Hello，大家好，我哋係由韓國人每日提供最新旅行資訊嘅Creatrip。
如果有留意開韓國，應該成日都會聽到「江原道」呢個地方名，不過其實江原道好大，到底又點玩先好呢？今日小編想同大家介紹幾個地區嘅美食，如果大家去旅行都係鍾意以食為主，咁你就唔可以錯過啦！
江原道「春川」美食
1. 有味辣炒雞排（유미닭갈비）
- 地址：강원도 춘천시 금강로62번길 12
- 營業時間：平日 10:00 - 22:00、週末 09:00 - 22:00、每個月第二個星期三休息
嚟到春川又點可以唔食辣炒雞排呢？喺春川明洞辣炒雞排街中真係有好多間辣炒雞排店，今次小編最咗一間叫做「春川有味辣炒雞排」 ，基本上辣炒雞排會有雞肉、大蔥、椰菜、年糕同蕃薯等（不過每間鋪頭都有會少少唔一樣）。
辣炒雞排（닭갈비）300g₩12,000
職員會幫手將雞排炒好，完全唔使自己落手去炒，啱啱好熟嘅雞肉超鮮嫩，配上鋪頭獨門辣醬真係好好味，年糕口感都算煙韌，配辣雞一齊食入可以降低油膩感。
怕油膩嘅朋友可以包住生菜或醃蘿蔔泡菜一齊食，可以順便解辣。
江原道「江陵」美食
1. 草堂豆腐村 童話花園（초당순두부마을 동화가든）
- 地址：강원 강릉시 초당순두부길77번길 15
- 營業時間：07:00 - 19:00（元祖海鮮嫩豆腐販售時間08:30 - 19:00）、Break Time 16:00 - 17:00、星期三休息
- 小Tips：由鏡浦海邊站（경포해변역）搭202號巴士去江門海邊入口站（강문해변입구역）落車，行大約10鐘就到。
如果講到江陵有咩係必食？絕對唔可以唔提嘅一定係海鮮嫩豆腐，而最好食嘅一間絕對係「童話花園」！
由朝早7點開始營業，小編大約等咗一個鐘之後就入到去，呢度menu好簡單，主要係原祖海鮮嫩豆腐、安松子大醬湯、草豆腐、辣味嫩豆腐、塊豆腐等。
元祖海鮮嫩豆腐（원조짬순순두부）₩10,000
雖然真係有啲辣，但如果大家有機會嚟到江陵，一定要試吓！豆腐好滑同濃味，海鮮湯仲加咗胡椒令到更香，當中仲加咗蔬菜一齊煮，令湯變更甜，不過唯一可惜係海鮮份量唔算太多。
2. 江陵 SOON TOFU GELATO（순두부젤라또）
- 地址：강원 강릉시 초당순두부길 95-5
- 營業時間：10:00 - 19:30、Break Time 15:30 - 16:30、逢星期二休息
喺童話花園食完海鮮嫩豆腐之後，沿住大馬路往江門海邊方向行唔使5分鐘，就會見到「SOON TOFU GELATO」豆腐雪糕專門店，當中有豆腐、年糕、黑芝麻、咖啡、紫薯、綠茶、鹽焦糖、Nutella杏仁朱古力等可以揀。
小編最後揀咗豆腐口味，有點似食緊豆腐花雪糕嘅感覺，甜而不膩， 除咗豆腐口味之外，小編見到好多人會揀抹茶同黑芝麻口味，感覺都係人氣口味，大家之後都可以試吓！
江原道「鐵原」美食
1. 平易淡白 排骨刀削麵（평이담백 뼈칼국수）
- 地址：강원 철원군 동송읍 태봉로 1833
- 營業時間：10:30 - 20:00（Break Time 15:00 - 17:00）、週末10:30 - 20:00（Break Time 16:00 - 17:00）
由「孤石亭」行大約15分鐘就會到「平易淡白 排骨刀削麵」，佢係鐵原一帶最出名嘅餐廳之一，門口泊滿哂車可以知道幾有人氣！另外需要拎號碼牌先可以入場，如果前面有10組客人，需要等30分鐘、20組大約等50分鐘、30組大約等70分鐘）。
鋪頭入面雖然只係得十幾張檯，但都坐滿哂人要等位。
Menu好簡單，有「排骨刀削麵（뼈칼국수）」、「涼拌刀削麵（비빔칼국수）」、「蝦餃（새우만두）」，而一到夜晚會多咗「炒排骨（뼈볶음）」同「辣炒墨魚（매콤갑징어볶음）」。
坐底落完單之後，職員會先送上小菜，有青陽辣椒、洋蔥、泡菜、烤肉醬同特製醬汁。
排骨刀削麵（뼈칼국수）₩10,000
小編叫咗呢度嘅招牌菜「排骨刀削麵」，用咗豬骨去熬製，湯底特別濃郁，因為加咗少少蔥同蛋絲，睇落更加豐富！排骨超嫩，大家可以點特製酸酸辣辣嘅蒜味醬汁，超惹味！喺其他地方絕絕食唔到！保證大家一試愛上～ 行完孤石亭之後，天氣凍最啱食一碗！
江原道「三陟」美食
1. 中央市場 綠豆&薯仔店舖（녹두&감자 점포）
- 地址：강원도 삼척시 진주로 12-21 중앙시장 녹두&감자
- 營業時間：08:00 - 20:00
去到三陟，一定要去中央市場食當地美食「蕎麥煎餅」（메밀 전병），而且又平又好食！
由中央市場後門入去行左邊，就會去到第一間綠豆薯仔鋪頭，呢度有賣各種煎餅、油炸食品、餃子同血腸等
蕎麥煎餅（메밀전병） ₩5,000一份三個
只要叫蕎麥煎餅，老闆就會將已經煎好嘅再用微波爐叮熱，大家食嘅時候仲會係熱辣辣。中間仲放咗泡菜同冬粉，呢個組合真係超完美，雖然辣辣地，但同出面柔軟嘅蕎麥麵粉一齊食，就會中和返。
烙餅（부꾸미） ₩5,000一份三個
另外小編仲有叫多個烙餅，呢個係喺糯米餅上加紅豆蓉，老闆即場煎，超好味！
南瓜米水（단호박 식혜）₩5,000 一支
呢度嘅南瓜米水唔會太甜，同烙餅一齊食啱啱好，小編兩個人去，但因為量太多，最後食唔哂仲打包添！
江原道「平昌」美食
1. 南京食堂 （평창군 남경식당）
地址：강원도 평창군 대관령면 대관령마루길 347
營業時間：10:30 - 20:00
喺大關嶺羊群牧場附近有一間餐廳，呢度嘅餃子唔係用豬肉餡，而係用咗野雞肉，好特別！
睇外部以為係一間細餐廳，點知入到去，內部都幾闊落。
野雞蒸餃子（꿩 찐만두） ₩7,000
喺等主食之前，小編先試咗呢個野雞蒸餃子，一份有7-8粒，可以2-4個人分嚟食，可能因為第一次食，原本以為會有啲怪味，點知出奇地超好味！
野雞餃子湯（꿩만두국）₩8,000
野雞餃子湯入面除咗有野家餃子之外，仲有雞蛋、紫菜、大蔥、芝麻等，超濃郁！好好味！
蕎麥麵（메밀 막국수）₩8,000
江原道出名嘅麵，非蕎麥麵莫屬！佢比平時食開嘅冷麵更加厚，同甜辣醬加冰撈埋一齊食超幸福！
江原道「東海」美食
1. 海林生魚片店（해림횟집）
地址：강원도 동해시 동해대로 6270-31
營業時間： 10:00 - 22:00
去到江原道一定要試嘅仲有水生魚片！好多人都以為佢係浦項先有，不過其實喺江原道東海岸都好容易搵得到。
餐廳有分室內同室外，天氣好嘅話，大家可以坐出面邊吹風邊食。
水生魚片連白飯 （물회 공깃밥 포함 ） ₩15,000
水生魚片包括有比目魚同石斑魚，根據唔同季節，仲會有埋魷魚。 將生魚片、各種蔬菜同辣醬撈埋一齊食。因為呢度調味係用水果為主再加辣醬，食落甜甜地辣辣地。
如果加埋白飯味道又會變得有啲唔一樣，一開始可能會覺得有啲怪，但食食吓會令人忍唔住食完一啖又一啖！
江原道「束草」美食
1. Chupilyeo Guksi（속초 추필여국시）
地址：강원 속초시 선사로4길 4-1
時間：10:00 - 15:00、逢星期一休息
如果大家行開青草湖，會見到附近有一條小巷，呢間餐廳好多當地人都會成日去幫襯。
餐廳內部有一種去咗韓國人屋企嘅感覺，大家可以揀坐地下或者坐檯，環境好舒適。
雖然小編只係叫咗一碗₩7,000醬湯刀削麵（장칼국수），但呢度就會俾超多伴菜。
呢度嘅刀削麵同大家平時食到嘅有啲唔一樣，呢度係由辣椒醬同豆醬製成紅色湯底，辣得嚟又好香，鍾意食辣嘅朋友一定唔可以錯過！
2. 中央市場（속초중앙시장）
- 地址：강원도 속초 중앙시장로6길 14-1
- 營業時間： 08:00 - 24:00（每一間鋪頭都會唔一樣）
位於江原道嘅「束草」係好多韓國人放假時好鍾意去嘅旅遊勝地之一。當地最大傳統市場係「束草中央市場」，同時亦被稱為束草觀光水產市場。
喺呢度有好多韓國小食，只係望到都令人流哂口水，由魷魚血腸到高等級螃蟹都有！
如果想知道更多關於束草中央市場有咩好食同買，可以撳我了解更多詳情！
江原道「橫城」美食
1. 青太山蕎麥麵（청태산 막국수）
地址：강원도 횡성군 둔내면 둔내로 68
營業時間：11:00 - 19:00（Break Time 15:00 - 17:00）
喺橫城嘅其中一間小區，小編發現呢一間青太山蕎麥麵。
蕎麥麵（막국수）₩6,000，大大碗好好味！薯仔煎餅（감자전）₩6,000，比起首爾食到嘅更大份，同蕎麥麵一齊食相當夾。
薯仔湯（감자옹심이）₩6,000，係江原道當地人引以為豪嘅一道菜，著仔好有咬口，而且湯底好濃郁，超好味！
2. Maok Nongaeundaejip（마옥논가운데집）
地址：강원 횡성군 횡성읍 성동로 544-12
營業時間：10:00 - 20:00、逢星期一休息
雖然睇外觀只係覺得係一間老屋，不過呢度有好多美食等住大家。
呢度嘅主打菜係막국수（蕎麥麵）₩7,000，同편육（片肉） ₩12,000 起，另外大家仲可以試佢哋嘅메밀전（蕎麥煎餅），三款都好好味。
3. 橫城韓牛村（횡성한우마을）
地址：강원 횡성군 우천면 수남로 348
橫城係出名食韓牛，就算貴咗啲，嚟到呢度都唔可以錯過。 呢度有一條好出名嘅韓牛村，周圍都可以見到韓牛嘅餐廳。
呢度有一條好出名嘅韓牛村，周圍都可以見到韓牛嘅餐廳，甚至有啲餐廳入面會見到包住一箱箱，都係要準備寄去全國。
4. 橫城韓牛百貨店（횡성한우백화점）
地址：강원 횡성군 우천면 수남로 346
營業時間：09:00 - 21:00
喺咁多間韓牛餐廳入面，最後小編揀咗橫城韓牛百貨店，因為佢係咁多間之中當地評價係最好。
喺入口附近，大家就可以揀想燒嘅肉。 如果以1+ 里肌肉嚟講，每100克價錢大約係₩29,000 。
當小編喺揀緊肉嘅時候，職員已經擺好晒所有小菜喺檯，相當之有效率。
韓國人好鍾意喺食燒肉嘅時候叫一碗大醬湯，價錢一啲都唔貴（₩2,000） ，好推薦大家都要叫嚟飲。
唔同地方都有當地地道美食，下次去江原道旅行，都可以參考吓啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
