州道頭洞彩虹海岸公路（제주 도두동 무지개 해안도로）
地址：제주특별자치도 제주시 도두일동 2287
Instagram：unique_haru
濟州道頭洞彩虹海岸公路係好多人必去打卡嘅景點，同樣好近海，可以感受到海風吹過，附近仲有好多度假屋、Cafe同餐廳，可以喺嗰度邊望海邊休息。
Instagram： imgenieforu_
呢一種風格嘅拍攝唔少情侶都有影過，大家之後都可以試吓，相當有創意！
4. 濟州新興里Saemulkak彩虹道路（제주 신흥리 새물깍 무지개 도로）
地址：제주특별자치도 제주시 조천읍 신흥리 59-9
Instagram： _yujaaa
同樣係喺濟州，雖然冇道頭洞彩虹海岸公路咁出名，但都一樣好吸引人去打卡，呢條路隔離嘅水道「새물깍（Saemulkak）」係流入濟州海嘅淡水（無鹽水），聽講即使喺乾旱嘅時候，呢度嘅水道都唔會乾涸。
Instagram： _yujaaa
呢條彩虹道路係今年夏天開始喺Instagram成日見到有人打卡，幾個月前只係得少數人知，而家因為太多人知，變得越嚟越出名，多咗唔少人跟住去打卡。
Instagram： _yujaaa
原本只係一個防護牆，因為油咗唔同鮮豔顏色之後，令到呢度變得更有氣氛。
5. 濟州多樂小學（제주 더럭 초등학교）
地址：제주특별자치도 제주시 애월읍 하가로 195
Instagram：yun_daengg
今次嘅彩虹打卡店係濟州島嘅一間小學，以鮮豔顏色嘅外牆吸引唔少人去望，本來因為學生太少，只係一間「分校」，但最近學生人數變多，2018年被認定為係「小學」！
Instagram： blue_photographic
就連水龍頭嘅牆都油成彩虹色，真係超可愛！
Instagram：chovely_s2
學校外牆五顏六色，吸引唔少遊客都會去打卡，大家可以影成9格再合拼，再睇吓邊一隻色最襯自己，不過而家因為疫情影響，外部人士唔可以入學校，可能要等之後先可以去
6. 牛島Bongkkeurang彩虹漢堡（우도 봉끄랑 무지개 버거）
地址：제주특별자치도 제주시 우도면 우도해안길 144
營業時間：09:00 - 17:30
Instagram： yunyeong_oh
濟州島附近嘅牛島，有一間餐廳仲有賣彩虹漢堡，去完影彩虹道不如就去食埋個包啦！
Instagram：yunyeong_oh
呢個漢堡排用咗濟州黑豬肉去整，味道同外觀一樣咁正！加上可以望住呢個海景食，真係好正。由濟州島坐去牛島，需要喺濟州島城山碼頭坐船，每30分鐘一班，詳細班次請參考渡輪官網。（網站只有韓文。）
另外提提大家，每個月嘅船期都有啲唔同，大家去之前可以先喺官網參考。
7. 釜山長林浦口（부산 장림포구）
地址：부산광역시 사하구 장림1동 장림로93번길 72
長林浦口彩虹色小屋其實係漁民嘅倉庫，因為鮮豔嘅顏色吸引唔少遊客注意，二樓有休息區、工作間、Cafe等，可以喺度休息一陣。
Instagram： y______miiiiiiiiii
長林浦口嘅彩虹色小屋會因為天氣同日落時有唔同，大家可以喺2樓邊嘆住咖啡邊睇吓有咩變化。
Instagram： didi_bichon
有韓國人仲會帶住自己狗仔嚟打卡，唔同顏色背景影出嚟真係特別可愛！
8. 釜山甘川文化村（부산 감천마을）
地址：부산광역시 사하구 감천2동 감내1로 200
甘川文化村係由朝鮮戰爭期間，為咗一啲無家可歸嘅人喺山丘上起屋，一開始因為每間屋靠太近唔太好睇，喺2009年被選為鄉村藝術項目區，經過好多學生、居民同藝術家巧手之下，變成而家一個多姿多彩社區，無論係韓國人定係遊客都一定會去打卡。
Instagram： miju_yah
由村頂頂端展望台望落去，可以見到成個甘川文化村風景，每個角落都隱藏住唔同景點同工作坊，大家去到會發掘到唔少驚喜。
9. 平昌六百畝地彩虹長櫈（육백마지기 무지개 벤치）
地址：강원도 평창군 미탄면 평안한치길 721-98
Instagram： jeonso715
江原道平昌市清玉山海拔1256m，山頂有一大片田野，被稱為「六百畝地」。 喺嗰度設置咗一個彩虹色長櫈打卡位。除咗可以打卡之外，黃昏時間去仲可以欣賞到美景，感受一下大自然景色，就算辛苦少少去到都係超值得。
Instagram： jeonso715
「六百畝地」呢個名係指可以播種六百畝單位田地（過去計數單位），超方超大，嚟到會見到一望無際嘅草原。
Instagram：jeonso715
因為山頂上嘅風太大，所以喺度安裝咗好多部風力發電機。
唔知以上咁多個以彩虹色為題嘅打卡點，有冇邊幾個地方大家之後會想去打卡嘅呢？歡迎留言話俾我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk