《無法抗拒的他》拍攝地
《無法抗拒的他》大結局！小編整理咗當中拍攝取景地，大家快手撳save下次去打卡啦！
Hello，大家好，我哋係由韓國人每日提供最新韓國旅行資訊嘅Creatrip。
《無法抗拒的他》喺上星期就大結局，唔知大家又有冇追呢？今日小編整理咗《無法抗拒的他》當中，有啲令人印象深刻嘅景點，有興趣嘅朋友就要save底，之後去打卡啦！
備註：劇照、畫面照片來源為jtbc
《無法抗拒的他》拍攝地
1. 餘裕陶藝工房（여유도예공방）
- 地址：전라남도 여수시 만성리길 53
喺《無法抗拒的他》第6集，娜比返鄉下去阿姨屋企，兩個人落車嘅位置就係喺麗水「餘裕陶藝工房」前面，再望去前面就係萬聖里海水浴場。麗水出名夜晚睇海景，之後有機會嘅話，大家食飽都可以去呢度散吓步。
2. 插橋湖遊樂園（삽교호 놀이 동산）
- 地址：충남 당진시 신평면 삽교천3길 15
- 時間：平日10:00 - 22:00、星期六11:00 - 23:00、星期日10:00 - 22:00
已經去厭哂首爾嘅主題樂園？咁之後想去玩新機動遊戲，不如就去喺《無法抗拒的他》第7集出現過嘅首爾近郊唐津市「插橋湖遊樂園」啦！佢喺嗰一帶嘅地標，一座巨大摩天輪矗立喺市區，相當顯眼。下次有機會去唐津，搭返轉摩天輪，感受一下宰彥同娜比嘅曖昧時刻啦！
3. 3917迎接（3917마중）
- 地址：전남 나주시 향교길 42-16
喺度赫屋企嘅民宿入面，度赫同宰彥第一次見面，但同時亦擦出詭異火花，呢個拍攝場景「3917迎接」實際上係真正韓屋民宿，位於羅州市，相當有古典氛圍，真係好想喺度瞓返一晚。
4. 蔚山大學（울산대학교）
- 地址：울산 남구 대학로 93
《無法抗拒的他》入面有喺好多間大學度取景，不過就分得好散，但主要集中喺蔚山大學同安東大學（안동대학교），呢兩間大學都係出名春天睇櫻花，而且仲有條櫻花路。
5. 平澤湖Studio（평택호 스튜디오）
- 地址：경기도 평택시 현덕면 서동대로 62-13
呢一間雕塑系工作室並唔係喺以上兩間所提到嘅大學，而係位於平澤市嘅「平澤湖Studio」。
6. 弘大街頭（홍대）
- 地址：서울 마포구 와우산로27길
嚟過韓國幾次嘅朋友，對呢到一定唔會陌生，佢就係弘大其中一條街道，每次去StyleNanda、CHUU等一定會經過，大家又掛唔掛住以前喺度瘋狂Shopping嘅日子呢？
7. 西市場（서시장）
- 地址：전남 여수시 서교연등천길 43
娜比同度赫一齊行嘅「西市場」位於麗水，仲俾阿珠媽誤以為佢哋係情侶。後嚟行行吓遇到度赫表妹，嚟一個神助攻，俾度赫踩單車車娜比返民宿，望住呢個畫面都覺得好sweet！
8. 昏桐海水浴場（무안 홀통해수욕장）
- 地址：전남 무안군 현경면 오류리 산2-1
度赫同娜比一齊去露營，娜比飲醉之後，都冇想入非非，相當紳士。佢哋當時嘅位置係喺務安嘅昏桐海水浴場，雖然冇影到好多海景場面，不過大家應該都會想同小編一樣，將來一定要喺韓國坐露營車去玩一日！
9. 美美屋（미미옥）
- 地址：서울 용산구 한강대로15길 27
- 時間：11:00 - 21:30（平日Break Time 15:30 - 17:00、週末Break Time 16:00 - 17:00）
上面介紹嘅地方都係比較遠離首爾，但度赫屋企開嘅麵店離首爾近啲，係喺新龍山站嘅「美美屋」。獨特韓屋古典裝修，喺龍山一帶相當顯眼，下次有機會都可以試吓，話唔定之後可以撞到度赫Oppa。
10. Mimesis美術博物館（미메시스 아트 뮤지엄）
- 地址：경기 파주시 문발로 253
《無法抗拒的他》第1集開頭，娜比去博物館睇展覽，發現初戀男朋友賢宇將佢哋嘅性愛姿勢，變成藝術作品，甚至仲取咗同自己名一樣叫「나비（Na-Bi）」，因而大受打擊。呢個博物館唔知大家有冇覺得有啲熟悉，佢喺《黑道律師文森佐》以及《我的上流世界》都有出現過。
11. JR Pub（제이알펍）
- 地址：서울 용산구 보광로 127
失戀嘅娜比一個人飲悶酒，喺嗰時就同宰彥開始有啲曖昧，當時兩人喺梨泰院嘅「JR PUB」，喺呢啲咁有feel嘅地方，仲要遇到咁靚仔嘅宰彥，真係好難令人抗拒？
12. 閑談烤腸（한담곱창）
- 地址：서울 용산구 새창로 209
同樣係《無法抗拒的他》第1集場景，娜比去咗自己系嘅聚餐，同宰彥第二次見面，同時開始咗兩人不解嘅緣份。呢間餐廳位於龍山，叫「閑談烤腸」，鍾意食烤腸嘅朋友，之後都可以嚟打卡。
13. Book Park（북 파크）
- 地址：서울 용산구 이태원로 294
- 時間：11:00至22:00
娜比同朋友傾電話，而朋友所在位置就係喺梨泰院圖書館「Book Park」取景，就連韓劇《芝加哥打字機》之前都喺度取過景。
以上係韓劇《無法抗拒的他》拍攝場景，大家之後有邊度會想去打卡嘅呢？歡迎留言話俾我哋知。
如果有更多想知嘅內容，都可以隨時留言或者dm話俾我哋知：）
Instagram：creatrip.hk