Hello，大家好，我哋係由韓國人每日提供最新韓國旅行資訊嘅Creatrip。
大家知唔知韓國人放假得閒嘅時候會做啲咩呢？ 今日小編就介紹十個韓國人最常做嘅事俾大家知啦！
韓國人最鍾意做嘅10大活動
10. 旅行
Netflix
香港人好鍾意去旅行，韓國人都一樣！韓國每星期嘅工時同香港差唔多，都係幾乎淨係有返工冇返工，不停OT，冇得休息。長假期又冇香港咁多，得新年同中秋，所以一到長假期，韓國人就會好珍惜去旅行嘅機會，機場同酒店都會塞滿人！（疫情之後，韓國人多咗喺國內旅遊）
9. 足球
足球喺韓國係一種非常受歡迎嘅運動，唔只男仔鍾意踢足球，女仔都好鍾意睇球賽，運動員仲係小朋友夢想職業中排第一。尤其係韓國足球運動員孫興慜大熱，而家已經成為世界級足球運動員，令足球更受歡迎。
8. 釣魚
@BTS_twt
因為韓國嘅地勢關係，好多地區被都大海包圍，所以唔少韓國人鍾意出海釣魚。另一個主要原因，釣魚係一個靜態活動，自己一個都可以進行，俾一個同自己獨處嘅時間。運氣好嘅話（當然技術都好重要），仲可以收穫豐富，有一餐又新鮮又美味嘅海鮮餐！
7. 睇電視
KBS2
喺屋企可以做嘅，又最簡單嘅活動，當然唔少得睇電視！平日工作忙碌，有唔少人放假都會留喺屋企休息，坐喺度睇電視，尤其而家疫情，更加多人留喺屋企煲劇。
6. 睇電影
韓國年青人都好鍾意去電影院睇電影，覺得音響好啲，有氣氛啲！好多情侶都會去電影院拍拖，特別係曖昧緊，或者熱戀緊，更加可以令感情升溫！（哎啊！「唔小心」掂到隻手仔添⚡️🙈）
5. 睇書
JYP Entertainment
小編睇到第5位有啲意外，原來韓國人咁鍾意睇書！隨住科技發達，有手機就可以上網聽歌、睇片，好多韓國人會用app睇書。根據2019年嘅調查數據，雖然有閱讀習慣嘅人數有下跌傾向，但仍然有50.6%，一個韓國人平均每年睇14.4本書。
4. 打機
第4位就一啲都唔出奇啦！相信香港又好，韓國都好，都好多人鍾意打機（包括手機遊戲、online game）。根據2020年對於韓國國內玩手機遊劇嘅調查，韓國嘅女仔（41.3%）同男仔（58.7%）都好鍾意玩手機遊戲。比較驚訝嘅係，玩得最多嘅反而唔係青少年，而係40幾歲嘅人！
3. 做運動 
MNet
去過韓國公園嘅話，應該都會見到好多人係度跑步、做運動。 根據2020年關於韓國人生活體育活動嘅調查，有81.4% 嘅韓國人有運動嘅習慣，佢哋最鍾意嘅運動就係競步行/慢跑。韓國有個優勢係有好多好有嘅公共空間，可以俾人去做運動。
2. 聽音樂
Complete Bliss
聽音樂對好多人嚟講係一種紓緩壓力嘅方法，有手機就得，好方便，而最多韓國人聽音樂嘅時間係朝早。小編都係！坐車返工一定會戴住AirPods聽歌，如果AirPods冇電，或者唔記得帶出街嘅話，就係周身唔聚財咁！
1. 行山
講到韓國人鍾意做嘅活動第一位就係行山啦！可能因為韓國山多，所以佢哋鍾意爬山。除咗趁機做運動，仲可以欣賞到大自然嘅美景。疫情爆發之後，根據統計數據顯示，同舊去年相比，多咗21%韓國人去行山，而最鍾意嘅山分別係北漢山（首爾）、雞龍山（大田）同雉岳山（原州）。
以上就係韓國人最鍾意做嘅10大活動，大家又鍾意做咩呢？唔知香港嘅排名又會唔會唔一樣呢？歡迎留言俾小編統計吓！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
